💚✴حارس روحــي✴💚 ( كرونيك باللهجة التونسية: مكتملة )

💚 ♣القسم 2♣💚

❇✴♣❇✴🍀

نهار كان صعيب شوية ، لايزي الستاجار الجديد مافاهم شي و خواف من خيالو ولا يزي ضغط في الخدمة وتعب كملو كان روتار.
حرك كرومتو فماش ما يطير شوية تعب ، اشرف ايلي كان بجنبو وهو في حالة اعظم منو قرر يبات عندو ربحا للوقت و ربحا للراحة بحكم دارو ابعد من دار زياد ، مستانس هكا ، ياما ليالي عداها عندو .
"برجولية ، الستاجار الجديد ميؤوس منو "
" او ...تي انت كنت كيفو وتوا ايلي يقلك نائب الرئيس ...ايلي هو انا وماندراك " لغتو كانت فيها بارشا رميان معنى وتمسخير ، وقف باهت وعينيه وساعت "أشرف "
"اه " قالها وهو حاسس بتعب كبير وماعينوش يقول الكلمة اعطيه يرقد ويرتاح ،ضربو على صدرو " اشرف...تي شوف ...البرتمان ضوو يشعل"
"باسم الله ، اسمع راو مانحبش تفذليك بالناس الاخرى ،تلقاك انت نسيتو الصباح "
ضربو على راسو " تي نحكي على البرتمان ايلي مقابلني "
وقتها عاد فاق سي اشرف خزر للبرتمان ايلي ضوو يشعل عكس العادة
"زعمة فمة كاري جديد "
"تلقاه الملاك ياعرفي يتفقد فيه "
"وكي يطلع جار ....والا جارة ....اوووو جو "
"لو يعرفو مخك هذا اش يلم من فساد ماكانوش العباد تبعوك "
"اووو ....تنساش تحكي مع عرفك راك " خزر للباب وضيق عينو ظاهر عزم على حاجة ، نوقز الباب وتبسم لاشرف "تو نشوفو " استنى شوية قبل ما يتحل الباب ......وقت تحل بان واحد طويل ، أبيض ،شعرو نوار ،ضعيف في الشوميزة ايلي لابسها ، عينيه تلمع والا يمكن راها هو وقتها تلمع وراء مراياتو ،لحظات تعدت وهوما يخزرلو لبعضهم قبل ما يتكلم زياد " يظهرلي قلقتك "
"لا لا ...لاباس"
"اه...انا جارك المقابل " شاورلو للباب المقابل "اسمي زياد "
بدنو الكل تهز وتنفض ، حس بساقيه معادش حاملتو ولا منجم ياقف عليهم ، حط يدو على الباب فماش ماتعاونو يشد روحو ، عينيه ماتحركتش من على وجه زياد .

❇♣✴🌸

حالتو كانت تشكك و تبهت ، سكوتو ووجهو ايلي ولى احمر خلى زياد يستغرب " خويا لاباس " حط يدو على ذراعو نيتو يطمن عليه

تشوكا من لمستو و ماعرفش شيقول "لا ...لاباس ...قتلي انت زياد جاري ...نتشرفو ...انا ابراهيم "

هز حاجبو " ابراهيم !؟ ...نتشرفو ...مرحبا بيك...عموما كان استحقيت حاجة انا هوني ...بالاخير جيران "

تبسم "يعيشك"

خزر لاشرف ايلي ماهزش عينو من عليه وسألو "انت تسكن معاه "

ضحك زياد وهو يبندر ظهر اشرف " اه....هذا اشرف ...صاحبي وزميلي في الخدمة ....اي على ذكر الخدمة ...شنوة تخدم انت "

"انا بروفيسور في الجامعة "جاوبو ببساطة

حل فمو ماردو ،بروفيسور وهو في ها العمر ؟ تي هاو اصغر منو "برو...بروفيسور...انت ...بروفيسور ؟! "

تبسم على الحالة ايلي ولى فيها "وي....علاه مستغرب والا موش باين عليا "

"صغير بارشااا الحق "