لبس الفاست متاعو وحط مصاصة في جيبو ،اكيد يستحقها كي يشتهى سيڨارو ،قام حسان ومعاه كريم وكاميليا
"هاه هاه ...كاميليا باش تجي معايا ليوم "
وساعت عين سمية ، فاش قام عليه يهز فيها معاه ، اما المعنية بالامر خزرت لحسان موش فاهمة وهو وضحلها من غير ما يخزرلها "انت باش تمشي مع الشاف وانا وكريم نتلهاو بالباقي "
وقفت سمية ونطرت الدوسي من فوق الطاولة ومشات ، بالطبيعة هو فهم علاش تصرفت هكا اما تلف وهو يحكي مع كاميليا
"هيا خلينا نمشاو "
هزت صاكها وتبعتو من غير ماتسأل علاش تبدل كل شي.... نرمالمون هي ستاجارة و حسان هو ايلي يتلهى بيها ، رجعت مخها لتالي ،ربما صارت حاجة والا عملت عملة خلاتو يستغنى عليها ،اما مالقات شي ،بالعكس كل ماكان يضغط عليها والا ينبزها تتحمل وتسكت ،ماهيش مستعدة تخسر فرصة انها تحقق ايلي حلمت بيه .
ركبت معاه في كرهبتو في الكرسي ايلي بجنبو ، شافتو يسوق مرتاح ويدو ع الفولون خفيفة ، اما موش كيف حسان طاير طيران ،وقت شافها ساكتة ولابدة و عرف من حالتها موش فاهمة شي خاصة التبديل ،حاول يبدل الجو
"فكرتك باهية بارشا انا نبداو من الطفلة متاع بلاغ الضياع "
"انجم نسألك " تجرأت اخيرا
هز حاجبو " اوه...بالطبيعة ...انا عرف ديمقراطي راني "
"شنوة حكاية ...كمال هذا...والقضية شنوة هي ...انا نجمت نفهم ايلي هو عندو صيلة بالبنات و قاعد يستغل فيهم ..اما فاش"
ضرب الفولون "ذكية ها طفلة...من شكون وارثتو اه" تبسمت تبسيمة صفراء،غير احكي برك ،استفسر بجدية
" ما كنتش اتبع فينا قبل؟! "
"لا بالعكس كنت مغرومة بيكم وبالاخبار ايلي تهبط هاكي علاه حبيت نكون معاكم ، نقلك حاجة وماتضحكش؟"
ضحك قبل كل شي" باهي قول "
"كنت متخيلتك راجل كبير وصعيب بارشا ...اما وقت ايلي ريتك لقيتك واحد شباب و طبيعتك موش كيف ماتصورت "
"تخيلتني شايب كبة و ديما كشاكشو طالعة و موش عاجبو شي ...." عمل روحو صعيب " بون انجم نكون هكا زادا راو "
متأكدة وبارشا انو ينجم يكون اكثر من هكا ، لانو حسب خبرتها في الدنيا كل واحد طبيعتو هادية كي يتغشش يولي عاصفة.
خذى نفس طويل قبل مايبدى "مالا بما انك كنت اتبع فينا اكيد تتفكر خبر الطفلة ايلي رمات روحها قدام كرهبة بعد ما هربت في بيت وتيل توا الحكاية عندها شهور "
"اه ..ايلي تخدم في رستورون "
"بالضبط..الطفلة وقتها كانت مع واحد من لبرا ...من غير مانقلك علاه كانت معاه ...الحكاية هاذي صارت بارشا مرات ومع بارشا بنات خاصة ايلي يخدمو في رستورونات كمال ....كمال ميلودي ...مالك رستورانات قد شعر الراس...وماشين ...وايلي خلاهم ماشين هوما البنات ...فهمت والا نفهمك "
أنت تقرأ
💚✴حارس روحــي✴💚 ( كرونيك باللهجة التونسية: مكتملة )
Losowe★الاسم : حارس روحــي ( my soul guardian ) ★النوع : كرونيك ، اجتماعي ، رومنسي ، تشويق ، اثارة ، عائلي ..." ★الكاتبة : ň🅾D🅰 ★عدد الفصول " 46 " ★سنة الانتاج " 2018 " ★القصة " ✴تتعدى سنين على الفراق وماتخلف كان الوحش و الذكريات المنسية 🌸، يرجع بعد مد...
