💚✴حارس روحــي✴💚 ( كرونيك باللهجة التونسية: مكتملة )

🌺❇القسم 12 ❇🌺

تغلي في الحليب وسارحة ، شنوة باش تعمل وشنوة باش تصرف ،دواء امها ،مصروفها ،مصروف الدار ، لازم تلقى خدمة في اقرب فرصة ...اما زعمة تلقى خدمة توالمها ، والا تضطر تقص ع الستاج وتتخلى على فرصة العمر باش تكون صحافية كيف ما تحلم ...فاض الحليب فيقها من سرحتها ، نحات الكسرونة و مسحت ايلي تبزع ،عبات كاس امها وحطت فيه شوية قرفة وهزت الطبق ،حطتو قدام امها "ايا فطور الصباح ."

خزرتلها امها وتبسيمة مالية فمها ، باين ليوم صبحت خير ببارشا "ليلي!"

"حبيبة ليلي!"

"علاش تبكي لبارح...انا تعبتك "

حلت فمها ،كيفاش سمعتها ،في بالها بكات بينها وبين روحها وبسكات  "انا بكيت !؟ اه...موش نبكي اما حلمت حلمة خايبة "

مدتلها تارتينة المعجون "وليت نحلم ونخلوض بارشا ...ممكن خاطر نتعب "

"ليلي"

" نعم  "

"انا نحبك بارشا " ضحكت كاميليا  وعنقتها باستها بوسة طويلة من خدها وحطت راسها عليها" وانا نحبك اكثر يا احلى وازين ام "

"برا اخدم "

"كمل فطورك الساعة وبعد نمشي "

فطرتها وغسلت الماعون ،بدلتلها حوايجها و باستها "ماتخرجش الا مانجي ، حليتلك التلفزة ،يجيك النوم ارقد باهي توا نقول لناجية تطل عليك ساعة ساعة والا تهزك بحذاها  "

تبسمتلها وشيعتها وهي تخرج من الباب ،لازمها توصل فيسع لبيرو زياد والا كي العادة باش تتنبز ع الروتار و يمشي في بالهم اكبر بخلية تخلقت ، عرضها واحد من السرفورية ايلي خدمت معاهم ،استغربت اول مرة
"شتعمل هوني"

مدلها ماصو " العرف قالي نمدلك فلوسك...ياخا صحيح معادش باش تخدم معانا !"

"فلوسي!؟" جاتها غريبة الحق ، البارح قالها مانمدلك حتى فرنك وليوم باعثلها ماصو فيها فلوسها"غريبة...ايه معادش باش نخدم "

"صارت حاجة !؟"

"لا ...اما انا معادش نحب نخدم ...معادش عليا بكري ..مرسي كي وصلتهملي ...ايا نخليك "

خلاتو و مشات لسكوتارها ،حطت الكاسك وبابيتلو وشدت الطريق .

وقت دخلت للبيرو تصدمت لقات زياد واقف مع معتز ، ما كانتش تستنى تراه فم ، قلبها  يضرب بقوة ، فرحانة اما زادا خايفة من انها تاقف قدامو  .

زياد قاعد ع الطاولة و معتز واقف مقابلو ،يحكاو ويضحكو ،مشات خطوات وصبحت عليهم  وزياد  صفر
"ايوا ...ايوا هاي جات...تعرف يا برهوم ايلي  انا و كاميليا ولينا المحقق كورومبو "

خزرلها معتز وعينيه فرحانة " كيفاش!؟ "

"هههه ولات المساعد متاعي ...وين عندي دبلاسمون تمشي معايا ...وذكية شي غريب"
حمارو خدودها وهو يشكر فيها قدامو ،من قلبها تقول نهار السعد ليوم ، خذيت فلوسي ، امي صبحت لاباس ومرتاحة ، عرفي يشكر فيها ، و الراجل ايلي قلبها يضعف قدامو واقف توا موش بعيد عليه ومالية عينيها منو