تزرب في مشيتها لعل يراها حد ويتكشف الملعوب الكل و هكاكا يمشي تعبهم الكل في الماء ، حست بيد تشدها وتدخلها لكلوار صغير ...جات باش تصيح من الرعبة ايلي كلتها لكن لقاتو حسان قدامها ،يكبس على مرفقها لين حستو تخدر بين يديه " يا طفلة فاش تعمل ...ياخا بساقيك ماشية للهاوية ...رامية روحك طول هكاكا ، كان جراتلك حاجة والا شلقو بيك بعثناك باش تدخل بيناتهم موش باش اتبع نجيب "
توجعت من شدة ايدو خلاتو يبعدها عليها ، تلمست البلاصة الحمراء من الضغط والكبسان " هوما مايحكاو شي لداخل ...المهم وايلي يهمنا اكثر نجيب والبنات ...انا نجمت نصور كل شي قالو ووجهو واضح ع الاخير اذا واجهناه بالفيديو ماينجمش ينكر "
"باهي تحرك ايجا معايا " كركرها وراه
دارت قدامو وشدتو من ذراعو كبست عليها" استنى مازالت حاجة صغيرة "
ركز فيلي باش تقولو " لازم تجيبلي الدواء متاع زياد ايلي يستعملو باش يرقد وقت توجعو معدتو "
"المنوم !؟ "
"ايه هو "
"وعلاش شنوة مخممة تعمل "
"في الحكاية هاذي موش داخلين فيها الرجال ايلي يبيعولهم في البنات ...اذا فضحنا كمال ضروووري نفضحوهم معاهم وانا لقيت فرصة باش انجمو نعملو هذا الكل "
"قلي شنوة بالضبط باش تعمل "
بلعت ريقها وخزرتلو بعين تترجى فيه " امان لازم تاثق فيا وفيلي باش نعملو ...خلينا مانضيعوش الوقت ..تو نحكيلك كل شي من بعد "
"باهي "
قالها وهو موش مقتنع ..في داخلو صوت يقلو لا ماتخليهاش وحدها هزها معاك... وصوت ضدو يقلو طلبت ثقتك وانت لازم تعطيها .
★*****★
انواع الماكلة الهاي والشرب متاع الناس الاثرياء تنجم تلقاهم على طاولة فيها اربعة رجال ، كوستيماي من اضخم ماتلقى و الوجه ضاوي من العز والعيشة الهانية ، هوما يدللو و السرفورية يجيبو ويحطو ، دلال ملوك اصل ، قرب منهم واحد وفي يدو كاميرا صغيرة " عسلامة ، انا مصور وماذبيا ناخولكم تصاور في ها المناسبة الناس ماذبيها تراكم "
خزرو لبعضهم لها الاقتراح ،ايه شبيه خلي يصور بالاخير هوما ناس من اعيان البلاد ورجال اعمال كبار ديما يحكاو عليهم ، خلوه يصورهم بارشا تصاور وفي كل مرة يعطو رايهم في فسخ هاذي في عاود هاذي في ريڨل هاذي في ماتخطفش هاذي من الاخير ايلي حبوه هوما قعد وايلي ماحبوهوش تنحى بسهولة .
في طاولة بعيدة عليهم اما تخلي ايلي قاعدين فيها يراووهم مليح ، وشوشت سمية في وذن زياد " اشرف صدق روحو ع الاخير تفرج كيفاش ييصور فيهم ويعاود "
تبسم " اشرف جاب روحو لازمني نزودلو البريم "
سمعو خالد " بربي وانا ماعنديش زيادة "
أنت تقرأ
💚✴حارس روحــي✴💚 ( كرونيك باللهجة التونسية: مكتملة )
Acak★الاسم : حارس روحــي ( my soul guardian ) ★النوع : كرونيك ، اجتماعي ، رومنسي ، تشويق ، اثارة ، عائلي ..." ★الكاتبة : ň🅾D🅰 ★عدد الفصول " 46 " ★سنة الانتاج " 2018 " ★القصة " ✴تتعدى سنين على الفراق وماتخلف كان الوحش و الذكريات المنسية 🌸، يرجع بعد مد...
