💚✴حارس روحــي✴💚 ( كرونيك باللهجة التونسية: مكتملة )

🌸✴القسم 32 ✴🌸

صباح مزيان ، حس روحو خفيف طاير طيران ،غريبة موشس هكا ، بيروه تسكر و طاح كل شي في الماء...اما هو فرحان وصابح في فورمة ، خزر لروحو في المرايا قبل ما يخرج ،بوڨوص بارشا ، اكيد باش يعجبها ،حل الباب باش يخرج عرضو في العتبة  ماصو ابيض متوسط  ، حتى شي ماهو مكتوب عليه ، زعمة حد طيحو ؟!...اما كيفاش قدام بابو هذا اكيد يخصو هو ، جاء لبالو الماصو و  تصاور اكسيدون بوه المركبة  حلو بزربة  ،لقى تصاور ، والمرة هاذي يدو رعشت وقلبو غصرو ، عقد حواحبو وهو يرى في معتز و كاميليا في قهوة مع الاوراق ، في تصويرة اخرى يتمشاو جنب لجنب ، في اخرى قدام دارها باينة عينيهم تلمع فرحة ..

وين المشكل ...عادي ياخا موش يعرفو بعضهم طبيعي يراهم هكا ...لكن هو هكا  يكذب على روحو ، قاعد يتخنق بيهم ها التصاور ، لقى ورقة مطوية تكتب فيها بخط موش واضح " الصاحب والخو ....طلعو يحبو نفس الطفلة "
و مرسوم تحت الكلمات سمايل يبكي ...

طاحت من بين صوابعو وطاحو معاها التصاور... قعد ع القاعة و هو يربط الحكايات ببعضها  ،ابراهيم عندو طفلة يحبها وهو بيدو قالو باش يطلعها ... ها الطفلة كاميليا ،...شافهم قدام من مرة مع بعضهم وكذب ، حالاتو المتقلبة ، غشو وفرحتو ساعة ساعة ، شكو ايلي وراء الحالات هاذي باز فمة طفلة ، اما بعمرو ماتصور ولا تخيل قلبو يعشق طفلة عشقها صاحبو ، وهو ايلي يحكي ويعبر على حبو قدامو ، تاليفونو ينوقز ويعاود وهو موش هوني ، في عالم اخر ، عينو مابعدتش ع التصاور وعقلو مازال معلق معاهم الزوز .

                     ★***★

اشرف ...يطلب ويعاود خاطف تاليفونو ويدادي  ،ينوقز من الجهة الاخرى ومايهزش " هز يا زياد هززززز "

نفخ بقلة صبر.. ساقيه  ترعش موش منجم  ياقف لحظة و يخمم كيما لازم ، يمشي ويجي  في الكلوار بين المرضى والفراملة المخلطين، كيفاش باش يوصل لزياد...خدم مخو وخمم .. لازمو يكلم ابراهيم لعل يلقاه معاه   ، لوج ع النومرو وطلب ...لكن  نفس الشي التاليفون ينوقز وهو مافماش، بعد ما مشات عليه كاميليا وخلاتو  في بلاصتو قعد يدور كي المهبول يمشي بلا نهاية ، قداش من ثنية عاود مشاها  من غير مايشعر ، حتى وقت تعدات الاسعاف هازة كاميليا كان هو يمشي على المادة متاع نفس الطريق ، رغم انو قلبو نبهو بمصيبة صايرة وقلبو مقبوض شي عجب ، ماجاش لبالو باش تصير حاجة للمرا ايلي يحبها ، وقت طلع النهار مازال هو يدور كي المهبول بلا عقل و ما يعرفش علاش يلوج بالضبط .

🌺✴🌺✴🌺✴

ساقيه ثقلت ، وعيى من المشي ، مستحق يعيط ويصيح بقوة ، علاش يصير معاه هكا ، شلق على تاليفونو في جيبو ايلي ماسكتش، دخل يدو وجبدو لقاه اشرف ، مايحبش يحكي مع حد و لا يسمع صوت حد ، اما بالكي زياد صارتلو حاجة والا فاش قام اشرف يطلبو "صباح الخير اشرف"

"الحمد  الله كي هزيت ، ابراهيم ضروري نحكي مع زياد"

"شفمة ...زياد ماهوش بحذايا "