💚✴حارس روحــي✴💚 ( كرونيك باللهجة التونسية: مكتملة )

🌸✴القسم 38✴🌸

حاسس بضيق نفس كبير ، قلبو باش ياقف من التوتر وهو يستنى في الجراح قدامو يكمل من اوراق الارشيف ايلي بين يديه ، علاش جاء لهوني ، بالضبط مايعرفش ، عندو امل صغير يلقى حاجة ترتحو ، شنية هي باقي موش عارف ، المهم اي حاجة تخص معتز وتخص الاكسيدون .

"الارشيف يقول ايلي العملية كانت ناجحة رغم وقتها ماكانتش حاجة ساهلة "

هذا الكل مايعنيهوش لذا حددلو شنوة يحب بالضبط "ايلي تبرعلي ،هو معتز "

"وي ، لانو كان صغير و الخلايا متاعو كانت خير وتناسب اكثر "

هاذي معلومة ممكن يعرفها قبل لكن توا وهو كبير فهمها اكثر ... باختصار  لو ماجاش هو مايعيشش

"وبعد...العمليىة...قصدي بعد ماتبرعلي توفى ....كان عارف ايلي هو باش يموت ، تبرعلي باش انا نعيش "

" يموت !؟ الاكسيدون ايلي صار وقتها مافيهوش وفيات "

وساعت عينو " ش...شنوة مافماش وفيات ، ايلي جاء معايا وتبرعلي توفى ....امان ركز ...ممكن ماماتش في اول نهار ...اما انا ريت قبرو بعينيا..زيد ثبت "

"لا لا ...اكيد فمة سوء تفاهم ..." مدلو الورقة ايلي يقرئ منها " تفرج هذا الارشيف ، جيتو تلاثة ، انت وهو ووايلي يسوق في الكرهبة ايلي ضربتكم ، الزوز كانت اصابتهم اقل خطورة منك ، وانت كنت في غيبوبة ، والوليد ايلي خذينا منو النقي ، لاباس ، شوية رضوض اكاهاو اما ماماتش"

قاعد يثبت ويعاود في وجه الجراح ، شنوة معناها ها الكلام ، معتز مازال عايش، ....حط يدو على صدرو وضغط ،حس بالنفس تقطع عليه ، تفجع عليه الطببب
"مسيو لاباس "

استوى في قعدتو من بعد قام من الكرسي ، حتى كلمة السلام والا نخليك والا مرسي ماقالهاش ، خرج يكركر في ساقيه موش عارف وين باش تهزو...معتز عايش، الخوه والصاحب عايش ....تبسم موش مصدق ، حط يدو على راسو،دار كي المجنون نص دورة ، عدى يدو على لحيتو وشدو كريز ضحك " معتز....عايش ،عاااايش"

فرد وقت كان يقهقه و دموعو هابطة ايلي يتعدى بجنبو يقعد يضحك عليه والا خايف منو يقلك هذا موش في عقلو .

✴✴✴✴✴

يمشي ويجي والتاليفون مايسكتش عندو ، يطلب ويعاود فماش مايلقى خبر عليه ، عمل حالة وماخلى حد ماسخسخهوش لا فراملة ولا طبة ولاحتى اصحابو ايلي حد ماراه منهم " كيفاش مريض مازال تحت المراقبة متاعكم يخرج من غير مايشلق بيه حد ، اذا صارت حاجة لولدي اقسم بالله لا نرحم حد "

مع دخولو ، جرالو ملهوف وفرد الوقت على اعصابو " شنوة هذا ايلي عملتو ؟! شنوة ها الاستهتار ،شنوة ها قلة النضج هاذي"

جامد ويخزرلو بعين ظلمة وموش سامع منو شي  وشكري عاونو يقعد "ايجا ، امشي معايا ، ياخا ماجاش لبالك الغرز يتحلو !؟ "