💚✴حارس روحــي✴💚 ( كرونيك باللهجة التونسية: مكتملة )

🌺✴القسم 40 ✴🌺

كيف كل ليلة ترقد وهو معاها وقت تقوم تلقاه مافماش ، متأكدة باش يرجع وباش تشوف وجهو قبل النوم وهاكي احلى حاجة في حياتها قاعدة تصير ، ليوم بالذات ناشطة و خفيفة وموش حاسة بحتى جرح كيف الريشة اصل , وقت وصل حسان وشاف وجها منور والفم يضحك ،عرف فمة تطور في حكايتها " شفمة ! ؟ زياد رقاك وليت النائب متاعو و طير اشرف "

" اوووو ....ماتفكرنيش فيه زياد ...متغششة عليه قد صبري في الدنيا "

"وعلاه الغش "

"علاه ؟ وصلت للموت وهو ما نجمش حتى ياقف عليا درج  وبرا كان جاء زارني وقعد معايا ، بالاخير عرفي ولازمو يطل عليا ،شنوة الحاجة ايلي تخليه مايطلش  ، لها الدرجة انا مانيش مهمة بالنسبة ليه ، الساعة كانت بيناتنا حاجات حلوة ، كنا اصحاب قراب بارشا ونحكو بايلي في قلوبنا وننصحو بعضنا ونخففو  على بعضنا .... اما ...اوووف... زياد من سابع مستحيل انا نوصل للموت وما يجينيش ساعات نقول فمة حكاية والا هو بيه حاجة  "

"زياد زارك وقت انت في البلوك ، ومن بعد صارتلو مشكل في معدتو تلزو يعملولو عملية "

"بالرسمي !؟ وعلاش ماقتليش ، يا مسكين وتوا لاباس"

"لاباس ، عملية صغيرة وبسيطة ع القرح ماتخوفش"

نحات الملحفة " لازمني نطل عليه ،خنمشي تشوفو "

"استنى ماعندك وين ماشية ، اصلا زياد كان قاصد مايجيكش" تلهف وهو يشد ذراعها

بهتت من كلامو  " بجدك تحكي "

حاول يوضحلها "هو يعمل هكا خاطر صاحبو ، خاطر يعرف ابراهيم يحبك ، و هنا هنا باش عرف ، الحكاية ماكانتش ساهلة عليه "

"ايه وين المشكل اذا  ابراهيم يحبني وانا زادا نحبو مافمة حد مايعرفش ها الحقيقة ، قد ماحاولنا انا وياه نخبو بالاخير الحب حاجة ماتتخباش"

"افكتيفمون ....الحب حاجة ماتتخباش ...بالضبط في حالة عرفك "

"مافهمتكش" 

"معناها زياد...حاسبك حاجة اخرى ، مشاعرو ناحيتك ، شي اخر ،يعني هو يحبك "

رمشت عينيها موش مهضمة ايلي قالو وبالاحرى موش منجمة تصدق وتستو عب "شنوة معناها !؟ ....يعني الاصحاب حبو نفس الطفلة ! العشرة ايلي بيناتهم والمحبة والقدر ! الكل يتحطم بسبب طفلة !؟ زياد ! ....بالحق عقلي موش منجم يستوعب ! حسان قلي انت تفذلك ! قلي ايلي زياد بعمرو ماخزرلي كطفلة ينجم يحبها ويعشقها !؟ لا امان ....و سمية ! لا مستحيل !؟ " هزت شعرها ايلي طاح على وجها " اما انا نحب معتز ....ابراهيم "

"شنوة ؟! "

غمضت عينها ياربي العقل قداش منو ملا غلطة " شي انا نخضرت "

"هاذي المرة الثانية تجبد اسم صاحب زياد المتوفي وزيد وين تجبد ابراهيم ، كاميليا شنوة مخبية !؟ تعرف حاجة ،شنوة علاقة ابراهيم بمعتز !؟ هو قريبو موش هكا ! يطلعش خوه "