🌺 كَــــحْـٰلة آلــعْــيــون 👀🌺( مكتملة )

الجزء:66

🌸 شهد : باغا وقت اماما وقت باش نفكر ..

نادية : لي بغيتي مهيم دابا ماتأثريش بزاف على راسك فكري بلي راك حاملة وهادشي كامل كيدوز للوليد ولا البنوتة لي غايجيونا فالطريق ..

شهد : ( بابتسامة ذابلة ) انا غانوض لبيتي ..

مشات خلات واليديها كيتنهدو من موراها ..

ادريس : الى عرف كريم كوني اكيدة غاتكون نهاية خالد على يدو ..

نادية : ولد الحرام لا هو لا مو لعبو على بنتنا وخلاوها توهم واها مكتولدش

ادريس : ماتخافيش كاملين غايتعاقبو واحد بواحد كاين شي حاجة سميتها القانون فبلادنا واول حاجة غانبداو بيها هو داك الطبيب لي عاطي تشخيص خطأ بهدف الرشوة

🌸 دخلات لبيتها وسدات الباب وحطات عليه راسها كيف ديما كتمنى يكون هادشي كامل لي عاشتو فحياتها يكون حلم وبلي غايجي النهار ولي غاتفيق وتلقا راسها باقا ماتزوجات ماطلقات ماوالو وكأن داكشي داز بحالي دازو عليهوم قرون وقرون .. عاودات شافت فواحد التصويرة كانت نهار خدات الشهادة ديال الباكالوريا وشحال كانت فرحانة داك النهار كانو احلامها بسيطة بزاف انها تقبل فكلية الطب وانها تقرا مزيان وتخرج وطبعا مع مورور الايام وتلاحلام كانو كيتغيرو من قرايا لزواج لولادة تاوصلات لدابا نو احلامها منعرف زعما يكونو الاحلام نقارضو فقاموسها ولا كلمة احلام تبعثرو حروفها وتشتتو لدرجة ولا صعيب عليها تجمعهوم ..

🌸 كانو كلهوم على الطبلة ديال العشاء حتا نطق حاتم ..

حاتم : مرام ..

شافت فيه : غدا غاتكتبي كتابك ..

حياة : كيفاش غدا غاتكتبي كتابك ياك قلنا تالسيمانة الجاية ؟!

حاتم : لا تافقنا أنا وسي تاجدين صافي غدا غانكتبو كتابكوم ..

ناضت دينا من الطبلة بسرعة ومشات، تاشوية تبعها مراد خوهوم بقات غير احلام ومرام ..

احلام : ولكن ا

حاتم : مين كيقررو الكبار الغار كيسكتو ماغاتعرفوش مصلاحتنا كتر منا الاشاعات كيداولو وباش نسدو الفم هادا هو الحل لي كاين وزايدون مابقا للعرس والو من الاحسن يتسبق دابا ...

مرام : وسيف الدين شنو قال ؟

حاتم : اكيد غايكون وافق فسي تاجدين عارف شنو كيقول