💚✴حارس روحــي✴💚 ( كرونيك باللهجة التونسية: مكتملة )

💞✴القسم 43 ✴💞

الخبر كيف النار في الحشيش ، فيسع ماوصل للناس ،فيهم ايلي صدق وفيهم ايلي استغرب وفيهم ايلي كذب وفيهم زادا مافهم شي ، التاليفونات دارت بيناتهم والكل حضرو في الوقت ايلي تفاهمو عليه وفي نفس البلاصة ، حكاية كي هكا لازمهم يكونو يد و حدة مع بعضهم ، المفاجأة في الحكاية هي انو سمية واول مارات الخبر ، طول كلمت وفاء واشرف تستفسر وتحاول تفهم اش صار في غيابها ، حكاولها كل شي مانجمتش تقعد بعيدة وتتفرج ، الوقت كي هكا لازمها تكون قد مقامها و تملى بلاصتها وتعمل ايلي عليها ، لذا ماوقفتش توا مع اصحابها مالازمهاش تسميهم اصحاب وعايلة مرة اخرى . دارو على الطاولة وين كانو يتلمو يناقشو التقارير و يحكو ويفذلكو وينبرو على بعضهم ، رغم انو البيرو حابس والمعدات محجوزة الا انو لمتهم مرة اخرى اثبتت انو ماهمش اي صحافيين وموش باش يسلمو .

تلفتو للداخلين ،صاحو فرد وقت " كاميليا !؟ "

تبسمت وهي شادة في يد حسان " حبيتو تتلمو من غيري "

جراتلها سمية وعنقتها ، هكا من غير ماتعرف علاش، حبت تعنقها واكاهاو " الحمد الله على سلامتك "

ضحكت كاميليا وهي تضمها تقلقت عليك وقت غبرت وريحتك مافماش "

"تو نحكيلك....المهم انت توا لاباس، كيفاش خلوك خرجت "

خزرت لحسان " من فوائد الخو الكبير انو ينجم يحلك الف مشكلة ومشكلة "

جابولها كرسي وقعدوها وتلمو بيها الكل كل واحد يسأل ويطمن ونساو علاش تلمو اصل " يعيشكم الكل ، وقفتو معايا وقفة ماننساهاش ، كنتو عايلتي ايلي تحرمت منها "

اشرف" انت غالية علينا ، كل حد في الڨروب غالي بارشا ، احنا عايلة وحدة وتلمنا هوني باش نثبتو ها الحكاية "

وفاء" لازمنا نحلو ها المشكلة " شاورت للتصاور متاعهم الهابطة في الباجات الكل .

كريم " نهبطو تكذيب و نبينولهم كل شي بالحجة وايلي هذا تشويه سمعة ووراها كمال "

اشرف " الناس توا ولات تكرهنا والتكذيب موش باش يعمل شي ، و كمال توا حاصرنا في تركينة موش مخلينا نعملو شي "

حسان " من رايي وقيت باش نهبطو الفيديوات ، حتى كان الجريدة مسكرة "

كاميليا " هكاكا باش نوحلو في بارشا مشاكل "

كريم " ديجا احنا في مشكلة ايلي جاي موش باش يكون اعظم من هكا "

كريم الخواف يقول هكا ، موش مستوعبين ايلي سمعوه
كريم " ماتخزروليش هكا ، انتوما كنتو ديما يد وحدة وعلمتوني ها القوة ، الجريدة متاعنا الكل موش هكا ، لازم الكل ندافعو عليها ، وزيد توا ولات حرب بينا وبين كمال ، وهو موش غريم ساهل ،هاكي علاه لازم نبينولو ايلي احنا ماناش باش نتراجعو "