العميلة 306 (باللهجة جزائرية )

الحلقة 15 بارت 2

إياد؛ تعرف اللي كون نديو هاذ المشروع نكون درنا أكبر صفقة فتاريخ الشركة !!
-وي مسيو منار .. المناجير تاعها اتصلت و قالت اللي هي غدوة بش تجي عندنا فاجتماع
إياد؛ خبر منار لازم يكون فالاجتماع خاطر غدوة انا نتأخر مي نلحق .. هو يبداه
-أوكي مسيو
إياد؛ مبعد نعيطلوا نأكد عليه ..
..................................
قاعدة ندور فالقصر ...و نعدي عينيا على كل شبر فيه ..صعيبة انو الواحد يبني هاذ الشي الكل و مبعد يتوفا و يخلي  كل شي ..ترميت عالفوتاي .. جابتلي الخدامة كاس كوكتال .. رشفت منو .. و نضت خرجت للجاردان نتمشى فيها .. المهمة أصعب .. مي انا قررت دوكا حاجة ما تهبطني .. حتى نلوحهم فالحبس يرشاو مع خدايمهم .. منعرف كيفاه نواجه منار .. منعرف اذا إياد عرفني .. رغم انو تبدلت مي غزرتوا تاع عرفني و ما عرفنيش .. مزية الساقط تاع باباه مناضش .. غدوة بش نبدا مرحلة جديدة من انتقامي .. و نحط الكل على صباعتيا ...
....................................الصباح..
وصال؛ منار لازم نحكيو .. لوكتاه باش تبقا تتفادى فيا رايحين نتزوجو
باقي يشوف مع الدوسي فيدو ..و يرشف من القهوة ..
وصال؛ منااار تسمع فيا نتا!!!
منار؛ دوكا نتي جاية عالصباح تكسريلي فراسي .. اخرجي من مخي و صبحي كي العباد ..
غزرتلوا ندرا كيف .. و قدمت قعدت على حرف البيرو مقابلتوا .. فكت الدوسي من يدو .. طلع راسو ڨحرلها .. حطت يدها على خدو تعدي فيها على لحيتوا ..
وصال؛ منار عيشك حبيبي افهم حنا مخطوبين .. نحبك منار افهم
منار؛ هيه المطلوب ؟
وصال؛ حوس .. عيط .. سقسي .. وقت تشوفني تقول شفت جن .. مش كنا اونكوپل عامين .. و انتا تقدمت عند پاپا .. وش صرالك دوكا ..
نطر يدها منو و وقف .. جا وجهوا مع وجهها
منار؛ نكره ****** الهدرة عالصباح .. و جايتني نتي .. ناقص ********* فحياتي أنا ..
خرج طربق الباب.. تعدا عالسكرتيرة ..
منار؛ الغيلي كل اجتماعاتي ليوم
و تلفت
السكرتيرة؛ اما مسيو منار اجتماع اليوم مهم و مسيو إياد
تلفت ڨحرلها سكتت .. وخرج ..
..........................................
قدم الشوفور حللها الباب .. نزلت من الطوموبيل .. هزت خصلات شعرها رجعتهم لورا .. لابسة روب روج علا لاطاي .. مع طالون نواغ و فاست كلاسيك نواغ و بوشات نواغ .. شعرها عملتوا كيرلي ملتحت .. مع روج أحمر .. طلعت راسها تقرا فاسم الشركة .. تبسمت على جنب
ريان؛ مجموعة الهاشمي للإنشاءات .. ليوم نبداو اللعب على طريقة المال ...
لحقتها الماناجير تاعها بالوقت
ياسمين؛ دوموزال ندخلوا ؟
ريان؛ ممم ديجا متأخرين
دخلت للشركة .. كل خطوة تخلي الناس يشوفوا معاها .. قدمت الماناجير تاعها تسقسي السكرتيرة ..
السكرتيرة؛ تفضلوا معايا
في قلبها : أحسن شي جاو و الا معرف كيفاه كنت نواجه مرا بالشخصية هاذي ..
........في نفس الوقت فغرفة الاجتماعات ...
منار؛ دوكا مرجعني و فاللخر السندريلا متأخرة نص ساعة
إياد؛ مناار ..
منار؛ متساعدنيش الخدمة هكا إياد ..
تحل الباب ..
السكرتيرة؛ الضيفة وصلت ..
وقف إياد
إياد؛ تقدر تتفضل
دخلت الماناجير ..و دخلت وراها ..  طلعت راسي غزرتلهم في زوج .. حسيت بيهم كي تفآجأو ... وجه منار ميتفسرش .. مزال بش يزيدو يتفآجأوا .. هذا وين بديت ..
قدمت عندهم .. مد يدو إياد .. غزرتوا مش مفهومة .. تاع هي ولا خاطيها .. صافحتوا .. مع جات يدي على يدو .. تكهربت .. حابة نهز الفرد تفرغوا فيه نحرق جدو ..
إياد؛ مرحبا بيك دوموزال بن جاب الله
ريان؛ نظن طويل بزاف هكا .. هه تقدر تعيطلي ريان
رصيت عالاسم .. عينيه تحلوا .. كي سمع اسم ريان .. باقية نقرا فتفاصيل وجهوا .. قاطعني صوتو من ورا
منار؛ واش ديري هنا نتي !
#العميلة306
#يسرى_أمجوج