🌺 كَــــحْـٰلة آلــعْــيــون 👀🌺( مكتملة )

الجزء:70

🌸 طلعات لدار دخلات وهي تلقا مها واقفة جيهت الشرجم دارت بسرعة جايا لعندها ..

نادية : واش هو هادا ؟
حركاتليها شهد راسها ..

نادية : ( تنهدات ) شنو قاليك ..

شهد : غانتزوجو غدا ( كلسات فالكنابي ) ..

نادية : ( ابتاسمات ) غدا فالصباح ؟ ..

حركاتليها راسها باه : ماما الصراحة ماعرفتش واش هادشي لي كنديرو صحيح ولا لا ..

كلسات نادية جنبها ودارت يديها على فخاضها : شهد سمعي ابنتي أنا عارفاك دابا باش كتحسي ولي داز عليك ماشي ساهل ( طلعاتليها وجها بيديها كتشوف فعويناتها المدمعين ) أنا ماماك ومن كرشي ولدتك وبهاد اليدين ربيتك ونتي قلبك بيض وانا عارفاه ماعمرو حقد على شي حد لدرجة خالد وانا عارفاك ماحاقداش عليه من الداخل وديما راسك كيدير مبررات لاي واحد دارليك شي حاجة، حيت نتي هاكا وهاكا تزاديتي كاتسامحي وعندك قلبك بيض، هاد الراجل لي قلتيلي عليه واخا تعياي تقولي تاهو كيحس بشي حاجة ليك والا مايجيش عندك تالفرانسا ويرجع يعاود يجي دابا واخا رفضتيه مامرة ما جوج وواخا يمكن كيقمعك ولكن كوني اكيدة بلي تاحد ماغاتلقايه كيفما بغيتيه فهاد الدنيا واي واحد فيه سلبيات الا وفيه اجابيات ونتي دابا ماعارفاش يمكن تلقاي فهاد الراجل لي ماكاينش فخالد ولي عمرك غاتلقايه فشي حد نتي ماعارفاش شنو مخبياليك الدنيا وتقدري تكوني ناوية غير تاتولدي وتبعدي عليه ولكن ربي يكون مكتبليك حاجة أخرى ( ضربات ليها على فخضها ) توقعي خير ابنتي وانا متأكدة ربي مايخيبكش وتلقاي مع هادا كل ماكاتمناي ...

ناضت مشات وبقات هي شحال كتشوف قدامها