رسالة من مجهول 📝💖

الحلقة ٢٥

الحلقة ٢٥
#رسالة_من_مجهول
#بوسى_مصطفى
_________________

قدام باب شقة راوية
كانت بتفتح الباب
مديحه : اخلصي ياراوية بتعملي ايه كل دا
راوية :"الباب مش عايز يتفتح
مديحه : اطلع انا يعني ولا ايه
راوية : استنى بس اهو اتفتح اهو
كانت أميرة بتفتح الباب من جوه
راوية : أميرة انتي لسه صاحيه
أميرة : كنت قاعدة مستنيه حضرتك
راوية : ادخلي يامديحه
مديحه : هدخل اعمل ايه
هاتي باسم علشان ينام
أميرة : باسم انا نيمته
اخدت راوية ب ايد مديحه ودخلت
راوية : جيتي ازاي يابنتي
أميرة : فادي جه معانا
راوية : ليه مين كان معاكي
أميرة : طنط نعمه
راوية : اه... طيب اعمليلنا حاجه نشربها
هتشربي ايه يامديحه عندنا قهوة شاي سحلب حلبه نسكافيه شوفي عايزة تشربي ايه؟
مديحه : ولا اي حاجه انا هطلع انام
أميرة : ماما هي طنط نوران قامت بالسلامة؟
راوية : الحمد لله... يابنتي قامت بالسلامة
أميرة : الحمد لله
تشربي ايه ياطنط
مديحه :"أي حاجه يااميرة
راوية :" ياست انتي متريحي البنت وقولي عايزة تشربي ايه
مديحه : قهوة بس مظبوطه يااميرة وفي كوباية ازاز
أميرة ببتسامة : حاضر
وحضرتك طبعا ياماما شاي
راوية : هههههههه طبعا طبعا
أميرة : من عنيه الاتنين
راوية :"تسلم عيونك يابنتي
دخلت أميرة المطبخ
راوية : م تفوكي كده ياست الكئيبه انتي
مديحه : غصب عني ياراوية
انا تعبانه ومحدش حاسس بيه
راوية : انا حاسه بيكي يا مديحه بس انتي اخترتي ده
وانا قولت قبل كده مش هتستحملي بس هقول ايه بقى نصيب
مديحه : انا كنت عارفه إن الموضوع صعب
بس مكونتش عارفه إنه صعب اوي كده
مش صعب وبس ياراوية دا مر علقم زي الدوا بالظبط
بناخده علشان نخف بس الحقيقه إن جواز اخوكي مكانش علاج بالنسبالي دا كان وجع قلب
ولسه لما يتلهي في النونو ومامت النونو
وينسي مديحه وينسي كل حاجه حلوه كانت بينا
راوية : جلال عمره م يتغير معاكي يامديحه
انتي عارفه بيحبك قد ايه
مديحه : عارفه إنه بيحبني بس الوضع اتغير ياراوية
هو لازم يحبهم ولازم يديهم اغلب وقته دا حقهم رغم إنه بيكسر قلبي
بس مقدرش اتكلم علشان الكل هيغلطني
جوايا حاجات كتير مش متلخبطه
مش عارفه إن كنت صح ولا غلط لما طلبت منه يتجوز
مش عارفه إن كان الحب اني احافظ عليه ويبقى ليه لوحدي
ولا مبقاش انانيه واسيبه يتجوز ويبقى أب
خايفه مع الوقت يبعد وفجأة يقرر يطلقني
انا بموت في اليوم ألف مرة ياراوية
لما بيبات عندي بقى عايزة اعاتبه واقوله بتسبني ليه وتروحلها
ولما بيبقى عندها مبنامش طول الليل.. نار بتبقى جوايا
اقولك ايه ولا ايه.. أنا عارفه إني بخسر جوزى بغيرتي دي
واني حطيت نفسي في اختبار صعب اوي.. وانا مش قادرة اتحمله
أميرة : قهوتك ياطنط
مديحه : تسلم ايدك يااميرة
أميرة : ماما الشاي علشان ميبردش
راوية : طيب يابنتي حطيه عندك
أميرة : هدخل انام بقى تصبحو على خير
ودخلت أميرة الغرفه
بتتصل بالتليفون 📞
زينه : روحتي فين يابنتي
أميرة : م انا قولتلك سمعت الباب بيتفتح فقفلت وروحت اشوف مين
لاقيت ماما ومرات خالي
زينه : اه... طيب.. المهم انتي كويسه
أميرة : م انا قولتلك عن احوالي يازينه
زينه : هتفضلي تاعبه نفسك ل امتى يااميرة
أميرة : مش ب ايدي
زينه : متعيطيش واسمعيني بقى
دي حياتك وانتي لازم تفكري تكمليها بالطريقه اللي تريحك
أميرة : المشكلة إن أي حل هيكون صعب بالنسبالي
زينة : علشان الحل اللي هيريحك هيتعب اهلك يااميرة خدي بالك
أميرة : وهو فين اصلا.. ماهو سافر وبعد خلاص
زينه : انتي ليه محسساني إن سيف دا
حد كده تعرفيه من زمان
مكانتش صدفه دي اللي جمعتك بيه
أميرة : انتي اللي بتقولي كده يازينه
يعني محبتيش هيثم
زينه سكتت
أميرة : في حد ممكن قلبك يحبه حتى لو اول مرة تشوفيه
وفي حد تاني لو عيشتي معاه سنين عمر قلبك دا ميحس بيه
زينه : تقصدي سيف ونبيل ابن خالك طبعا
أميرة : انا مبكرهوش بس بجد انا مش قادره احسه خالص
مفيش أي مشاعر ناحيته
مش قادرة اشوفه غير إنه ابن خالي وبس
وكله عمال يضغط عليه سواء بقى بكلام من تحت لتحت
أو لكلام بالأمر المباشر كده
دا حتى ماما كل شويه تلمحلي إن خالي كلمها عني وإن نبيل لسه ميأسش ومش عايز يخطب خالص!
وفادي بقى من امبارح وهو نازل زن علي دماغي وانا خلاص تعبت بجد مش عارفه اعمل ايه
زينه : متزعليش مني يااميرة ماما واخوكي مش لاقين سبب لرفضك ابن خالك
أو بمعنى أصح مش مقتنعين إن رفضك ليه بس علشان انتي شايفاه ابن خالك
ودي الحقيقه فعلاً رفضك لنبيل
بسبب إنك مش شايفه حد غير سيف
ودا اللي مخليهم عاملين عليكي الدايرة دي
أميرة : علشان أقع مش كده
زينه : مش بالظبط كده
بس هما خايفين عليكي
زي ما كل الاهالي بتخاف على ولادها
أميرة : بس انا خايفه اخد الخطوة دي ارجع اندم
زينه : بتفكري تتخطبي ل ابن خالك فعلا
أميرة : علشان اريحهم
زينه : غلط يااميرة التفكير دا
متاخديش قرار انتي مش مقتنعه بيه وخصوصاً في موضوع زي دا
دي حياتك ومستقبلك
وشريك عمرك مش حاجه سهله ياحبيبتي
أميرة : مش عارفه... مش عارفه
زينه : طب اهدي بس.. واقفلي دلوقت وادخلي نامي وريحي دماغك خالص من التفكير في المواضيع دي
والصبح نتكلم كده على رواقه تكون دماغك اتظبطت
أميرة : شكلي هاخد القرار واللي يحصل يحصل بقى
زينه : بقولك ايه يااميرة روحي نامي ياحبيبتي
وفضي دماغك دي بقي
أميرة : نفسي استريح
زينه : لو عرفتي انتي عايزة ايه
صدقيني هتستريحي... سلام بقى
أميرة : مع السلامة
__________