: أيوا يا فندم الشُحنه هتوصل في أسرع وقت ان شاء الله ولو في اي تلفيات احنا متحملنها، تمام يا فندم شكراً .مع السلامة
خلصت المكالمة وقفلت بصيت لأمجد زميلي اللي في المكتب اللي في وشي و قولت
:انا زهقت يا عم ايه اليوم ده كل العملاء رخمين النهاردة ولا ايه انا قرفت
ساعتها امجد رد عليه
: ما تروق يا عم شادي هنعمل ايه الناس مش فاهم مالها النهارده انا واحد لسه مكلمني النهارده عايز يرجع الشاحنة عشان جتله متأخر ساعة كنت عايز اقوله أحمد ربنا في غيرك بتجيله بعد يوم واتنين
فضلنا نضحك لغاية ما قطع ضحكنا مكالمة عند أمجد رد وخلصها بسرعه بعديها قالي..
: انا عندي ليك مفاجأة حلوة بعد الشغل مفاجأة هتنسيك قرف الشغل ده كله
قولتله : ياريت والله يا أمجد الواحد عايز يفصل من الضغط ده شوية بس اية هيه صح
قالي : لاء مش دلوقتي بعد الشغل هتعرف
قولت : تمام لما نشوف
كملت بقيت اليوم وسط مكالمات العملاء الكتير من شكاوي لطلبات لغيرها وغيرها لغاية لما في اخر اليوم كنت خلاص علي أخري مش قادر هموت من التعب
قابلت امجد قالي...
: جاهز يابني للمفاجأة هنروح مشوار كده
قولتله : انا تعبان أوي يا أمجد ماينفعش تأجلها لبكرا؟
رد امجد متعصب
: لأ طبعاً انت هتهزر يلا يا عم انجز احنا مش هنتأخر يلا
وقف شوية كدة وقولت
: طيب يلا بسرعة اما نشوف اخرتها
فضلت ماشي مع أمجد مش عارف موديني فين كل شوية أسأله
:يابني انت هتخطفني ولا ايه!!
يقول : يا عم امشي بس
دخلنا مكان عتيق جدا عمارات قديمة باين عليها انها من الاف السنين فضلت ماشي مستغرب، عقلي مش قادر يتخيل مفاجأة اية ال هنا دي ، لكنه فجأه وقف قدام عمارة منهم و قالي
:وصلنا
قولتله : اية يابني الخرابه اللي انت جيبني فيها دي يلا ياعم نروح الله يرضى عليك
رد امجد
:ميغركش المنظر تعالي ندخل بس وهفهمك والله هتتفاجئ..
دخلت معاه طلعنا الدور الاول المكان كان راقي جداً مختلف تماماً عن المنطقة ودي حاجة كانت غريبة فعلاً، موسيقه هادية شغاله..
اول ما دخلنا قابلنا شاب وسيم لابس بدله و قال
: أهلاً بيكم نورتوا المكان اول مرة ليكم معان؟
امجد رد
:ايوا انا سمعت انكم مكان حلو فقولت اجيب الاستاذ شادي معايا نجرب..
لاقيته بصلي و قال
: نورتنا يا استاذ شادي وان شاء الله الخدمة تنال اعجابك و تنورنا تاني اتفضلوا استريحوا عقبال ما واحده من الغرف تجهز...
قعدنا و ساعتها شديت أمجد وقولتله...
: اية يا عم المكان الجامد دا احنا جايين ليه؟!
ضحك امجد وقالي..
: انت لسة مفهمتش يابني انا قولت اروق عليك بعد الشغل قولت نروح ساونا نستجم.
قولت ساعتها : والله فعلاً انا كنت محتاج حاجة زي كدة والله طلعت بتفهم يا أمجد مطعتش محاط بشلة متخلفة زي ما كنت متوقع
ضحك امجد وقال
: متقولش كدة يا شادي دا انت كبرنا و مثلنا الاعلي
ضحكنا وانا بخبط كفي علي كفه رجع الشاب تاني و قال
:الغرفة جاهزة يا فندم قومنا ومشينا ورا الشاب لغاية لما وصلنا لاوضة كبيرة مليانة اوض صغيره
اتكلم الساب وقال...
:دى اوضة تغير الملابس اتفضلوا غيروا هدومكم
وفعلاً داخلنا كل واحد في اوضه وبدأنا نغير لاقيت روب ابيض كان موجود في الاوضه لبسته و رجعنا للشاب خدنا و دخلنا باب تاني في نفس الاوضة طلعنا منه لاوضة اكبر كلها اوض مصفوفة جنب بعض و كل اوضة عليها رقم فضلنا ماشيين في الممر لغاية لما وصلنا لاوضة رقم ١٠ الشاب فتح الباب و قالنا :اتفضلوا الاوضه جاهزة
الاوضه كانت كبيرة متقسمة ناحيتين ناحيه فيها حاجة شبه الكنبة خشب والناحية التانية كان موجود الجاكوزي البخار كان كثيف مكنتش عارف اشوف حاجة تاني
دخلنا وقال
:الجلسة مدتها ثلاث ساعات اتمني الخدمة تعجب حضرتكم..
و خرج وقفل الباب وراه..
دخلنا نزلنا في الجاكوزي يااااااه احساس استرخاء حلو اوي حسيت ان تعب اليوم كله راح فعلاً في الدقايق دي
لاقيت امجد بيقولي
: الموضوع فعلاً يستحق المشوار
بصتلة وقولت..
:من احسن افكارك علي فكرة
فضلنا في الجاكوزي اكتر من ربع ساعة بدأت احس ان الحرارة بتزيد،مفهمتش هو دا طبيعي يعني، طلعت من الجاكوزي وقاعدت علي الكنبه الخشب وسبت أمجد
الحراره زادت جسمي كان غرقان في العرق بصيت في ساعتي كان فاضل خمس دقائق لكني لحظت علي الحيطة اللي قدامي حاجة غريبه، ايه ده
كلام صغير اوي محفور في الحيطه انا شُفتة بس بسبب البخار اللي كان متكثف حواليه غير كدة صعب حد يشوفه
بدأت أقرأ......
"لو انت بتقرأ الكلام ده من جوا الاوضه حابب اقولك أن خلاص فات اوان قرأته انت خلاص دلوقتي بتواجه نفس المصير اللي وجهنا انا وامي لما جينا هنا ، سمعنا عن جمال المكان فقررنا نجرب اول ما وصلنا استقبلنا شاب وسيم كانت معاملته اكتر من رائعه معانا داخلنا اوضه غيرنا هدومنا و بعديها داخلنا اوضه رقم ١٠ المكان كان جميل لكننا بدأنا نلاحظ مع الوقت ان درجة الحرارة بتزيد بالتدريج والوقت بيعدي و الشاب مرجعش عدي اكتر من نص ساعة الجو بقة صعب اوي روحت ناحية الباب و قررت أخرج لكن الباب مكنش ليه اي اوكرة نهائي فضلت اخبط وارزع علي الباب
: افتحولنا الحرارة بتعلى افتحولنا
فضلت اخبط لكني سمعت من ورايه صوت حاجة بتترزع علي الارض بصيت لاقيت ماما مرميه علي الارض و جسمها كله لونه احمر من الحرارة حاولت افوقها لكنها مكنتش بتتنفس فضلت اصرخ واقول..
: افتحوا امي بتموت هنتخنق هنا افتحولنا
فضلت علي الحاله ده لمدة لحد لما مابقتش قادرة اخد نفسي، جسمي كله احمر بدأ تظهر فيه فقاعات في كل حته ، وقفت ورجعت للباب كان فيه شباك ازاز فضلت اضرب فيه بكل قوتي لغاية لما اتكسرت منه حته صغيرة وقعت علي الارض بصيت من الفتح و فضلت اصرخ لغاية لما صوتي راح لكن محدش كان موجود نمت علي الارض انا مش عارفه اعمل اية بصيت جنبي لاقيت قطعة الازاز اللي اتكسرت ختها و ساعتها قررت اني مش هموت الموته دي اذا كنت هموت فأموت بسرعة"
بعد ما خلصت الحكاية بصيت علي ساعتي لقتنا داخلين علي ساعة إلا ربع في المكان الجو بقى حر أوي جسمي سخن جدا لونه احمر بالكامل، فضلت انادي علي أمجد لكن ماكنش في رد، فضلت اكح جامد مكنتش قادر اخد نفسي لكني نديت علي امجد تاني البخار، مخليني مش عارف اشوفه..
قربت ناحية الجاكوزي لاقيته نايم في الماية لسه قربت منه وفضلت ازق فية لكنه ماكنش بيرد خالص ساعتها المية اتهزت جت عليا شوية مستحملتش سخونتها الماية كانت بتغلي حرفياً شديت أمجد برا الماية بسرعة و نايمته علي الارض لكن حالته كانت صعبة جداً
امجد كان جسمه كله متكرمش من شده الحروق لونه احمر دم، مفيش نفس واحد بيخرج منة عنيه مفتوحة علي أخرها، ساعتها بصتله و انا مش قادر انطق حتى دموعي بدأت تنزل غصب عني قفلتله عنيه وروحت علي الباب وبدأت اضرب واخبط فيه لكن الباب كان قوي فعلاً حاولت اكسر الشباك الازاز لكن الازاز سميك جداً فضلت احاول لكني بدأت احس اني خلاص بتخنق مش قادر اخد نفسي قاعدت في الأرض و ضهري مسنود علي الباب حاطيت دماغي مابين درعاتي بحاول اخد نفسي ساعتها عيني جت علي الساعة اللي لابسها جاتلي فكرة وقفت و قلعت الساعة مسكتها في أيدي و بدأت اكسر بيها الازاز و بعد ضربه و التانيه اتكسر حته كبيرة اقدر اطلع ايدي منها افتح الباب بدأت أخرج ايدي بس الفتحة كانت ضيقه لكنى كنت خلاص قربت من الاوكرة فضلت اخرج في دراعي اكتر بدأ الازاز يقطع في دراعي الم رهيب مكنتش قادر استحمله فضلت اصرخ من الوجع لحد لما مسكت الاوكره وفتحت الباب بدأت اشيل ايدي من الفتحة كنت بتنزف من كل حته الدم مغطيها و مغرق الارض كمان اول ما خرجتها وقعت علي الارض وفضلت اكح بكل قوة و بدأت اخد نفسي بالعافيه بعد شوية هديت حاولت اقوم لكن الحروق في كل جسمي مخلتنيش اقدر بدأت اسحف ناحيه الباب ، الاوض اللي حوالية علي الجانبين كانت مليانه وشوش كتيرة بتصرخ كله مكتبلهم المصير اللي هربت منة، كل لما حد كان يشوفني يفضل يصرخ و يستنجد بيه، مكنتش بسمعلهم اي صوت كأنهم مش موجودين كان نفسي اكون سبب في خروجهم من هنا لكني وقتها ماكنتش بفكر غير في نفسي وازاي هخرج من هنا
وصلت للأوضة تغيير الهدوم دخلت الاوضة اللي فيها هدومي لبست بعافية جسمي مكنتش مستحمل حاجة تلمسني نهائي قطعت الروب ولفيت بيها دراعي لاقيت عصاية مقشه في الجانب مسكتها و اتعكزت عليها عشان اعرف اقف وقفت علي باب الريسبشن وفضلت ابص ملقتش حد خالص المكان فاضي تماماً!!!!
طلعت و مشيت ناحية البوابه لكني وقفني صوت دوشه كتير جاي من اوضه في الجانب قربت منها بابه كان مقفول فبصيت من خرم الباب عشان القي سفره كبيرة عليها وليمه كبيرة فيها كل اللي تتخيله من لحوم و فراخ و غيره و غيره، من أصناف الأكل اشكال وألوان و مجموعة رجال قاعدين والشاب اللي استقبلنا في وسطهم بدأ يتكلم....
: يارب الواليمة النهاردة تنال اعجبكم و الاصناف الجديدة تكون علي مستوي رضاكم
رد الراجل اللي في الكرسي اللي جانب الشاب و هو بيقطع قطعة لحمة بالسكينة و بياكلها..
: وليمت النهاردة شكلها لذيذة لحمة النهاردة من انهي صنف ياترا طعمها مختلف
رد الشاب و هو بيضحك...
: النوع اللي حضرتك بتفضله لحم بنت بكر اكيد منستش نصيب حضرتك...
رد الراجل و هو في منتهى السعادة
:خلاص انا هاخد كل اللي عندك و هكتبلك شيك بالمبلغ و ياريت لما يجيلك حاجة زي كدة تاني ياريت تبلغني
الشاب : طبعاً طبعاً احنا بنحرص علي توفير اجود انواع اللحوم البشرية مع أعداده بأفضل الطرق لزيادة جودة اللحم هنفضل دائماً عند حسن ظنكم متقلقش يا فندم
سلموا علي بعض ،الراجل طلع دفتر من جيب بدلته و كتبله الشيك وادهوله وبدأ يجي ناحية الباب
بدأت اتحرك بسرعة عشان اهرب قبل ما يكتشفوني مكنتش قادر أجري جسمي مليان حروق بدأت اتعجز علي العصاية وأحاول أخرج بسرعة لكن الباب اتفتح من وراية والراجل شافني لكني موقفتش اتحملت علي نفسي و فضلت أجري أجري لحد لما وقعت قدام صيدلية قريبه من بيتى الدنيا تلف من حواليه كُل اللي شوفتة ان في ناس كتير بتجري عليه و بعدها محستش بأي حاجة، فوقت بعديها في الصيدليه والناس ملمومين علية الرؤيه مكانتش واضحه قفلت عيني و بدأت افتح عيني واحدة واحدة لاقيت درعاتي ورجلية كُلهم ملفوفين شاش وايدي الشمال مليانة شاش وقطن في كل مكان الدكتور اول ما شفني فوقت زعق في الناس وقال
: متشكرين يا جماعة هو خلاص بقة زي الفل شكراً تعبناكم
وبدأت الناس تخرج من الصيدلية ساعتها الدكتور قربلي وقالي
: انت كويس حاسس بحاجة
قولتلة:انا تمام يا دكتور الحمد الله
رد الدكتور: اية اللي حصلك اية كُل الحروق دي اللي في كل جسمك وايدك الشمال اية اللي جرحها بالشكل ده
سكت شوية وقولت للدكتور
: مفيش يا دكتور اصل حصلي حادثه يا دكتور هو انا حالتي خطيرة ولا اية قولي
الدكتور: لأ متقلقش كُلها حروق سطحية هتروح انت بس خد الكريمات دي أدهن بيها جسمك وأسبوع ولا اتنين بالكتير و هتبقي تمام..
قولتله وانا بقوم من مكاني.
: شكراً جداً يا دكتور معلش تعبتكم معايا
بكام الدواء و الحاجات دي
الدكتور و هو بيضحك
: يا عم خلاص مفيش حاجة احنا جيران ابقي طمنا عليك بس
شكرت الدكتور جداً و طلعت بيتي الساعة كانت داخله على١١ بليل..
كلمت مديري في الشغل وقولتله اني حصلي حادثة ومش هعرف اجي و هو اتفهم الموضوع جداً
دخلت انام بس الموضوع كان صعب اوي جسمي كلة مليان حروق مكنتش عارف انام ، بصعوبة قدرت انام بعد مدة حلمت بأمجد جالي و جسمة كله متفحم و فضل يصرخ فيه سبتني اموت ليه ليه يا جبان يا جبان .....
صحيت ساعتها علي خبط علي باب البيت روحت اشوف مين ، فتحت الباب ملاقتش حد ، لاقيت طرد محطوط علي عتبت البيت خدت الطرد و قفلت الباب ،قاعدت علي السفرة و بدأت افتحه كانت طالع منه ريحه شهيه جداً فاكيت اللفه لاقيت طبق متغلف بورق فويل شيلت الفويل لاقيت قطعة لحمة كبيره جانبها شوية رز بسمتي و مكتوب علي الطبق في الجانب
( اتمني الوجبة تنال علي اعجابك بالهناء والشفاء)
امجد
اول ماشفت اسم أمجد وقفت مكاني قولت
:دي لحمه اية، يانهار اسود، امجد
اتنفضت لورا بسرعة بعيد عن الطبق
لكني حاسس بجوع رهيب من اول ما شميت ريحة اللحمه دي مكنتش قادر ابعد عيني عنها ريقي ابدتي يسيل، جوع مش طبيعي اول مرة احسه!!!!
قربت ناحية الطبق و بدأت اكل بنهم الأكل ، طعمة لذيذ جداً عمري ما اكلت لحمة بالطعم ده فضلت اكل لغاية لما خلصت الطبق كله بعديها شُفت كلام محفور علي الطبق ماكنش باين الاول بسبب الاكل
(لو الاكل عجبك اتمني تنورنى تاني وهنضمن ليك اننا هنوفر ليك صنفك المفضل اهلاً بيك معانا)الخادم
تمت او يتبع لم اقرر بعد...
