ارواح لاجئة (مكتملة)

الجزء الرابع والثلاثون

ارواح لاجئه
بقلم // الفهدة السوداء
البارت الرابع والثلاثون

مرت ايام على وفاة بيبيتي
امي تقبلت الامر بصعوبه
هواي نشوفها حزينه
صافنه
مرات اسمعها تندب نفسها
وامها
بصوت يكاد يكون همس
من نقترب منها
تسكت
ماتحب تحجي بالموضوع بعد
*****************************************
اجه يوم الجمعه
و اجتي المشيه
وصارت الموافقه
بس يكون زواج اجوان ومحمد بعد شهرين من زواجه الاول
اهل محمد ما تقبلو اجوان
اعتقد راح تعاني وياهم
امي ما حطت اي شرط
عليهم
بس مارسيل ورا المشيه
بلغ لمحمد
بضرورة سكنهم ابيت منفصل عن اهله
قبل محمد بهالشرط
افضل حل للجميع
ممعقوله تسكن هي وضرتها واهله ابيت واحد

اتفقو عرسهم بعد ٤ اشهر
بلشنه رحله التجهيز
راح نتزوج كلنه بوقت واحد
فترات متقاربه
اول وحده راح تغادر البيت
اني
وراي رينا
ورانا اجوان

ورا المشيه باسبوع
تم عقد الشرعي الاسلامي
لاجوان ومحمد
وعقدو محكمه
وفاجئونه
بكارثه محد متوقعهه
تزوجو بالسر
بدون علم اهله
حجزو فندق بالجادريه
وتزوجو
و خلاص
ماعرف شلون
ومادري ليش
صدمه
غير متوقعه
هو فعلا زوجها شرعآ وقانونآ
كل هذا علمود يكون زواجهم
هو الاول
علمود يحتفضون لنفسهم بالذكرى الاولى
بعلم الجميع امي عمو يوسف
مارسيل
ارسلان
كلهم التزمو جانب الصمت
محد تجرئ يتدخل
ورا هالزواج
بدت فترة حيل سيئة
هي فترة زواجه
من خطيبته
تعبت نفسيتة اجوان
صارت عدائية
وكرهت حته روحها

تعبتنه كلنه مانعرف شنوو تريد
محمد وصل مرحله
تخابرة تبجي
يجي للبيت يسكتها ويهدئها ويرجع لبيته
بس الاهم من كلشي
ما ندمت اجوان على اي شي سوته
من يجيها تشتعل سعاده و فرح و حب
اباوعلهم يكعدون بغرفه الخطار
يحجون هواي
اباوعله شلون يهتم لمشاعرهه
واحساسها
على الرغم من سالفه زواجه الفضيعه
بس متقبلين بعضهم بضروفهم
المهم عندهم اخذو بعضهم
تبجي و تزعل
يمسح دموعها يبوسها
مثل طفله يراضيها
يجيها يوميه العصر ساعه
ابد ما قطع هذي الزيارة
بس بيوم عرسه
واجاهه ثاني يوم من الصبح
لابس بنطرون وقميص
الحلاقه الجديده
العطر
عريس
انهارت وماقبلت تنزل اله
تبجي بصمت مطبق
صمت صارخ
صعد الها وهو بنفسه حاول وياهه وقنعها
وسكتها
ضلو ساعه بغرفتها
تالي نزل وراح لبيته
وهي ضلت بغرفتها لليل
نزلت مغسله ومبدله
مكياج
عطر
ماريان :: هاا وين رايحه

اجوان :: راح يجي محمد
نطلع نتعشى

حجيت بكلبي
الله يساعدك يامحمد على هالحرب
شلون راح تنسق امورك
شلون راح تعدل بينهن
شلون ايام مريره عالثنين

طلعو تعشو برة
ورجعو يضحكون ويشاقون
ضلو بالحديقه ربع ساعه
كاعدين
وراهه راح محمد ودخلت اجوان