أقْـنعَـة بَـشرِيــة

•• الفصل الثاني ••

خرج نبراس و شاهدة و طلعو للسيارة.. خرجو من تزنيت و شدو الطريق السريع.. بعد صمت طويل دار عندها نبراس و قال..
نبراس : بكيتي لبارح ؟
شاهدة : ' بدون متشوف فيه ' لواه نميت
نبراس : علامن كتكذبي عليا.. عقلتي على أول قضية خدينا ديال داك الي قتل صاحبتو بعدما اغتاصبها.. كيف شفتي الجثة ديالها مشيتي كتجري للطواليت و رديتي.. و النهار لاخر جيتي عينيك منفوخين.. 3 سنين دازت و تغيرو حوايج كثيرة.. لكن تأثرك بلي كيوقع مع الضحايا متغيرش
شاهدة : هذا الي قتل دوك الملائكة بلا رحمة.. منين يطيح فيديا كنتمنى منخويش سلاحي وسط راسو
نبراس : مامنحقناش نحققو العدالة بيدينا.. القانون غادي يعاقبو

دورات شاهدة وجها جهة النافذة و لزمات الصمت.. كتفكر فهاد القانون الي واش فعلا منصف لمثل هاد الضحايا.. أنك ترتاكب جريمة فحق شخص بحد ذاتها عمل شنيع.. و لكن تذبح طفلين لا حول و لا قوة ليهم بديك الطريقة.. كيدل على ان الجاني منعدم الإنسانية..
و حتى المؤبد و الإعدام قلال فيه.. هذا الى ماتحكم عليه بأقل.. و الي هو شيء ماشي مستبعد فهاد البلاد..
بعد ساعات من السياقة وصلو للمركز.. دخل كل من نبراس و شاهدة و توجهو مباشرة لغرفة الاجتماعات فين كاين باقي الفريق.. حلات الباب بان ليها صخر مترأس الطبلة.. و معاه عمر مراد و رانيا.. شاف صخر شاهدة و شار ليها للكرسي الي جنبو.. مشات جلسات حداه و بداو الإجتماع..

صخر : ' وجه سؤالو لنبراس ' تعقبتو الرصاصة ؟
نبراس : طريق مسدود.. السلاح الي تستعمل غير مرخص و ميمكنش نلقاوه فالبيانات
بقاو كيسول صخر على اي حاجة توصل ليها الفريق.. التشريح وقت الوفاة و صلة القضيتين بجوج.. و لحد الساعة مالقاو حتى خيط لشكون ممكن يدير هادشي و لا شنو هو الدافع.. انتابه صخر لشاهدة الي جرات الحاسوب عندها..
جبدات الهاتف ديالها و وصلاتو معاه.. طلعات صور آثار القدم الي خدات فدار الطفلين و بدات البحث.. الكل كان مراقبها و حتى واحد متكلم.. عارفين أنها مركزة و مغاديش تجاوبهم..
من مهارات شاهدة هي أنها " هاكر " متمكنة بحال الأم ديالها.. يمكن موهبة أو أنه بسبب اهتمامها بمجال المعلوميات من سن صغيرة فاش عرفات شنو كانت حرفة مها أسيل.. بعد دقائق و هي كطاپي بسرعة.. توقفات و شافت فصخر..
شاهدة : بغيت مذكرة اعتقال ' ابتاسمات بدون مرح ' لقيتووو

••• وقفات سيارة من نوع رانج روڤر كحلا جنب الطريق و خلفها سيارة أخرى ديال الشرطة.. هبطات شاهدة و من وراها نبراس.. هزات راسها شافت فالشركة الضخمة و الإسم الي عليها.. تلفتات عند نبراس و تمو داخلين..
طلعو فالمصعد للطابق الي فيه مكتب نائب المدير.. و هما متوجهين ليه حاولات السكرتيرة توقفهم.. دفعاتها شاهدة و دخلات.. نبراس وراها الشارة ديالهم و هي ترجع اللور..

كان چالس مرح فوق البيرو.. هاز سيجارة مبرومة يدويا كيبخ فيها و عينيه نايمين.. سمع الباب تحل بقوة و هو يهز راسو.. شاف فتاة طويلة ذات قوام ممشوق.. لابسة سروال ضيق مع طوپ قطني بيض.. ابتاسم و قال..
عصام : واش بدلو ليا السكرتيرة.. أخيرا تهنيت من ديك المبهلة
شاهدة : ' قربات ' قالت لينا مشغول.. باين فاش
عصام : شكون نتي ؟
شاهدة : ' وقفات قدام البيرو و خبطات الورقة ' أنا هي الي غتكون ضيف عندها هاد الأيام قبل المحاكمة ديالك.. و هادي مذكرة اعتقال باسمك اسي عصام
عصام : ' غوت بصوت عالي ' شنوووو !! آااش كتخربقي نتييي
شاهدة : نوووض تگعد و لا نوضك بطريقتي
عصام : ' وقف و بدا يشالي بيديه ' شكووون دخلك نتي.. فين هي هاد السكريتيرة اليوم نجري على جدبوها.. الي جا تخليه يدخل