السجينة رقم 327 | مكتملة

الجزء الرابع والثلاثون

بعد مرور مايقارب شهر،،..
فتحات عينيها ببطء ورجعات تلفتات نعسات على ظهرها كترمش فعينيها، مدات ايديها لشعرها كتلعب بيه وعينيها فالسقف، دورات وجهها وجلسات كتطل على واحد السليلة محطوطة فالأرض باللون الأزرق والأسود، كان وسطها وسادة كبيرة على قد السلة وفارغة، تنهدات بهدوء ورجعات لمكانها خشات وجهها فالوسادة وعنقات الوسادة الثانية بايديها،،..

بعد نصف ساعة فتحات عينيها وجلسات كتبعد الشعر من على وجهها، وقفات بالتثقال وتوجهات للحمام وبعدها لدريسينغ، خرجات منو وهي كتجمع شعرها على شعر ذيل حصان وهي لابسة كولون فالأسود مع تيشورط فنفس اللون وسبادري فالرمادي، نزلات للأسفل وتوجهات للمطبخ خدات عصير ليمون ونزلات للطابق السفلي أي الطابق تحت أرضي، توجهات للاصال دفعات الباب بايديها وكاس العصير فايديها اليسرى، بعدما نزعات الجبص قبل أسبوعين تقريباً ورجعات كتحركها بشكل طبيعي بدون ماتجهد عليها،،..

كتتمشى على الآلة والسماعات على وذنها، وبعد مرور كل عشر دقائق كتزيد من السرعة دام الوقت وهي فلاصال ساعة تقريبا وبعدها خرجات كتشرب فالما، حيث عندها ثلاجة صغيرة فلاصال فيها قنينات ماء، خرجات من لاصال وطلعات فالدرج متوجهة للطابق الأرضي، سمعات صوتهم كيهضرو وكيضحكو مجموعين، لقات عليهم السلام وصباح الخير وتوجهات لغرفتها، دخلات للدوش وخرجات ملوية ففوطة وفوطة على شعرها كتنشف فيه، دخلات لدريسينغ ولبسات دجينز لونو خفيف مع تريكو كم فالأسود ونشفات شعرها مزيان وجمعاتو على شكل كعكة مهملة بعض الشيء، خشات كلاكيط فرجليها ونزلات للأسفل، سمعات صوت نباح خفيف وهي تبتاسم نزلات وهي تحس بخيال صغير بجنب رجلها، نزلات عينيها وزادت وساعت ابتسامتها، نزلات مقفزة للأرض كتمرر ايديها على الكلب وهي كضحك، والكلب عاجبو الحال كيضور بين رجليها ويتمخشش بيناتهم، مدات ايديها وهزاتو لصدرها كتلعب معاه، كان كليب صغيور وفنيون فالأسود والبني،،..

ميلاء: بــييـر ،،

جلسات على الفوطوي مربعة رجيلاتها وبيير متكي على ايديها وهي كتمشط ليه فشعرو، كان لؤي جالس بجنبها وفايديه تيليكوموند كيغير فالإذاعات وسفيان وميسم كل مرة كيخرجو من المطبخ ويحطو فوق الطابلة الفطور بابتسامة، كملو وجلسو مجموعين على الفطور وميسم حطات صحن غارق شوية فيه الحليب لبيير، وهو غير شافو ونزل من على ايد ميلاء بهدوء، تحت من الطابلة وجلس فمكانو كيشرب فحليبو بهدوء،،..

ميسم: (بمرح) غانخرجو ليوم فالليل ياكو يـاکو ،،

شافو فيها كاملين بطرف عينهم، وهي عنكشات ملامحها وجهها بطفولية وبدات كترطب فالهضرة معاهم وعينيها دمعو ،،..

ميسم: (بصوت خافت وهي كتحاول تترجاهم) عـافاکم سفيان ياک نتا كملتي المكتب ديالک وخاليونا نديرو حفلة بمناسبة الافتتاح عافاکم عافاکم ،، غير بيناتنا آش فيها گاع ،، (غيرات صوتها لصوت بنوتة صغيورة كتغبن عليهم) نتوما حايبين يـاالااه بـوو عليــکم متهضلونـيش ،،