كيف أحيا معك!
الحلقه 3
منقوله من صفحة رواياتنا
عماد & أريج
طلع عماد وكملنا هدرزة لا المغرب وبعدها جي عماد
عماد: أريج وتي روحك بنروحوا
أم عماد: بسم الله خيركم من توا قاعد بكري
سلمى: إيه حقا ع الأقل تعشو قبل ماتروحوا وبعدين قاعدين ماشبعناش منكم
عماد: من الصبح واقف ماقعمزتش ونايض بكري خلاص بنروحو
أم عماد: باهي علي راحتكم و غدوة تعالو بكري
عماد : يصير خير هيا أريج سقدينا
أريج: خلاص لبست و واتية هيا مع السلامة عمتي
ام عماد: بالسلامة
.
.
روحنا وخشيت للشقة غيرت دبشي وخليت المكياج ما مسحته و طلعت لقيت عماد ايتفرج علي برنامج اسمه أبشر يقدم فيه نيشان ومستضيف غادة عبدالرازق قعمزت نتفرج معاه وأحني قاعدين نتفرجوا
عماد: تفرجتي ع مسلسلها زهرة وأزواجها الخمسة؟
أريج : لالا مانحبهاش الممثله هذي
عماد: بالعكس حلوة وتمتيلها مش عادي خاصه مسلسلها الأخير الناس كلها تابعاته
أريج: اني الحق مانتفرج ع شي ف رمضان كله نحضر فيه بعدين لأني نحوس و انطيب لبوي و خوي ماعنديش وقت نحضر
عماد: إيه عندك حق مابعدكم النسوان تتعبوا فيه
أريج: حتى مع التعب بس حلو أني انحبه . . .شوف شن سألها ههه تعرف نيشان هذا مش ساهل كيف يطلع منهم في الدوة انحبه مذيعي المفضل ( تو نوريك غاده حلوة شن شكلها :-/ )
عماد : إيه لكن شن ايجي نيشان احدا وفاء الكيلاني ما تعدلش هاذيكا واتقول كلمتها
أريج : ممكن بس أني عندي نيشان ماكيفه حد كان قدم برنامج ظروري مانتابعه
عماد : إيه كل واحد شن ايحب أهو تم البرنامج أني بنوض نرقد خلاص النوم فيا
أريج : ماتبيش تتعشى؟
عماد: لالا ماخاطريش بنرقد توا تصبحي علي خير
ومشي عماد جيهة الدار التانية مش دار النوم!
.
.
قعدت قدام التلفزيون وانفكر هو ليش يتصرف معاي هكي وكانه مايبينيش ليش اتزوجني؟ اه ياربي مكتوبلي الشقا طول عمري خل انوض نرقد أحسنلي وكان غدوة قعد علي وضعه هذا ظروري مانكلمه
.
.
عند عماد
نسمع في باب دار النوم اتسكر عرفت ان أريج خشت رقدت فتحت نقالي ع الرسايل وقعدت نشوف في مسجاتي أني ودلال و نذكر في ال 5 شهور الي معاها لين نعسني النوم ورقدت
مانضتش إلا ع صوت اريج أتنوض فيا
أريج : عماد هيا سادك نوم نوض
عماد: نص ساعة و نوضيني
أريج: هذي تالت مرة اتقولي هكي
عماد: الساعة كم توا ؟؟؟
أريج : الساعة 11 ونص
عماد فتح عين وحده : مزال خاطري في النوم جسمي متكسر
أريج: ههههه كان اتشوف منظرك ايضحك ، المهم مش ماشيين متغذيين في حوش أهلك لأن العشية نبي نمشي ل أماليا
عماد: ديريلنا غذانا هنا والعشية نمشو لحوش هلك
أريج: باهي في حاجات ناقصه للغذي نوض خل انوصيك عليهم
عماد: غير خليني نرقد توا ولما انوض تو نديروا حل
أريج: باهي
.
.
اف وأمتى بينوض هذا أمس بلا عشي واليوم بلا فطور ومافيش حاجه في المطبخ نقدر ناكلها واك جيعاانة
.
.
بعد ساعة ناض عماد خذي دوش وطلع لقي أريج متكية ع الصالون
عماد : أريج رقدتي
أريج : لا نعست شوي شكلي بتطلع تجيب الحاجات توا؟ جيعانة بكل
عماد: اممم حتى أني انحس في روحي جيعان وتو كان بنجيب حاجات بعدها بتطيبي بتاخذي وقت نوضي ألبسي
أريج : وين؟
عماد: بنطلعو نتغذوا برا في مطعم فاتح جديد حلو
أريج : أووكي
.
.
عماد : ها شن رايك ؟
أريج : طيب ، بس انحس في روحي مش متريحة أول مرة ناكل ف مطعم وانحس في الناس تشوفلي
عماد: كولي براحتك وما اتعدلي ع حد
اريج: شن انوضوا؟
عماد: هيا ، نمشوا طول لأماليك ولا تبي الشقه؟
أريج : لا أرفعني طول مالياش يومين عنهم لكن استاحشتهم
ادهمنا لمحل خذينا حاجات ورفعني لأماليا قعدت عندهم لا الليل والساعة 11 جي عماد روح بيا . . خشيت الشقة ومشيت لداري لبست وطلقت شعري و حطيت مكياج خفيف وطلعت لعماد
أريج: شن درت من بكري ؟
عماد: تلاقيت مع واحد صاحبي كيف حال هلك؟
أريج : بخير ، جايين عمامي وتلاقيت معاهم غيرت جو
عماد: باهي كويس ؛ أني توا بنوض نرقد تصبحي علي خير
أريج : لحظة عماد نبي رقم سلمى أختك بنكلمها
عماد : هاك تلقيني امسجلها سلمى
.
.
خش عماد واني قعدت دي الصالة خذيت الرقم بعدها كسدت ع جهازه انقصقص خاطري نكتشف شخصيته شفت الصور بعدها خشيت ع الرسايل لقيت محادثه مع وحده امسجلها " dody" فتحت لقيت مسجات كلهم رومانسية وحب سكرتهم وقعدت مصدومة ونبي نبكي نضت بنخش لدار النوم وطلع عماد
عماد: تميتي من الرقم؟
أريج : إيه نقالك ع الطاوله أني بنرقد
عماد : تمام
وخشيت سكرت عليا و انحذفت ع السرير وقعدت نبكي وجعني خاطري والدنيا اضياقت بيا ليش ياربي ليش
.
.
خذيت النقال وخشيت . . مش عارف كيف عطيتهلها وفيه الرسايل انشألله ماشافتهمش بس! لا انحس فيها مش من النوع اللي ايقصقص اف شن هالمصيبه اللي جت فوق راسي
.
.
نضت تاني يوم غسلت وجهي ولقيت عيوني امنفخات من كتر مابكيت حاولت انكتر مكياج بيش ماينتبهش عماد بس انحس فيهم قاعدات واضحات طلعت لقيته قدامي وماخاطريش نشوفه كرهته قعدت نحاول عيني ماتجيش في عينه
عماد: أريج
أريج : نعم
عماد رفعلها راسها : خير عيونك هكي شن في باكية؟
أريج : لأ مش باكية في حاجات ناقصه كتبتهم في ورقة ع الطاوله تلقاهم خوذها وجيبهم توا نبيهم
عماد: مش جايب شي لين تقوليلي خيرك ! تعالي قعمزي
أريج بعصبية: سيب إيدي ومادخلكش فيا ولا خيرني و بلاش تدير روحك احنين عليا و لا حتى حاس بيا
و هنا انهارت أريج بالبكي . .
عماد : . . .
يتبع . .
