💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

🌺❄الحلقة 1 : القسم 2 ❄🌺

هذا الرجل ....أبيك 💜💚
🎆الحلقة الاولى : القسم 2 🎆

كل شي تخيلو الا الغولة هاكي تفك الكورة و تخلط عليهم ،عطى ماعندو في الجري ماعندوش حل اخر غير يهرب ،يجري ويتلفت وراه لين يطنبش في واحد ...هز راسو لفوق لقاه طفل في اخر العشرين والا اول التلاثين ،طويل ، شعرو شتان ولحيتو خفيفة ،عينيه خضر ، عرضلو يديه باش مايطيحش "سايس روحك...علاش ها الجري الكل "
بحكم للا تولين شادة جرتهم ،سي الشبيب الصغير ضرب خماساتو في سداساتو ويقلك خلت عليا لازم نتصرف " ياعمي ...فمة مرا خايبة ...فكتلنا كورتنا وماتحبناش نلعبو "
عقد حواجبو مستغرب ،شكون ها الغوريلا ايلي مخوفة الصغار ، جاء لبالو وحدة سمينة ووجها مدهون وشعرها واقف ...بالضبط كيف مايتخيل الغولة وقت كان صغير ،قبل ما يقلو كلمة ، بانت تولين يد فيها الصباط ويد شادة الكورة ، وساعت عينيه وهو يرى فيها تهد ناحيتهم "الا مانوريك "
تخبى الطفل وراه لعل يمنع من العاصفة الجاية ، ايلي خلاه يرا روحو مسؤول عليه ، لا مقدمات لا اهلا ...لا سلام...لا فازات،شعلت فيه ،اخيرا لقات حد تفش فيه غيضها "يا سي الباشا ...موش كان تلهيت بولدك وشديتو خير ...في عوض ايلي قاعد يتبولد على خلق ربي هو وايلي معاه ...ماسلم منهم حد...ومن بلاهم " وجهت كلامها للصغير ايلي قريب يبكي " هاو نقلك انت ...مازلت نراك تضرب واحد بالكورة الا ما..."
هزت يدها تهدد فيه ،لكن السيد شدلها يدها"تنساش راهو وليد صغير "
نطرتهالو ،خلاتو يتبسم بغل " اقسم بالله ماحليتلو عينيه كان انت...ها ظاهر لشكون طالع "
طيشت الكورة عليه وهزتو وحطتو وعينيها مليانة غش "جيل مايسوى شي" جاء لبالها امها كي تبدا تخرنن...ايه يا نزهة...والله طلع عندك الحق في كل ...كل مايجي جيل جديد ...كل ما تنتن اكثر ، تهددت باش تضربو مرة اخرى شماتة فيه كي منعها من بعد دارت ماشية وهو يتبع فيها ، وقفت شوية ولبست صباطها ، ركحت شعرها و استوت روبتها وعادت الانثى الجميلة .
تمشي وتخرنن "يا رسول الله قد كفي هذا ، وزيد يفرفط كي الزربوط ولا يجري يتخبى عند بوه " وقفت وعوجت فمها تقلد "تنساش راهو وليد صغير ...." نفخت "اصلا ما هزيتونا للهاوية كان انتوما " هزت يدها باش تحبس تاكسي ، لو تلقى الشارع هاكي يستحيل تجيبو مرة اخرى، زهرها معروف في التاكسيات على هزة يدها وقفتلها وحدة ،ركبتها راجعة لدارها في انتظار دروس امها على اللوجيك والواجب ووقتاش المرواح.
******
هبط لوطة باش يحكي معاه ، شدو من اكتافو الصغيرة وهو يتبسم " شنوة عملت للمرا باش خليتها تتغشش"
"ماعملت شي ،هي متغششة وحدهل و ماتحبناش نلعبو هاكي فكتلنا الكورة"
ضحك بالسيف عليه ، ها الكذبات كان يقولهم وهو صغير " اممممم.....معناها انت ماعملت شي موش هكا "
"ايه "
"اما انا ريتك انت وصاحبك " في الواقع هو ماشاف شي اما حب يختبرو ويشدو بكذبتو ،الوليد هبط راسو حاشم و بدا يلعب بصوابعو ،لعب على شعرو ومدلو الكورة " العب بيها بعيد ع الناس ...ومعادش تضرب بيها حد ...والا تجيك هاك المرة وتضربك "
"باهي عمو "
جبد روحو من عندو تقول عصفور و تسيب من القفص ، طار بالمورة راجع يلوج على صاحبو ،وقف وهو يتبع فيه ،قعد سارح لحظات ومافيقو كان صوت الشيفور "سي أحمد "
خزرلو "اه منصور شفمة "
"مدام زينب ....كلمتني توا ...تقول تطلب فيك وتاليفونك مسكر ...متحيرة عليك "
"ايا نمشاو ....وقيت حتى هو..."
دارو الزوز وقصدو ، بيومة في النوار تلق لقان .
★******★
"يااااناري...شفت اخرتها ...احمد ربي طلعتلك بنية حلال و فيقتك ...والا الله اعلم ها ولد الحرام شنوة كان باش يعمل فيك وفي البنيات الاخرين "
بضيق " يا امي ...بربي علاه هذا الكل ، هو ماتعجبو كان المزيانة ويختارها واذا قبلت يردها للات الناس الكل .."
ضربتها على كتفها " للات الناس ..اه ...للات الناس وشوف شنوة باش تخسر .."
فركت بلاصة الضربة وهبطت راسها متأسفة وغايضتها خسارتها لهاك الفرصة ، كان لازم نزهة تجبرها خاطرها ، جات جنبها وحطتلها راسها على صدرها "روحي هي ، احلى بنوتة وازين وجه في ها الدنيا ....زينها مايستاهلش تصاور وروب ...والكاميراوات التي لازم تجري باش تصورها غير كاميراوات المصممين ...انت لازم تكمل تقرى و تتخرج وتخدم وتثبت روحك وقتها تنجم توصل ليلي تحب عليه "
حبدت روحها من عندها " يا أمي ...يعيشك ...افهم ...وحاول مرة في حياتك ترى الدنيا بمنظوري انا ....انا امنيتي نكون عارضة ...مودال عالمية ....نحب نمشي ع التابي ، نلبس الماركة ، نتعامل مع الفاشنيستا الكل ، نحب الاضواء الكل تتحط عليا ، وفلاشات الكاميرا تصورني ...هاك اللحظة نحب نعيشها وناقف واثقة من روحي ....يعيشك افهم...هاذي حلمتي ...هاذي الحاجة ايلي مستعدة نحارب عليها كل شي "

مسدتلها شعرها بكفوف يديها " خلينا نتفاهمو ....انا معادش نعارض طريقك هذا ...وانت ...لازم تكمل قرايتك....والكور تمشيلو وتلمو وماتخليهوش يتلم على بعضو "
"مثبتة ماكش باش تعارضني ، لانو قبل قتلي هكا ،ومن بعد تقلبت جملة وتحولت وحلفت معادش نقدم في حتى حكاية "
تبسمت " وعد يا للا ...وانت لازم توعدني "
لمعت عينها وترمات عندها تكبس عليها بذراعاتها "وعد....وعد....وعد "
★*******★
حالة السشوار تشيح في شعرها وملفوفة بكاب في الڨري ، تاليفونها يفبري وماشلقتش بيه كان كي كملت وبدلت حوايجها ،جات تكلم في صاحبتها باش تتفاهم معاها يتلقاو في الفاك ،لقات نومرو ادارة طالبها اربعة مرات ...عقدت حواجبها مستغربة شنوة سبتو هذا ،لازم تعرف شنوة يحب وعلاه اربعة مرات "الو ....عسلامة ...بربي لقيتكم طالبيني ، ان شاء الخير.... ايه انا هي تفضل ...." حلت فمها من الفرحة " ايه ..ايه صحيح " شطحت "حاضر ...ان شاء ...وين بالضبط ...ايه ايه نعرفها ...ان شاء الله ...مرسي. ..." رمات التاليفون بفرحة وخرجت تجري للكوجينة " يا ماااااا " طلت براسها مالقاتهاش ...اكيد راهي في الجنينة ، حلت الباب وجرات لوين امها تسقي في شتلات ورد ،نڨزت عليها من تالي وعنقتها " نزو....كان نقلك"
ضحكت"سيبني راك خنقتني ...شفمة هذا الكل "
باقي نازلة عليها " الحلمة متاعي باش تصير حقيقة اخيرا "
كشبرت نزهة لكن فيسع ما حاولت ترسم تبسيمة " ان شاء الله خير "
بعدت عليها وجات قدامها " اكبر شركة للازياء ،عجبوهم تصاوري ،و طلبوني باش نمشيلهم يعملولي انتروتيان واذا نجحت نولي نشهر في الماركة متاعهم "
"ووين ها الشركة "
قهقهت " ماكش باش تصدق "

"لا تو نصدق ...قول برك ..."

"شركة ناز للازياء"

خلت نزهة فمها "نااز....هاكي ...ايلي يشهرو فيها في التلفزة ويلبسو منها البم البم "
"ايه ايه هي ...اخيرا يا نزووو ....بيبان السماء تحلت وقبلت الدعاء متاعي "