حكايتنا المره دي غريبة شويه بس في نفس الوقت واقعيه جدآ جدآ .. ومن أكتر القصص الغامضه اللي ممكن تخيلك تسرح وأنت بتسمعها .. بس لو بصيت كويس وشغلت عقلك ها تكتشف إنك كنت مخدوع ومفيش حاجه من اللي في خيالك دي حقيقه .
بقولك أي تعالى نشوف ...
.
* الكابتن مراد ، شاب جميل ومن عيلة محترمه جدآ عنده ٢٣ سنه وبيشتغل مدرب سباحه في دار ضباط الشرطة ، لسا متخرج من سنه من كلية التربية الرياضية ، مراد شخص خجول بشكل كبير ، تقريباً
مش بيرفع عينه من الأرض إلاّ للطوارئ ، كل اللي في دار ضباط الشرطة يعرف مين كابتن مراد ، شخص مثقف ومحترم وبيعرف يتعامل مع الناس كويس ، وكل الأطفال بتحبه وكلهم عايزين يكونوا معاه في حمام السباحه ...
.
- في يوم من الأيام مردا جاله طفل جديد هيكون من ضمن المجموعه اللي بيعلمهم السباحه ، الطفل دا كان إسمه ادم وكانت بتيجي معاه أخته "حبيبه " ...
.
* المهندسه حبيبه ، بنت الرائد صلاح عبد الله ، وجدها يبقى اللواء عبد الله الخولي ، مشاء الله حبيبه من عيلة عسكرية بحته ، بس حبيبه كانت مختلفه عنهم جدا ، لاء دي كانت على النقيض تماماً ، هي ضد الشرطه والطريقة اللي بيتعاملوا بيها مع الشعب ، حبيبه بنت طموحه إلى أبعد الحدود ، دخلت كلية الهندسة وقدرت تشق طريق مختلف تماماً عن أسرتها ..
.
#.. اللقاء الأول ..#
• حبيبه : مساء الخير يا كابتن مراد ..
• مراد : مساء الخير يا فندم ، في حاجه حضرتك ..
• حبيبه : لاء أبداً يا كابتن ، أنا بس كنت جايبه أدم علشان يتعلم السباحه ، وكمان أنا سألت على مدرب كويس وعرفت أنك من أحسن المدربين هنا ..
• مراد : أنا تحت أمرك و أدم دا زي أخويا الصغير وكل المجموعه أخواتي الصغيرين والله ، متقلقيش حضرتك إن شاء الله هيكون سباح كويس جدا ، بس هو يشد حيله وأنا معاه خطوه بخطوه ..
• حبيبه : متشكراً جدا ، وأنا كمان تحت أمرك ، وياريت تبلغني أول بأول عن أدم ، أنا هبقى موجوده أغلب الوقت هنا إن شاء الله ..
• مراد : تمام حضرتك ، يالا يا أدم تعالا ننزل المياه ..
.
* دايما أغلب البدايات بتكون تقليدية ، زي اللي حصل من شويه دا بالظبط ، حبيبه بالنسبه لـ مراد مش أكتر من ولي أمر ، ومراد بالنسبة لـ حبيبه مش أكتر من مدرب السباحه بتاع أدم ، ودا أجمل ما في الموضوع علشان الحلو مش بيكمل غير لما بنكون صادقين ، ومراد شخص محترم جداً وبيراعي ربنا في شغله ، وكمان حبيبه بنت مثقفه وطيبه جداً وتختلف تماماً عن أسرتها ، بس نقول إي للنصيب لما يصيب ، والقدر لما يقول كلمته يبقى لازم نقول أميييين .
.
# .. اللقاء التاني .. #
• حبيبه : إيه الأخبار يا كابتن مراد ، أدم عامل إي معاك
هو بيقولي في البيت أنه بيحبك أوي ..
• مراد : هههه الحقيقه أنا اللي بحبه جداً ، أدم ولد مطيع وجميل وبيتعلم بسرعه مشاء الله ..
• حبيبه : ههههه يعني خلاص يا كابتن بقيتوا صحاب
وأنا مش هعرف أدخل بينكم بعد كدا ..
• مراد : لاء مش للدرجادي يا فندم ، إحنا صحيح أصحاب بس أنتي أخته مهما كان ، بس بجد أنا مبسوط من المستوى اللي وصله في الفتره الاخيره ...
• حبيبه : البركه فيك يا كابتن ، هو حقيقي بيشكر فيك جداً في البيت ، وكمان بقى عايز يجي هنا كل يوم وإتعلق بالمكان أوي ...
• مراد : أنا معملتش غير واجبي ، وربنا يقدرني وأقدر أعلم الولاد كلهم على أعلى مستوى ، علشان أهم حاجه إن كل واحد يراعي ربنا في شغله ...
• حبيبه : على فكره يا كابتن مراد ، أنا مبسوط إن الدنيا لسا فيها ناس كويسه زيك كدا ، وكمان سعيده إني إتعرفت عليك وليا الشرف إن أدم يتعلم السباحه على إيدك ...
• مراد : كلام حضرتك دا هو الشرف الحقيقي ليا والله ، وأنا اللي سعيد عشان اتعرفت على حضرتك ..
• حبيبه : ممكن أخد رقمك يا كابتن مراد ، علشان أنا مش هكون موجوده اليومين الجايين دول مع أدم ، عشان مشروع التخرج بتاع الكلية .
.
* المره دي النص خرج عن المألوف ، الكلام مبقاش رسمي ولا مجرد حديث سطحي ، مراد ضحك وحبيبه كمان ضحكت ، أنا شخص مؤمن إن الإبتسامه أول طريق للحب ، وكمان العيون بتقول كلام أكتر من اللسان ، بس دا كان مجرد مبداء يؤمن بيه مراد ، لكن حقيقي المره دي كانت مختلفه ، مختلفه لدرجة إن حبيبه طلبت من مراد الرقم ، وإحنا طبعاً عارفين يعني أي بنت تطلب رقم شاب ، إيه الهبل دا يا عم أنت ، بقولك دي مهندسه بنت رائد وجدها لواء ، وهي أكيد عايزه الرقم عشان تتطمن على أدم مش أكتر ، نام نام وبلاش تخاريف وكلام خايب ، يلا تصبح على !! ، تاني هتحلم بحاجات عبيطه زيك ، شيل الفكره من دماغك يا مراد ونام بقولك .
.
* يوم الخميس 10/19 الساعه 7 بالليل ، مراد خلص شغل ، وقاعد على كرسي بيلبس الكوتش قدام حمام السباحه ، وفاتح شبكة الإنترنت ، علشان يشوف الجديد ، فجاء لقى مسج على الواتساب من رقم مجهول ، فتح الصوره بتاعت الرقم ، إيه دا مستحيل ، دي المهندسه حبيبه ، أنا أكيد بحلم ، مراد إرتبك جداً ، مع أنه إتكلم معاها في الحقيقه ، وكمان دا شات يعني المفروض يكون جريء ، نص الرساله كان بيقول .. ( ازيك يا كابتن مراد ، أكيد عرفتني من الصوره ، أنا متأسفه عشان مجتش الأسبوع دا التمرين مع أدم بس أنت عارف المشروع وكدا ، ياريت تطمني على أدم ) .. والرد كان من صاحبنا الخجول بفطرته .. ( أهلا بحضرتك ، لاء أبداً ولا يهمك كأنك كنتي موجوده بالظبط ، أدم كويس جداً ماشاء الله وفيه تحسن ملحوظ ، متقلقيش حضرتك ) .. حبيبه ضحكت من ورا شاشة الموبايل على الطريقه الغربيه اللي بيتكلم بيها مراد وكأنه في إجتماع رسمي لاء والغريب إنه لسا بيقولها حضرتك لحد دلوقتي ، وردت عليه بنفس النمط الرسمي وقالت ..( طيب الحمد لله طمنتني ، أنا متشكراً ليك جداً على تعبك مع أدم ، وبإذن الله هكون موجوده معاه التمرينه الجايه ) .. مراد في ظل حالة الدهشة اللي صابته من طريقة حبيبه في الرد ، واللي فضل يضحك ويغني طول الليل علشان هيشوفها ، وعلى الرغم من السعاده اللي دخلت قلبه ، والإحساس اللي محسوش من سنين طويله ، إلا إنه رفض يتخلى عن مبدائه وطريقته الرسميه في الحوار وكان الرد كالآتي ..( إن شاء الله يا فندم ، تشرفينا ).. وقفل الواتساب على كدا وحط الموبايل في جيبه ومشي ، على الجانب الآخر حبيبة كانت مزهولة من الثبات اللي بيمتلكه مراد ، إزاي هو كدا ، معقوله في رجاله بالشكل دا ، حقيقي مش مصدقه إني بتعامل مع شخص بالشكل دا ، وكانت فاكره إن مراد مستني منها الرد ، فحبت تكسر الروتين ، وقفلت الواتساب هي كمان .
.
* شاب زي مراد ، من بيت بسيط جداً ، من صغره بيحفظ قرأن ، كل حياته عباره عن حاضر ونعم ، أبوه مدير مدرسه ، وأمه ست بيت ، طبيعي إن شخص عايش وسط أسره زي دي يكون غامض ، هو الحقيقه مش غامض هو متدين شويه ، وبالنسبه لـ حبيبه دا أغرب إنسان على وجه الكوكب ، بس الأغرب إن حبيبة كان عاجبها الإختلاف دا ، هي من صغرها بتحب الإختلاف ودا اللي خلاها تدخل هندسه ، وكمان توقف ضد أهلها قصدي الشرطه ، ولأول مرة يلفت نظرها شاب ، مع إنها متعرفش عن مراد حاجه غير إنه كتوم وبيشتغل مدرب سباحه ، بس هو من إمتى القلب بيفهم الكلام ، ومن إمتى بنقدر نسيطر على مشاعرنا ، الحب يا ساده يأتي بلا موعد ، ويسكن حيث يشاء ، ولو الحب دق بابك يبقى لازم تفتح وتقول أهلين .
.
• قبل ما أروح للقاء التالت ، حبيت أقولك إنك لو فاكر إن مراد هيحب حبيبه وبعدين هي هتوقف قدام أهلها عشانه ، يبقى عندك حق دا اللي كانت ناوي أكتبه الحقيقة ، بس أنا المره دي هكون مختلف زي صاحبنا مراد بالظبط والكلام ها يمشي حسب تفكريك ، بس في الآخر هتحس إنك أول مره تقرأ قصص ، خد بالك أنا دلوقتي بتحداك وأنت لازم تعرف إني ممكن أخسر علشان أكسبك ، وممكن أخسر لو دا هيخليك تكسبني ، أتمنى تكون قدرت تفهمني .
+ يتابع .💙1
أنت تقرأ
سوف نلتقي
Romanceلو كنتي أقبح أهل الأرض فا انا احبك، ولو كنتي آخر نساء العالم ف انا زوجك، ولو كنتي في آخر الدنيا ف انا انتظرك ، ولو كنتي افقر الناس ف انا اريدك ، ولو كنتي لا تردين الحب ف انا ساحبك ، ولو كنتي تبعدين عني كما تبعد السماء عن الأرض فسااتي اليكي، ولو كنت...
