سوف نلتقي

الجزء الثاني

  #.. اللقاء التالت ..#
.
• مراد : صباح الخير يا ولاد ، عاملين ايه النهارده ، يالا روحوا غيروا وتعالوا ...
- وبصوت رقيق يقطع كلام مراد ..
• تقول حبيبه : مساء الخير يا كابتن مراد ، أديني جيت زي ما قولتك أهو علشان تعرف بس إن مفيش حاجه تشغلني عن أدم ...
• مراد بعدما توسعت عيناه : مساء الخير يا بشمهندسه ، حضرتك تيجي في أي وقت دا شرف ليا والله تنوري المكان كله ، وربنا يخليكي لـ أدم ...
• حبيبه : يارب يا كابتن ، طيب أنا هروح مع أدم غرفة خلع الملابس ، ونبقى نكمل كلامنا بعد ما تخلص شغلك ...
• مراد : خلاص تمام ، تحت امرك ..
- الساعه 9:30 إنتهت الحصه التعليمية ، ومراد دخل غرفة خلع الملابس ولبس الهدوم ، وخارج من النادي وهو ناسي إن حبيبه مستنياه ، وفي طريقه يلاقي صوت من وراااه بينادي .. كابتن مراد .. كابتن مراد ، بيوقف علشان يشوف مين يلاقي الباشمهندسه حبيبه بتشد أدم وبتمشي بسرعه علشان تلحقه ..
• حبيبة : إيه السرعه دي يا كابتن ، مش أنا قولتلك نكمل كلامنا بعد ما تخلص الحصه ..؟!
• مراد : أنا متأسف جدآ ، بس أنا تقريباً نسيت ، وكنت بمشي بسرعه علشان الـ حق الأتوبيس ..
• حبيبه : طيب قولي إنت ساكن فين يا كابتن مراد .؟!
• مراد : أنا ساكن في الحي السابع ، عند موقف عربيات المقطم كدا ...
• حبيبة : خلاص تعالا هوصلك إنت في طريقي أنا أساسا ساكنه في المقطم ..
• مراد : متشكر جدا لـ حضرتك ، مش حابب اتعبك معايا ، أنا هركب الأتوبيس زي كل يووم ..
• حبيبة : إنت كدا هتزعلني منك يا كابتن مراد ، وبعدين مش هقولك تعالا إركب علشان خاطري ، هقولك علشان خاطر أدم ، قولت أي ..!!
• مراد : خلاص لو علشان خاطر أدم يبقى مش ها قدر أزعله وأمري لله ...
• حبيبه : ههههه ، يعني هو أدم بس اللي ليه خاطر عندك يا كابتن مراد ..؟!
• مراد : ههههه ، مقصدش والله ، حضرتك ليكي خاطر طبعاً ، بس إنتي قولتي علشان خاطر أدم ..
• حبيبة : طيب يالا إركب علشان الوقت ..
• مراد : حاضر أنا هركب ورا هنا أحسن علشان أدم يركب جمبك ..
• حبيبه : لاء تعالا قدام إنت ، وخلي أدم ورا علشان بينام في الطريق ..
• مراد : مش هينفع أنا هركب ورا بعد إذنك ، يا كدا يا إما هنزل أركب الأتوبيس ..
• حبيبه : خلاص خلاص ، إركب ورا اللي يريحك يا مراد ..
* مراد فضل ساكت طول الطريق ولحد ما وصل مقلش ولا كلمه واحده ، والغريب إنه حط  " الهند فري " في ودنه علشان لو إتكلمت ميسمعهاش ، حبيبه حاولت تبصله كتير من مراية الصالون اللي في العربية ، بس كانت شايفه إنه باصص للشارع ولابس السماعه يعني مش منتبه ليها ، عشان كدا فضلت إنها تسكت هي كمان ومتتكلمش .
• مراد : أنا هنزل هنا يا باشمهندسه ، على أي جمب هنا لو سمحتي ..
• حبيبه : حاضر ثواني بس هركن ..
• مراد بعد ما نزل من العربية : أنا متشكر جدا جدا لحضرتك ، على التوصيله دي ..
• حبيبة بعدما تجاهلت كل اللي قاله مراد : ممكن تبقى تفتح واتساب إنهارده يا كابتن مراد ، علشان عايزه أتكلم معاك شويه ..
• مراد في زهول : حاضر حاضر يا افندم ..
• حبيبه : باااي يا كابتن .
.
* يوم جديد ومقابلة جديده بين مراد وحبيبه ، وكالعادة بيوصل مراد للسكن ويفضل يكلم نفسه ويحلل المقابله حته حته ، المره دي لاحظ مراد إنها أصرت على إنها توصله ، وكمان أخد باله إنها بصتله من المرايه بتاعت العربية ، والأغرب إنها قالته يا مراد في العربية من غير الكابتن ، وفضل مراد يكلم نفسه ساعه كامله ،
ويقول ..
هي أكييد معجبة بيا ، بس هتعجب بيا على أيه دي متعلمه وجميله وغنيه كمان ، يبقى هي بتحب الناس اللي شبهي كدا ، طب ما فيه مدربين كتير في النادي إشمعنا أنا بالذات ، شكلي أنا اللي معجب بيها وبحبها كمان ، بس أنا مش من حقي أحب اللي زيها أنا فين وهي فين بس ، لاء أنا إتجننت على الاخر وبقيت بكلم نفسي كمان ، إيه دا أنا نسيت افتح واتساب زي ما قالتلي ، طب يا ترا هتكلمني في إيه ، معقوله تعترفلي بحبها أو إعجابها بيا ، لا ء مش معقوله ،  هي أكيد هتكلمني عن أدم مش أكتر ، طيب لو هي هتسأل عن أدم هتكلمني على الواتساب ليه ما كانت سألتني في النادي ، إيه الحيره دي بس يا ربي ، أنا هفتح وأشوف أحسن كدا هتجنن .
.
         * .. أول محادثه بينهم .. *
.
• حبيبة في مسج من بدري : فينك يا كابتن ..؟!
• مراد : أنا أسف جدآ على التأخير ، بس كنت بعمل حاجه كدا ..
• حبيبه : مفيش أي مشكله ، أنا مش هطول عليك ..
• مراد : اوؤمريني حضرتك ..
• حبيبه : أولاً .. ممكن تبطل تقولي حضرتك ويا افندم دي على الأقل لما نكون برا النادي ..؟!
• مراد : ميصحش حضرتك ، إنتي ليكي مكانتك الخاصه وكمان أنا متعود أقول كدا ..
• حبيبة : لاء أنا زي زيك بالضبط ، كلنا بني آدم ، وأنا حقيقي مش بحب كدا ، لما نكون في النادي كفايه تقولي يا باشمهندسه ، ولما نكون بنتكلم مع بعض سواء محادثات أو في أي مكان تقولي يا حبيبه ..
• مراد : حاضر اللي تشوفيه ، هحاول أعمل اللي قولتي عليه مع إني مش متعود على كدا ..
• حبيبه : ثانياً بقى .. حاول تغير طريقتك في الكلام معايا ، بلاش الطريقه الرسميه دي ، يعني الجواب بتاعك على قد السؤال ومش بتزود حاجه من عندك أبداً ،الطريقه دي بتضايقني جداً ..
• مراد : هههه ، حاضر هغير طريقتي في الكلام ، بس الحقيقه أنا معرفش طريقه تانيه ..
• حبيبة : متقلقش هعلمك يا سيدي ، واهو نكسب فيك ثواااب ، ههههه ...
• مراد : هههههه ، كمان دا كتير عليا والله ..
• حبيبه : لاء مش كتير ولا حاجه ، إنت بس اللي مش واخد بالك إنك شخص كويس جدا ..
• مراد : كلامك دا وسام على صدري والله ، وأنتي كمان إنسانه جميله جدا ومثقفه وبصراحه أي حد يتمنى يتعرف عليكي أو يكلمك ...
• حبيبه : أعتبر دي معاكسه يا كابتن ولا إيه ههههه ، متشكراً جدآ على الكلام الحلو دا ...
• مراد : دي حقيقه واللهي مش مجرد كلام ...
• حبيبة : ما خلاص بقى يا عم كاظم الساهر إنت في إيه مش كدا يعني ، ههههه ...
• مراد : ههههه ، خلاص كفايه كدا ...
• حبيبة : مراد هو إنت عندك كام سنه ..؟!
• مراد : أنا عندي 23 سنه ..
• حبيبة : اي دا بجد ! ، الحقيقه مش باين عليك خالص اللي يشوفك يقول عليك عندك 30 مثلاً ...
• مراد : 30  إيه بس دا أنا لسا متخرج من الجامعه من سنه حضرتك ، هههههه ...
• حبيبة : ماشي يا عم الصغير ، العمر كله ليك 💙
• حبيبة تاني : ممكن تكلمني عن نفسك شويه ؟ ، يعني إنت منين وشخصيتك متركبة إزاي وكدا يعني ...
• مراد : هو أنا من الشرقيه ، بس ساكن هنا علشان الدراسه والشغل وكدا ، أنا كمان بحضر دراسات عليا جمب شغلي في السباحه ...
• حبيبه : إيه الجمال دا ما شاء الله ، يعني إنت بتشتغل وبتحضر دراسات عليا كمان دا شيء حلو جدآ ...
• مراد : متشكر جداً ، دا من زؤقك والله ، وربنا يقدرني بقى وأكمل فـ طريقي الطويل دا ...
• حبيبة : هترجع تاني للطريقة دي في الكلام معايا ، إنت مش قاعد قدام دكتور في الجامعه على فكره ...
• مراد : ههههه ، هو إحنا كنا بنقدر نقعد قدام الدكتور حتى ، معلش نسيت والله ، مش هتغير في يوم يعني محتاج وقت ...
• حبيبه : بص يا مراد كلمني عادي زي ما بكلمك ، حاول تشيل من دماغك إنك مدرب السباحه بتاع أخويا أدم عاملني عادي ...
• مراد : الحقيقة أنا مش هقدر أشيل صورتك كا ولي أمر من دماغي ، عشان دا الواقع ، وبعدين إنتي مع حفظ الألقاب في مكانه محترمه ولازم أحترمك ...
• حبيبه : بجد أنا مش عارفه إزاي إنت متعلم ، مكانة إيه وواقع إيه اللي بتتكلم عنهم ، يا مراد مفيش الكلام دا إحنا بني آدم كلنا ، يعني مفيش فرق بين غني وفقير  ولا فيه فرق بينا ، إنت بس اللي مش قادر ابص لـ فوق وبتخاف تخرج برا الدايره ..
• مراد : صدقيني بقالي 5 سنين وأنا عايش جوا الدايره دي ، من يوم ما دخلت الجامعه وجيت على القاهره وأنا ماشي جمب الحيط ، والحمد لله محدش يغلطني ولا يمسك عليا حاجه ، وأنا مبسوط بكدا ..
• حبيبة : بص هو مبداء حلو ، بس ربنا بيدينا دايما فرص كل يوم علشان نكون أحسن ، وأنت بالطريقه دي عمرك ما هتشوف الفرص دي ولا ها تعرف تتقدم ..
• مراد : قصدك إيه يا حبيبه ..؟!
• حبيبة : قصدي إن الدنيا فرص يا مراد ، ولازم تعرف إزاي تغتنمها ، حاول ترفع عينك وتبص قدامك ، جرب تخرج بر الدايره ، مش هتخسر حاجه ولو حتى خسرت يكفيك إنك جربت وحاولت ، وها تكون إتعلمت حاجه جديده تفيدك ..
• مراد : كلامك حلو ومنطقي ، بس مش بسهوله ها قدر أعمله كدا ، بس ها حاول ...
• حبيبه : ماشي يا مراد ، وكمان عايزه أقول لك إني ممكن أساعدك في أي حاجه ، وكمان لو إحتاجتني في أي وقت هتلاقيني جمبك ...
• مراد : أنا مش عارف أقولك إيه بجد يعني ، بس إنتي شخص مميز جداً وتستاهلي كل خير ...
• حبيبة : وأنت كمان يا مراد تستاهل كل خير ، وإن شاء الله ربنا ها يكرمك ...
• مراد : يارب أنا وأنتي ...
• حبيبة : يالا بقى كفايه كلام إنهارده ، وروح نام ، أنا كمان كام مشوار الصبح بدري ولازم انام ...
• مراد : طيب تمام ، يالا تصبحي على خير ...
• حبيبه:  وإنت من أهل الخير يا مراد ، وهشوفك بعد بكره إن شاء الله في النادي ..
• مراد : بإذن الله ، هتلافيني هناك ، مع السلامه ...
• حبيبه : مع السلامه 💜 .
.
* إحساس حلو إنك تتحب ، من حبيب أو رفيق ، مش مهم مين ها يحبك ، الأهم إنك تلاقي الحب ، مراد قلبه دق بعد سنين جفاف ، وحبيبة شافت شيء مختلف عن اللي اتعودت عليه ، أي إتنين في بداية أي علاقه بيكون بينهم جزء مفقود ، الجزء دا اللي هو الامان ، لما بنحب وقلوبنا تميل للهواى ، بنكون محتاجين نحس بالأمان ومش بنلاقي أحن علينا من حضن الحب ، علشان كدا تلاقي أي شخص مفارف حبيبه ، مفتقد للأمان ، مفتقد للطريقه اللي حس فيها بالأمان ، وحبيبة مكنش عندها أخ كبير ، فـ كانت مفتقده للشعور بالأمان ، رغم وجود أبوها وأمها ، بس الأخ الكبير بالنسبه للبنت حاجه مختلفه ، مش ها يفهم كلامي دا غير اللي عنده أخ كبير .
+ يتابع 💙