سوف نلتقي

الجزء التالت

* الساعه 8 :30 الصبح ، إنهارده الخميس يعني مراد أجازه من الشغل ، زي أي بني آدم ، مراد بينام كتير في اليوم دا ، بس ومن إمتى الحب والنوم بيتفقوا مع بعض مراد صحي من النوم على صوت الموبايل غريبة دي مين هيرن دلوقتي ، أصحابه كلهم عارفين إنه في أجازه ، طيب مين بس هيرن على الصبح كدا ، فتح عنيه بالعافيه ، وبص في شاشة الموبايل ، مش معقوله دي حبيبة ، دي عارفه إني مش موجود في النادي اليوم دا ، طيب بترن عليا ليه ، وحتى لو هتسألني على حاجه معقوله ترن الصبح كدا ! ، ربنا يستر ، مراد مش عايز يرد ، وحبيبة بترن ، والموقف محرج ، بعد رابع مكالمه ، فتح مراد عليها .
.
           # .. أول مكالمة بينهم ..#
.
• مراد : الو .. الووو ..
• حبيبة : لسا فاكر يا كابتن ، حضرتك الساعه دلوقتي داخله على تسعه ، وأنت لسا نايم ، وكمان بترد متأخر عليا ..
• مراد : معلش متأسف ، بس انا في اجازه فـ طبيعي يعني هكون نايم ، ها صحى بدري ليه ، وها روح فين يعني ما لازم أنام ...
• حبيبة : لاء مفيش الكلام دا ، أنت المفروض راجل رياضي ، يعني عارف إن النوم الكتير وبالذات بالنهار مش مفيد للجسم ، وبعدين إنت معندكش أصحاب تخرج معاهم في اليوم دا ، الناس في الاجازات بتغير جو وتتفسح مش تنام ...
• مراد : لاء أنا كا شخص رياضي بقولك إن النووم مفيد جدا جدا يعني وبالذات بالنهار هههههه ، وبعدين كل صحابي كباتن شبهي ، وكلهم نايمين دلوقتي ...
• حبيبه : طيب سيبك من الكلام دا ، قوم كدا أغسل وشك وغير هدومك ، علشان ها نفطر سوا وعايزك معايا في مشوار كدا ...
• مراد : مشوار !! ، وكمان نفطر سوا !! ، أنا أكييد لسا نايم وبحلم صح ؟ ..
• حبيبة : يالا هكلمك كمان نص ساعه ، تكون لابس ومستني تحت العماره اللي فيها شقتك ، بااي ...
.
* قبل ما أقولك تفسير المكالمه دي ، ها قولك على حاجه إنت مش واخد بالك منها ، إنت فاكر دلوقتي إن حبيبة بتحب مراد ، وكمان هي عايزه تقرب منه ، لو فاكر كدا أحب أقولك برافوو إنت صح ، بس مش قولتك إن القصه دي مختلفه وها تتعبك ، بعد ما تعرف حبيبة عايزه مراد يروح معاها فين ، ها تقدر تفهم إن الموضوع ملوش علاقه بالحب خالص دلوقتي ، فاكر في الأول لما قولتلك إن حبيبة معندهاش أخ كبير ، حاول بس متنساش ، دلوقتي إنت عايز تعرف لما الحكايه مش حب ولا إعجاب ، المكالمه دي تفسيرها إيه ، هقولك بس متتعصبش ، مراد هو اللي معجب بحبيبة مش العكس ، بس هو ملاحظ إنها مهتمه بيه ، لكن مفيش دليل على حبها ، وهو عارف كويس إنها تبقى مين وبنت مين وجدها مين ، يعني الغلطه بفوره ، طيب لما هو مش حب ولا إعجاب دا أسمه إيه ، حبيبة بنت ذكية جدا وكمان مثقفه ، ومش معقول تحب بالسرعه دي ، عارف إنت الدكتور اللي بيدي لـ طفل حقنه ، الدكتور بيحاول يلاعب الطفل لحد ما يحبه ، ولما الطفل يديله الأمان الدكتور بيديله الحقنه في المقابل ، إنت مش فاهم حاجه صح ، بص أنا مش ها حيرك معايا ، تعالى نشوف ها يحصل أيه وبعدها نتكلم ...
.
       # .. أول خروجه بينهم .. #
.
• مراد بيكلم نفسه : هو ايه اللي بيحصل ده ، أنا مش مصدق إني واقف تحت العماره مستنيها ، لاء وكمان بتقولي مشوار ، ونفطر مع بعض ، ههه ...
- صوت عربية من بعيد ، بيييبب بييييب ، إنت يا كابتن ، يا كوووتش .
• مراد : أيواا يا بشمهندسه ، أنا ها عديلك أهو ثواني بس جايلك ...
• حبيبة : اي بقى أنت واقف سرحان فـ إيه ..؟!
• مراد : لاء أبداً مفيش حاجه ، أنا بس كنت بيص على الشارع ومسمعتش صوت العريبة ...
• حبيبة : اممم ، ماشي تعالى إركب بقى علشان مش عايزين نتأخر ...
• مراد بعد ما ركب جمبها : أديني نزلت من الشقه ، وكمان مفطرتش زي ما قولتي ، وكمان ركبت معاكي العربية  ممكن أعرف بقى إحنا رايحين على فين ..؟!
• حبيبة : ها قولك بس بعد ما نفطر ، قولي صحيح إنت بتحب الكشري ..؟!
• مراد : كشري إيه بس ، أنا بقولك عايز أعرف إحنا رايحين فين تقوليلي كشري ...
• حبيبة : ممكن تهدا وبلاش تتعصب ، قولتلك ها قولك بعد ما نفطر ، يالا بقى قولي بتحب الكشري ..؟!
• مراد بصلها بغرابة وضحك : هو في بني أدميين بيفطروا كشري على الصبح كدا ...
• حبيبة : مش عارفه بقى ، أصلي مكلتوش من زمان ، وبعدين أنا كنت بقترح عليك عادي ، طيب بص إنت فطرني على مزاجك ...
• مراد : اممم ، ماشي ادخلي بقى يمين كدا وامشي على طول ، لحد ما أقولك توقفي ...
• حبيبة : طب ما تيجي تسوق إنت ، ولا مش بتعرف تسوق ..؟!
• مراد : ههههه ،لاء الحقيقه مش بعرف ، وبعدين العربية بتاعتك إنتي يعني أنتي اللي تسوقيها ...
• حبيبة : مش مشكله خالص ، أنا ها علمك السواقه ، متقلقش أنا بسوق كويس أوي ...
• مراد : طب خدي بالك من العريبة اللي قدامك دي ، وإركني على أي جمب هنا ...
• حبيبة : إي دا وصلنا كدا خلاص !! ، بس أنا مش شايفه أي مطعم يعني ولا حتى كافيه ...
• مراد : لاء إحنا مش ها نفطر في مطعم ولا كافيه ، إحنا ها نفطر هناك ، على عربية الفول دي ...
• حبيبة : واااااو ، مش مصدقه إني ها فطر على عربية فوول ، عارف أنا دايما كان نفسي أعيش الجو الشعبي دا ، يعني أنا بشوف الناس البسيطه دي على النت ، وكمان بحس بالسعاده اللي هما فيها ...
• مراد : أي دا معقوله ، هو الناس اللي زيك حاسين بالناس دي ، وكمان بتحسدوهم على السعاده اللي هما فيها  طيب مش واخده بالك من الفقر ، أو الظلم والجهل ، مشوفتيش البطاله ، أو طابور العيش ، معداش عليكي الست اللي إبنها على كتفها وقاعد بتعيط قدام المستشفى علشان مش قادره على مصاريف العلاج ، ولا الراجل المسكين اللي عاش عمره كله موظف بيخدم بلده بكل أمانه وإخلاص وفي الاخر يتحال على المعاش وياخد شوية فلوس ، هي فين السعاده اللي بتتكلمي عنها دي ، الضحكه اللي بتشوفيها دي حزن ، الناس دي بتضحك من غلبها مش علشان مبسوطه ، صدقيني إنتي متعرفيش حاجه عنهم غير الصور وبس ...
• حبيبة : عارف يا مراد ، إنت كلامك دا حسسني بالندم والحسرة ، أنا بجد مكنتش شايفه الصوره كدا ، ولكن صدقني أنا مش وحشه ، أنا بعمل خير كتير وبساعد على قد ما اقدر ، لكن هي الدنيا كدا يا مراد ، لازم يكون فيه غني علشان يكون فيه فقير ، فاهمني ...
• مراد : لاء الدنيا مش كدا ، ربنا أمر بالعدل والمساواة ، بس طول ما فيه ناس بتسرق وتنهب ، وناس تظلم وتقتل ، وناس تعلى وتكبر على ضهر ناس تانيه ، وطول ما مفيش إيمان في قلوبنا ولا ضمير ، يبقى إحنا مظلومين وانتوا ظالمين ...
• حبيبة : مش عارفه أقولك إيه ، بس لازم تعرف إن ربنا هو اللي ها يحاسب ، وكل واحد ها ياخد على قد عمله ولا اايه ..!!
• مراد : صح عندك حق ، إحنا الحمد لله راضيين  ومبسوطين زي ما قولتي ، وعندما ثقه في ربنا ...
• حبيبة : ونعم بالله ، شوفت بقى دخلتنا في حوار إجتماعي ، ومفطرناش لحد دلوقتي ..
• مراد : ههههه ، معلش أصلي في السياسه والاقتصاد معنديش ياما ارحميني ...
• حبيبة : هههههههه ، طب يالا يا عم السياسي إنت عايزه أفطر ..
- واقفين قدام عربية الفول ووسط الناس .
• مراد : هاتلنا أربعه فول يا عم محمد ، وبلاش تحط طحينه ..
• حبيبة : مراد .. مراد ، أنا عايزه طحينه ..
• مراد : خلاص يا عم محمد ، هات إتنين بالطحينه واتنين من غير طحينه ..
• حبيبة : قولي بقى ، إنت عايش في القاهرة علشان شغلك ودراستك بس ، ولا في هدف تاني ..؟!
• مراد : هو الهدف الرئيسي دراستي وشغلي ، بس أنا عندي هدف تاني كدا ، لكن دا بعيد عندي في الوقت الحالي ..
• حبيبة : بعيد إزااي !! ، وإيه هو الهدف دا قولي ..؟!
• مراد : نفسي أكون حد ملهم ، يعني أسيب أثر ، مش مهم أكون ملهم ف إيه ولا إزاي ، الأهم إن الناس تفتكرني بعد ما اموت ..
• حبيبة : يعني قصدك إنك تكون مشهور ..؟!
• مراد : مش بالظبط ، أنا عايز أكتب قصة حياتي كلها ، علشان اللي يجي من بعدي يقراها ، وكمان أكتب الصح والغلط والصعب والسهل ، كدا يعني ..
• حبيبة : فكره حلوه ، بس إنت شايف إن قصتك تستاهل تبقى كتاب والناس تقرأها ..؟!
• مراد : مش عارف بردو ، بس شايف إن عندي ما يكفي من المواقف اللي تستاهل تتحكي ...
• حبيبة : عارف يا مراد ، أنا كمان نفسي أعمل حاجه كبير  كدا والناس تفتكرني بيها ..
• مراد : يعني مشروع كبير يعني ..؟!
• حبيبة : ممكن اه ، بس يخدم الناس وبالذات الناس البسيطه دي ..
• مراد : شوفتي أدينا فضلنا نتكلم ومفطرناش ، والفول زمانه برد كمان ..
• حبيبة : ههههه ، ما انت اللي بترغي كتير ، أنا مش عارف إنت رغاي كدا ليه ...
• مراد : دا أنا صح ، دا إنتي مش بتبطلي كلام ، على طول كلام كلام كلام ، ههههه ...
• حبيبة : ها تصدقني لو قولتك إني مش بلاقي حد يسمعني ، وأول مره أفتح قلبي لحد كدا ..
• مراد : معقوله يعني وسط كل اللي إنتي فيه دا ومش بتلاقي حد يسمعك ..!!
• حبيبه : يا مراد ، أنا حياتي كلها عباره عن أوامر ، دا غير إني طول الوقت لوحدي في البيت ، أبويا على طول في الشغل ، ومعنديش إخوات غير أدم ، ودا مهما احكيله مش بيفهمني ، عارف يعني إيه بنت معندهاش حد تحميله ولا يسمعها ...
• مراد : عارف طبعاً ، وصدقيني أنا ببقى زيك كدا ، أنا كمان متغرب عن أهلي ، وعايش هنا لوحدي ، أوقات كتير مش بلاقي حد يسمعني ، ولا بلاقي حد يفهمني
ولا أحكيله عن اللي فيا ، عارفه أنا بنام في أيام الإجازات ليه ، مش علشان أنا بحب النوم وعايز أرتاح وكدا ، لاء أنا بنام علشان معنديش حد أخرج معاه ولا نتفسح مع بعض مثلاً ...
• حبيبه : حاسه بيك على فكره ، وأوعدك من دلوقتي مش هتنام يوم الاجازات تاني ..
- مراد إكتفى بالنظر والصمت الشديد .
• حبيبة: يا نهار أبيض الساعه دلوقتي 11:30 ، أنا لازم أمشي دلوقتي حالاً ، معلش يا مراد ، أصل عندي مشوار مهم دلوقتي ، ها بقى أتصل بيك ، باااي ..
- مراد ملحقش حتى يقولها سلام ، ولا يفهم اللي حصل ، ومشيت حبيبة ، وفضل مراد قاعد مكانه ، واللي يدهش أكتر إنه مفطرش معها ، والأغرب إن مفيش مشوار ها يرحوه مع بعض  ...
+ يتابع 💙