سوف نلتقي

الجزء الخامس

- حبيبه عملت الشاي ، ومراد قاعد في الصالون وحاطط إيده على خده ، الشقه مفيهاش حد ، غيرهم طبعاً ، إحنا كا مسلمين ، عندنا شريعه بتقول ، ما اجتمع رجل و إمرأه إلا وكان الشيطان ثالثهما ، مراد مش شايف الشيطان ، بس حاسس بيه ، وكمان إصرار حبيبة على السهر معاه ، وجاتله الشقه ، ودي بنت جميله ، وهو شاب عازب ، والشيطان شاطر يا مراد ، بس إنت عارف الغلطه مع دي هتكلفك كام ، صدقني حياتك مش كفايه ، بس دي جات لحد عندي ، وكمان في وقت متأخر ، دا غير إنها مصممه تفضل هنا ، طب دا معناه إيه ، لاء لاء مش معقول ، استغفر الله العظيم .
.
• حبيبة : عملتلك كوباية شاي ، مفيش بعد كدا ، هتحلف إنك مشربتش شاي قبل كدا ..
• مراد : تسلم ايدك ، هو أكيد حلو علشان إنتي اللي عملتيه ...
• حبيبة : ثابتني ثبت ، ههههه ، ماشي يا عم مجامله مقبوله منك ..
• مراد : هههههه ، مش بجامل دي حقيقه ، بس معلش يعني اعذريني ، عندي سؤال ، هو إنتي مش قولتي إنك جيتي علشان تطمني عليا لما قفلت تليفوني  واديكي إطمنتي ، قوليلي بقى إنتي هنا ليه بجد ، وليه بتعملي معايا كل دا ..؟!
• حبيبة : بص يا مراد ، أنا هنا علشان أنا عايزه أكون هنا ، مش علشان اطمن عليك بس ، أنا جيت عشانك ، بصراحه كنت حابه أسهر معاك ، فاهمني ..
• مراد : والله ما فاهم أي حاجه ، طب كل دا ليه ، يعني إشمعنا أنا ، بتعملي معايا أنا كدا ليه ..؟!
• حبيبه : ما قولتك عشان انا عايزه كدا ، وبلاش أسئلة كتير بقى ، لو مضايق مني أمشي ...
• مراد : مقصدش والله ، بس أنا بس كنت عايز افهم ، أصلي مش بحب أبقى مش فاهم كدا ...
• حبيبة : مش قولتلك قبل كدا ، بلاش تستعجل على حاجه ، أصبر يا مراد ، أصبر ...
• مراد : أنا مش مستجعل ، بس حطي نفسك مكاني ، يعني أنتي جيالي نص الليل ، وكمان لوحدك ومن ورا أهلك ، يعني دا يتفهم إزاي ..!!
• حبيبة : يتفهم إني مش بنت طايشه ولا مراهقه ، أنا عارفه كويس الغلط من الصح ، وبعدين قولتك لو مضايقاك أنا ممكن أمشي ...
• مراد : يا حبيبة أنا مش قصدي حاجه ، بس إنتي لازم تقدري موقفي ، وتفهميني ..
• حبيبة : أفهم ايه بالظبط يا مراد ..!!
• مراد : تفهمي إني مش ها قدر أخليكي تهسري هنا ، وكمان مش ها ينفع تقعدي اكتر من كدا ..
• حبيبة : طيب لو قولتك إني لو مشيت من هنا دلوقتي ، انت ها تمشي من شغلك ، وكمان هسببلك مشاكل كتير في حياتك ...
• مراد : أعملي اللي تعمليه ، بس مهما كان مش هسمحلك تفضلي هنا اكتر من كدا ، يالا لو سمحتي إتفضلي روحي على بيتك ...
• حبيبة : حاضر يا كابتن مراد ، أنا ماشيه ، بس خليك فاكر إنت عملت ااايه ، سلام .
.
* لكل فعل رد فعل ، وحبيبة كانت مصره على إنها تفضل في شقة مراد ، بس دا مش في قانون مراد ، شاب متربي ومحترم زيه ، مستحيل يسمح بكدا ، صحيح الشيطان شاطر ، بس مراد ذكي ومؤمن ، دلوقتي مراد تقريباً مش ها يروح شغله تاني ، دا بنت الرائد هددته خلاص ، دا غير إنه بيستعد عشان ينزل بلده ، خوفاً من حدوث مشاكل ، ولحد هنا تنتهي قصته في القاهرة ، دا اللي شافه مراد ..
.. لكن اللي انت مأخدتش بالك منه إن حبيبة بنت ذكيه جدا جدا ، ومش مراهقه ولا طايشه زي ما قالت ، طب أي تفسير إللي حصل منها ، مش أنا قولتك إنها مستحيل تحب بسهوله ، واللي ها تحبه دا لازم ينجح في الإختبارات ، ودا كان مجرد إختبار من حبيبة ، يعني هي صممت تسهر معاه عشان تختبره ، أيواا دي حقيقه ، عرفت بقى إنك مش ها تقدر تفهم اللي بيحصل غير
لما تكون ذكي ، أنا قولتك قبل كدا ، إني مختلف المره دي عن كل مره ، يعني اللي إنت بتشوفه طبيعي دا بالنسبالي خيالي ، هو لو انا بحكيلك القصه دي ، مكنتش هخرج عن المألوف ، يعني اللي إنت بتفكر فيه أو متوقعه كنت أنا هقوله ، بس الكتابه دي لعبتي والساحه بتاعتي ، وهنا أنا الأفضل ، ولما بكتب يبقى لازم تفتح عينك كويس ، عشان تشوف الصوره كامله .
.
يوم السبت .. الساعه 8 بالليل .
- مراد مرحش الشغل ، يعني مفيش إنهارده تمرين للولاد طب ليه !! ، هو مش الباشمهندسه قالته إنها لو مشيت مش هيروح شغله تاني ، ودا اللي مراد صدقه ، بس طبعاً هو ميعرفش إنه نجح في الإختبار ، التليفون بيرن ياترا ميين ..!!
• مراد : هو مدير الحمام بيتصل بيا ليه ، يمكن عشان يقولي تعالا خد باقي فلوسك وامشي ، ولا فيه مصيبه حصلت وانا هشلها ، يارب أستر ..
• مدير الحمام : الو ايوا يا مراد ، فينك يا كابتن مجتش إنهارده ليه ..؟!
• مراد : مهو مهو أنا أنا ...
• مدير الحمام : مالك يا مراد إنت تعبان ولا ايه ..؟!
• مراد : أيوا أيوا ، أنا فعلاً تعبان جداً ، ومعرفتش اجي إنهارده ، بسبب كدا ..
• مدير الحمام : طيب لما أنت تعبان مكلمتنيش ليه ، كنت عرفني حتى عشان أشوف حد ينزل مع الولاد مكانك إنهارده ...
• مراد : متأسف جدآ ، بس أنا كنت تعبان جدا ، ومعرفتش أتصل بحضرتك ، ياريت تشوف حد ينزل مكاني اليومين دول لغاية ما أخف ...
• مدير الحمام : مفيش مشاكل يا حبيبي ، ألف سلامة عليك ، ولما تخف أتصل بيا وعرفني  ، يالا مع السلامه ...
• مراد : مع السلامه .
- يعني إيه ، هي حبيبة معملتش حاجه ، هي ما قالتلي هخليك تسيب شغلك ، طب ما المدير بيقولي مجتش ليه ، انا رجعت تاني مش فاهم حاجه ، هي البنت دي بتعمل معايا كدا ليه ، وليه تصرفاتها غريبة كدا ، أنا حقيقي مقابلتش شخصيه غامضة بالشكل دا ابدا ، طيب أنا أتصرف إزاي دلوقتي ، أتصل بيها وافهم منها ، ولا اعمل إيه بس ، أنا مش هكلمها وهاروح النادي تاني ولازم أقطع علاقتي بيها ، عايز كل حاجه ترجع طبيعية زي الاول .
.
يوم الاتنين .. الساعه 7 بالليل .
مراد إتصل بمدير الحمام ورجع الشغل تاني .
.
• مراد : ازيكم يا ولاد ، وحشتوني جدا ، عاملين إيه ، يالا غيروا وتعالوا بسرعه ...
• مدير الحمام : ازيك يا كوتش ، أخبارك صحتك إيه ، ألف حمد لله على السلامه ...
• مراد : الله يسلمك يا افندم ، أنا بخير الحمد لله ، بقولك أنا ملاحظ غياب أدم ، هي في حاجه حصلت ..!!
• مدير الحمام : أبدآ يا سيدي ، هو بقاله حصتين مش بيجي التمرين ...
• مراد : طيب تمام ، شكراً يا افندم .
- أدم بقاله حصتين غايب ، طيب مش بيجي ليه ، يمكن حبيبة منعته يجي التمرين ، ولا هي فعلاً عايزه تخرج من حياتي ، ولا يمكن تعبان أو حاجه ، بس لو كان تعبان كان حد أتصل بمدير الحمام ، أو حتى حد كلمني وعرفني ، فيه حاجه غلط .
.
خلص اليوم ، ومراد في طريقه خارج من النادي ، في صوت حد بينادي ، مين دا ، دا أبو حبيبة ، سيادة الرائد ، مراد إرتبك ، شكلها بداية المشكل يا مراد .
.
• أبو حبيبه : مساء الخير يا كابتن مراد ، أنا الرائد صلاح عبدالله ، والد أدم اللي بيتمرن معاك ..
• مراد : أهلا وسهلا يا افندم ، حضرتك غني عن التعريف ، وأنا سألت على أدم إنهارده قالولي بقاله حصتين مش بيجي التمرين ...
• أبو حبيبه : أيوا دي حقيقه ، هو فعلا بقاله حصتين غايب ، عشان حبيبة بنتي ، اللي كانت بتجيبه النادي تعبانه شويه ، وهو مش عايز يروح من غيرها ...
• مراد : ألف سلامة عليك يا افندم ، وهو أدم فعلاً متعلق بيها جدا ، أنا كنت بلاحظ دا ، بس كدا مستوى أدم ممكن يقل بسبب قلة الممارسه ...
• أبو حبيبه : فاهم طبعاً ، عشان كدا أنا وقفتك دلوقتي ، أنا عرفت إن مدرب كويس ، وكمان أدم بيحبك أوي ومتعلق بيك ، أنا بقترح عليك ، تيجي تمرن أدم عندنا في حمام الڤيلا ، وطبعا هيبقالك مرتب شهري كويس جداً ...
• مراد : واللهي دا شرف كبير ليا افندم ، وأنا مقدرش ارفض لحضرتك طلب ..
• أبو حبيبه : خلاص اتفقنا ، دا الكارت بتاعي ، أبقى اتصل بيا ونحدد المواعيد مع بعض ..
• مراد : تحت امر حضرتك .
* المره دي القدر عنده رأي تاني ، مراد كان فاكر إن حبيبه بتبعد عنه ، وهو كان عايز يرجع طبيعي ، بس دا مش هيحصل ، دلوقتي بعد ما جاتله البيت وطردها ، هو رايح لها الڤيلا ، ودي مش اي ڤيلا طبعاً ، أنا مؤمن بحاجه وهي إن الحب بيلاقي طريق لقلبك دايما ، ويقدر يجمع بين أي أتنين حتى لو بينهم مسافات طويلة ، بس في هنا سؤال هو اللي بين حبيبه ومراد دا حب فعلا .
.
* هي فيه كام واحد وواحده بيحبوا بعض في العالم ، يمكن ملايين أو اكتر ، مفيش إنسان مش بيحب ، دايما بيعدي علينا شخص واحد مختلف ، بنشوفه بقلوبنا مش بعيونا ، شخص واحد بيقدر يخلينا نشوف الدنيا دي بشكل تاني ، بنحب الدنيا عشان مع بعض ، خليك واثق إنك هتتحب ، ويمكن إتحبيت وانت مش عارف ، ويمكن اللي بتحبه هو كمان بيحبك ، وممكن يوم اللي بعيد عنك بيحبك ، الحب ملوش صوره معينه ، ولا ليه طريق واحد ، فيه حب واضح ومفهوم ، وفيه حب غامض ومجهول ، فيه حب بيدوم لسنين ، وفيه حب مش بيعدي عليه يومين ، بس ارجع واقولك حب اللي يحبك حتى لو لثواني ، وأحبب ما شئت فإنك مفارقه .
يتابع 💙5