سوف نلتقي

الجزء السادس

#.. أول يوم في الڤيلا ..#

- مراد كان متردد ، بس ميقدرش يخلف كلامه مع سيادة الرائد ، بس حبيبة هنا ، وهو عارف لو حد لاحظ حاجه إيه اللي ممكن يحصل فيه طبعاً ، بس الحب زي ما بيكسرنا ، هو كمان بيقوينا ، بيخلينا اقوى ، ومراد ميملكش غير الحب ، وحبيبة لحد دلوقتي مقالتش بحبك ، خلينا نشوف بكره مخبي ايه ..
.
• أدم : إزيك يا كابتن مراد ، حضرتك وحشتني أوي ، أنا مكنتش عارف اجي التمرين علشان حبيبة تعبانه ، ومش بحب اروح من غيرها ...
• مراد : إزيك يا ادم ، انت كمان وحشتني ، ولا يهمك يا عم اديني جيتلك لحد هنا ، وكمان هنتمرن في حمام السباحه بتاع البيت دا ...
• أدم : بجد يا كابتن مراد ، أنا مبسوط أوي ...
• مراد : قولي بقى هي أختك حبيبه كويسه ..!!
• أدم : ايوا ، بقيت كويسه ، الدكتور كان هنا إمبارح وكشف عليها ...
• مراد : طب هي فين دلوقتي ..؟!
• أدم : في الاوضه بتاعتها ، هنا فوق ، هي نايمه ..
• مراد : طيب يا حبيبي ، إبقى سلملي عليها ، وقولها كابتن مراد بيقولك ، الف سلامه عليكي ...
• أدم : حاضر يا كابتن .
• مراد : يلا بينا يا بطل ننزل المياه .
- اليوم خلص بالنسبه لـ مراد ، هو كان حاضر بجسمه  لكن عقله وتفكيره فوق في الاوضة بتاعت حبيبه .
.
* مراد وصل الشقه ، حاول كتير يعلي صوته عشان حبيبه تحس بوجوده ، لكن للأسف محصلش ، فقرر يكلمها على الواتساب ، أيوا مش هيخاف ، مش معقول يكون دا مجرد إحساس عادي ، ومستحيل يكون هو
بس اللي حاسس بكدا ، بس هيقولها ايه ، ياترا يعترفلها بحبه ، ولا يعمل نفسه بيطمن عليها ، ولا يقولها إنه كان عندها في الفيلا ، ولا يقول ايه ، وبعد تفكير طويل قرر خلاص هيكتب إيه ..
.. { حبيبه ، إزيك يارب تكوني بخير ، أنا عرفت إنك كنتي تعبانه شويه ، ألف مليون سلامه عليكي ، كنت عايز اقولك إني كنت عندكم في الڤيلا إنهارده ، أيوا بباكي كلمني عشان اجي امرن أدم ، وأنا مقدرش ارفض طبعاً ، بس كنت عايز اطمن عليكي ، وسألت أدم عليكي ، قالي إنك نايمه ، محبتش أزعجك ، سوري لو طولت عليكي ، وياريت تطمنيني } ..
- المسج بقاله يومين مبعوت ومفيش رد ، والغريب إن حبيبه بتفتح واتس ، يعني هي عارفه إن مراد بعتلها مسج ، ورغم كدا مش بترد عليه ، طيب دا يتفهم إزاي ...
              # .. تاني يوم في الڤيلا ..#

• مراد : إزيك يا آدم ، عامل إيه إنهارده ، يالا شد حيلك معايا يا بطل ، مفضلكش كتير ..
• أدم : حاضر يا كابتن ..
• مراد : أدم ، تعالا عايزك ، هي حبيبة هنا ..!!
• أدم : أيوا يا كابتن هي في الاوضه بتاعتها ...
• مراد : هي مش بتخرج منها ولا لسا تعبانه ..؟!
• أدم : لاء هي كويسه ، وكانت في الجامعه إنهارده ، وبتخرج كل يوم ...
• مراد : طيب إنت سلمتلي عليها زي ما قولتلك ...!!
• أدم : ايوا يا كابتن ، وقالتلي الله يسلمك ..
• مراد : طيب يا آدم ، يالا تعالا ننزل المياه ..

- اليوم خلص عادي جداً ، والغريب إن مراد لسا بيحاول يلفت انتباه حبيبه ، بس حصل حاجه مكنتش متوقعه خالص ، حبيبه طلبت من أدم يجيب مراد عندها ، في الاوضه ، وطبعاً هو هيكون عندها في الڤيلا ، بتاعت سيادة الرائد ، بس طبعاً هو كان هيموت ويطمن عليها ، فقرر يطلع لها الاوضه .
• مراد بعد ما خبط علي الباب : السلام عليكم ، يا باشمهندسه ...
• حبيبه : تعالى أدخل يا مراد ...
مراد : إزيك يا ست البنات ، عامله أيه ..!!
• حبيبه : حلوه ست البنات دي منك ، أنا كويسه ، طول ما انت كويس ..
• مراد : شكل المود عالي ، امال بيقولوا إنك تعبانه ، وأنا شايفك زي الفل اهوو ...
• حبيبه : هههههه ، بقيت كويسه خلاص ...
• مراد : بس على فكره أنا زعلان منك جامد ، علشان بقالي يومين بكلمك على الواتس مش بتردي ، دا غير إني باجي الفيلا هنا ومش بشوفك ...
• حبيبه : معلش يا مراد ، سامحني ، أنا كنت مشغوله اليومين دول ، خرجت من دور التعب ، للجامعه والمشاريع ، والدنيا ملغبطه على الاخر ...
• مراد : ألف مليون سلامه عليكي يا حبيبه ، يارتني أنا بدالك ..
• حبيبه : لاء يا مراد ، إنت لاء ، انت غالي عندي اوي ومستحملش حاجه تضرك ...
• مراد : تعرفي إني كنت مفتقدك جداً ، وكمان كنت هموت واكلمك واسمع صوتك ...
• حبيبه : أنا كمان كنت مفتقداك ، وعارفه إني زعلتك بكلامي اخر مره لما كنت عندك في الشقه ، بس متزعلش مني ، انا اسفه ...
• مراد : اهو كلامك دا اللي زعلني ، انا مش مستحيل أزعل منك يا حبيبه ، إنتي بالذات تقولي اللي يعجبك ، على قلبي زي العسل ..
• حبيبه : والنبي إنت اللي عسل يا مراد ..
• مراد : إيه دا إيه ، الباشمهندسه بتعاكسني ، ههههه ...
• حبيبه : ما انت اللي حلو يا عم انت ، ههههه ...
• مراد : أنا كدا أطمنت عليكي ، وياريت تبقى تردي عليا وتكلميني ، اشوفك وشك بخير ...
• حبيبه : متخليك شويه كمان يا مراد ، أنا مبسوطه جدا بوجودك جنبي ...
• مراد : أنا جمبك طول الوقت يا حبيبه ، وعمري ما هبعد عنك ابداً ...
• حبيبه : توعدني يا مراد ..؟!
• مراد : أوعدك يا حبيبه ..
• حبيبه : مهما حصل يا مراد ..؟!
• مراد : مهما حصل يا حبيبه ، وطول ما فيا نفس ، مش هسيبك ولا هتخلي عنك ..
• حبيبه : عارف يا مراد ، أنا لو مت دلوقتي ، هكون مبسوطه جدا ، علشان إنت اخر حد هتشوفه عيني ، إنت حاجه نادره جداً يا مراد ...
• مراد : إنتي اللي كنز ، ياقوت نادر الوجود ، ربنا يخليكي ويسعدك دايما يارب ...
• حبيبه : ويخليكي ليا يا رب يا مراد ، وميحرمنيش منك أبداً ، ولا يبعدك عني ...
• مراد : إن شاء الله يا حبيبه ، إنتي بس شدي حيلك كدا وقومي بالسلامه ، وركزي في دراستك ، وكل حاجه هتكون بخير ..
• حبيبه : مراد ممكن اطلب منك طلب ..؟!
• مراد : اطلبي يا حبيبه ...
• حبيبه : عايزاك توعدني لما أموت ، تفضل فاكرني ، وكمان تيجيلي القبر ، وتحكيلي عن اللي بيحصل معاك أول بأول ...
• مراد : ليه بتقولي كدا يا حبيبه ، بعد الشر عليكي ، إنتي هتعيشي وهتحققي كل أحلامك كمان ، بلاش يائس كدا ...
• حبيبه : مراد أنا عايزاك توعدني بكدا ...
• مراد : خلاص هوعدك ، بس متقوليش الكلام دا تاني قدامي ..
• حبيبه : طيب يالا بقى قوم علشان تروح ، قبل ما بابا يجي ، ويقولك حاجه ...
• مراد : حاضر أنا همشي ، بس ابقي افتحي واتساب ، علشان اكملك وأنا في الطريق ...
• حبيبه : حاضر يا مراد ..
• مراد : أشوفك على خير يا حبيبه ..
• حبيبه : مع السلامه .
.
* عارفين إحساس الشبع بعد جوع طويل ، أو الشرب بعد عطش طويل ، أو إحساس الطمأنينة بعد الخوف والرعب ، أو إحساس نجاح شاب في الثانويه بمجموع كبير ، دا اللي كان حاسس بيه مراد ، هو مكنش عايز غير يطمن على حبيبه ، عايز يحس إنها بخير ، كانت وحشاه ، ودلوقتي اتكلموا ، وانتوا أكيد عارفين يعني
إيه إتنين يتكلموا بعد فتره ، إحساس حلو ، وتبقى مش محظوظ لو معشتوش ، أو محستوش قبل كدا ، خلينا نرجع لـ موضوعنا ، مراد خلاص ، عرف إن حبيبه بتحبه ، هي صحيح مقالتش ، بس هو شاف دا في عينيها ، وهو كمان مقلش بس أكيد حست بيه ، كلمة بحبك مش لازم نقولها بلسانا ، ممكن نقولها بعيونا ، أو بهديه بسيطه ، أو خروجه حلوه ، أو سهره طويله بعد نص الليل ، أو ورده حمره ، أو موقف جدعنه ، فيه مليون طريقه تقول بيها بحبك ، بس إحنا متعودين على حاجه ، الحلو مش بيكمل ، دايما مش بيكمل ، الصوره لازم تكون ناقصه ، ومراد وحبيبه ، مجرد بشر ، يعني لازم يصبهم الحزن ، ودي المفاجأة ، اللي أنا محضرهالك ، علشان تصدقني لما اقولك ، إني مختلف المره دي ، كنت متوقع كل دا يحصل ، طب كنت قادر تتوقع الأحداث تمشي كدا من البدايه ، أكيد طبعاً لاء ، أنا مشيت عكس المفروض والطبيعي ، بس متقلقش أنا عايزك بس تركز ، وأنت هتقدر تفهم ، القصه غريبه ، بس بتحصل كتير .
.
* قبل ما أكمل كلامي ، عايز اقولك ، متخليش حاجه تشغلك عن الجزء اللي جاي ، دا أهم جزء في كلامي ، يعني لازم تكون فاضي ، دلوقتي التربيزه ، هتتقلب خالص ، والنور هينطفي ، وقت الحزن جه ، مفيش قصة حب مفيهاش دموع ، بلاش أقولك أكتر من كدا ، بس عايز أوعدك إنك هتشوف حاجه مختلفه ، مختلفة لدرجة إنك ممكن تعيط ، أو ممكن تضحك ، مش متأكد بس أوعدك تشوف اللي عمرك ما شفته ، ولا هتشوفه .
يتابع 💙6