سوف نلتقي

الجزء الثامن

* حبيبه عندها كانسر ، حبيبه عندها كانسر ، دا الصوت اللي كان بيصحى عليه مراد من النوم ، إحساس غريب ومخيف في نفس الوقت ، عارف انت لما تعيش عمرك كله مستني حاجه ، وتيجي الحاجه دي بس تكون ناقصه ، مراد بعد ما عاش شبابه مستني ، مستني واحده زي حبيبه ، لاء هو كان مستني حبيبه نفسها ، دي البنت الوحيده اللي كملت في عنيه ، وفجأة يطلع عندها كانسر ، مش هحكيلك عن الوجع اللي بيشوفه مريض الكانسر والعلاج الكيماوي ، سيبك من كل دا ، تعرف إن اللي بيكون عنده كانسر ، دا مات خلاص ، ايوا دا مشي نص الطريق للموت ، زي ما بيقولوا رجل في الدنيا  ورجل في الاخره ، وكفايه إحساسك وانت عارف إن عندك السرطان ..
.
.. حبيبه حاولت تبعد عن مراد ، هي مش عايزاه يتعلق أكتر من كدا ، الفراق وحش ، ومراد أكيد أكيد مش قده ، دلوقتي تقدر تفهم السبب اللي عشانه حبيبه مكنتش بتبين حبها لمراد ، أصل الحب مش إن تبقى عايز حبيبك معاك وبس ، الحب إنك تختار الأنسب لحبيبك دايما ، مراد فهم دا كويس ، وحاسس بالندم والحسرة ، من ناحيه عشان ممكن حبيبه تروح منه ، وناحية تانيه عشان الحب اللي هيموت معاها ، إحساس بيوجع مش كدا ، نفسي أفهم ...
.
- هو ليه الحلو دايما مبيكملش ..؟!
- ليه مش بناخد اللي نفسنا فيه ..؟!
- هو احنا مش من حقنا نفرح أبداً ..؟!
.
الخلاصه :- الدنيا عباره عن إختبار من المولى عز وجل ، وواجب علينا نستحمل ، ونكون قد الإختبار دا ، ومفروض علينا نرضى باللي مكتوب ، ربنا مش ظالم ولا بيرضى بالظلم ، بس هو قال إننا طبقات ، يعني زي ما فيه ناس مرتاحين في حياتهم ، في ناس كتير حياتهم كلها حزن ووجع وألم ، بس أوعى كلامي دي ينسيك إن ربك إسمه العدل ، يعني أكيد بعد الحزن هيجي الفرح ، وبعد الجحيم هيجي النعيم ، بس إحنا نرضى ، ونقدر نفهم .
.
                     # .. أول يوم في الكانسر .. #

• حبيبه : أنا مش عايزاك تزعل يا مراد ، بلاش تخليني أشوف الحزن دا في عنيك ، صدقني أنا مبسوطه بإرادة ربنا ، وكفايه إنك جنبي ..
• مراد : أنا مش زعلان يا حبيبه ، أنا بس مش قادر أصدق إنك ممكن تروحي مني في يوم ، مش عارف هعيش إزاي لو حصلك حاجه ، إنتي جيتي من السماء يا حبيبه ، جيتي في وقتك عشان تجبري بخاطري ..
• حبيبه : عارف يا مراد ، أنا مش عايزه حاجه تاني من الدنيا خلاص ، كفاية إنك معايا ، كفاية أشوف صورتي في عنيك ، أنا بحبك أوي يا مراد ، ومحبتش قبلك ولا ممكن أحب غيرك ، أنا لو مت دلوقتي هكون مبسوطه ، عشان إنت اخر حد هشوفه ..
• مراد : متقوليش الكلام دا يا حبيبه ، إنتي مش هتموتي ، وهتتغلبي على المرض دا ، إنتي قوية جدا وأنا واثق فيكي ، صدقيني بكره تقومي وتبقي زي الأول وأحسن كمان ، بس إنتي خليكي شجاعه ، واوعي تستسلمي عشان خاطري ..
• حبيبه : هحارب لآخر نفس فيا يا مراد ، بس مش عشان أنا عايزه أعيش ، لاء عشان نكون مع بعض ، أنا كان نفسي اقابلك من زمان ، يمكن كنا عرفنا نحب بعض ، بس يلا محدش بياخد أكتر من نصيبه ، وأنت نصيبي يا مراد ، نصيبي وقسمتي كمان ، وأنا بحبك ..
• مراد : أنا بقى معرفتش الحب غير على إيدك ، مفيش بنت إختلفت في عيني غيرك ، وجودك هو طريقي اللي ماشي فيه ، بالله عليكي يا حبيبه بلاش تمشي وتسبيني لوحدي ، أنا خلاص اتعودت عليكي ، مش هعرف أكمل حياتي من غيرك ..
• حبيبه : متعيطش يا مراد ، مش عايزه أشوف الدموع في عنيك أبداً ، أنا مش هسيبك مش هبعد عنك ابداً ولا ثانيه ، بش بلاش تعيط عشان خاطري ، تعالى في حضني يا مراد ، خليني أرتاح شويه ، عايزه انسى إني مريضه ..
• مراد : تعالي يا حبيبه ، خلينا ننسى كل اللي إحنا فيه دا ولو لثواني ..
• حبيبه : عارف يا مراد ، أنا بجد نفسي أخف عشانك ، نفسي نعيش مع بعض ، ونتجوز ونخلف بنات وولاد كتير أوي ، مش عايزه أبعد عنك ..
• مراد : هيحصل يا حبيبه ، أوعدك إن كل دا هيحصل قريب كمان ، وهنعيش مع بعض ، ونعمل كل اللي نفسنا فيه كمان ..
• حبيبه : مراد عايزاك توعدني بحاجه ..
• مراد : قولي يا حبيبه ، كل اللي هتقولي عليه أنا هعمله والله ..
• حبيبه : اوعدني لو حصلي حاجه ، تخلي بالك من نفسك ، وتعيش حياتك من تاني ، وتحقق حلمك اللي جيت عشانه القاهره ..
• مراد : عارفه يا حبيبه ، أنا كنت فاكر إني جيت القاهره عشان أدرس واشتغل وابقى شخص ناجح ، بس أكتشفت إن دا مكنش حلمي ، إنتي كنتي حلمي يا حبيبه ، طول عمري كنت مؤمن إن ربنا شايلي حاجه حلوه ، واديني لقيتك ، إنتي احلى هدية من جاتلي
من السما ..
• حبيبه وهي بتعيط : كان فينك من زمان يا مراد ، كان فينك من زمااان بس ..
• مراد بعد ما عنيه إحمرت من الدموع : كنت بدور عليكي يا حبيبه ، كنت مستنيكي ، لفيت كتير عشانك ، إنتي اللي كنتي فين يا حبيبه ..
• حبيبه : أنا خايفه أوي يا مراد ، خايفه أموت بعد ما عرفتك ..
• مراد : مش هتموتي ، مش هتموتي يا حبيبه ، إن شاء الله مش هيحصلك حاجه ..
• حبيبه : مراد أنا تعبانه أوي ، قلبي واجعني أوي ، حاسه إن مش هكمل ..
• مراد : أنا مؤمن بيكي يا حبيبه ، ولازم إنتي كمان تكوني مؤمنه بنفسك لو فعلا بتحبيني ، دا مجرد إختبار لينا عشان نكمل ، وهنعدي وإحنا مع بعض ..
• حبيبه : خليك جنبي يا مراد ، أوعى تبعد عني خاالص ، خليك جنبي دلوقتي ، يمكن مقدرش أشوفك بكره تاني ..
• مراد : طيب عشان خاطري ، بلاش تعيطي ، مش عايز حزن ، كل حاجه هتكون كويس ، أوعدك كل حاجه تكون كويسه .
.
* تقدر تقولي بتعيط ليه إنت كمان ..؟! ، تعرف أنا كمان بكتبلك الكلام دا وأنا بعيط ، هي صحيح مجرد سطور بس كل دا واقع ، كل دا بيحصل كل يوم ، كام بنت عندها كانسر ، وكام قصة حب إنتهت بسببه ، لما حد عزيز علينا بيسافر برا مصر لفتره طويله ، بنحس إننا نقصين حاجه ، جزء جوا قلوبنا بيكون مفقود ، دا اللي بيسافر ، ما بالك بقى لما يبقى حبيبك قدام عنيك وبيتألم ، وأنت مش قادر تعمله حاجه ، وتبقى عارف
إنه ممكن يموت في أي لحظه ، يعني وجوده في حياتك مسألة توفيق من ربنا ، هفضل مؤمن إن اللي مدقش إحساس فراق الاحبه ، مدقش وجع ولا شاف فراق أبداً ..
.. خلينا نرجع لـ قصتنا ، دلوقتي حبيبه بتتعالج ، بس العلاج لوحده مش كفايه ، هي محتاجه تكون شجاعه وتقدر تحارب ، ايوا تحارب مش قولتك قبل كدا دي حرب ، ومحتاجه بطل شجاع ، وكمان محتاجه سلاح ، ومراد هو السلاح دا ، بيقولك الحب علاج ، وميكنش علاج ليه ، مين فينا مبيرتحش لما بيسمع صوت حد عزيز عليه ، مين فينا مش بيضحك لما بيشوف حد عزيز عليه ، مين فينا يقدر يوصف فرحة أي شخص في يوم جوازه على حد بيحبه ، الحب بيقدر يسعد ، وبيقدر يعالج كمان ، وبردو بيقدر يوجع ، ويقتل ويسبب حسرة وخوف ، تفتكر الحب يقدر يعالج الكانسر ..؟!
.
* عشان مسرقش الأحداث منك ، حبيت أقولك إن أبو حبيبه عرف كل حاجه ، عرف إن بنته بتحب مراد ، والظروف قدرت تخليه يشوف الحب ، الحب اللي جمع بين بنت الرائد صلاح الدين والكابتن مراد ، وكمان بقى متصالح جدآ مع مراد ، ووعدهم إن حبيبه لو قدرت تتغلب على المرض دا ، هيتجوزوا على طول ، يعني دلوقتي مفيش عقبات في الطريق بينهم ، خلاص كل الحلو مستني ، بس مستني ايه ، دا كانسر ، وربنا يكفيك شر الكانسر ، ووجع الكانسر ، والحزن على عزيز مصاب بالكانسر ، دلوقتي كل حاجه متوقفه على حبيبه ، هي بس تخف ، وبعدها مفيش ألم تاني ، مفيش غير مراد وحب مراد وبس ، ربنا يشفيكي يا حبيبه .
يتابع 💙