لواء الشيطان

البارت الحادي والعشرين

(الزائر الجديد)
بالليل هالة رجعت لي جوليا بي تلفون
جوليا: عايزة مني شنو مش بعتيني عشان خاطر صهيب؟
هالة : ببيعك طوالي يابت ده الحب، وبعدين سبتك عشان تمشي مع راشد وتتبيني صحة كلامي
جوليا : تاني حاتقولي لي عواراتك دي، راشد شنو ياخ، ماشفتي عمل معاي شنو بدون سبب هب فيني  ونهرني بي صوتو المخيف ده
هالة ضحكت فيها ضحك شديد: قال ليك شنو يعني
جوليا : مابوريك يلا، تضحكي وانا محروقة كده ومتغاظة؟
هالة : عشان هو غيران قلتا ليك لكن كبريائو مانعو يقولا ليك عديل
جوليا : يقول لي انا غاير قصدك؟
هالة : يقول ليك بحبك ياام مخ تخين
جوليا : يحبك أبوي، انتي مجنونة ولا شنو قلتا ليك بحب حنان، كان بتغزل فيها وكاتب ليها شعر في الحالة في الواتس
هالة : كتب شنو يعني
جوليا : هيفاء شنو كده مابعرف قالت هي ابنة القمرِ، غايتو كلام رومانسي جميل، اها اتزكرتا دقيقة هيفاء غارتني بسهام عينيها سألتها من أنتي قالت ابنة القمرِ
هالة : وهي حنان هيفاء؟ مش شفتيها؟
جوليا : انا مابعرف معنى هيفاء أساساً
هالة : ماعاملة لي فيها بتعرفي عربي وبلاغة وشابكاني تورية وبتاع
جوليا : اها عرفيني انتي ياخبيرة اللغة
هالة : هيفاء يعني النحيفة ذات الخصر الضامر
جوليا : ايواااا ، بخصوص حنان مامتأكده لأنها كانت قاعدة فما شفتا خصرها ده والله مااتكرمت قامت سلمت علي، سلمت وهي محشورة بين الكرسي والتربيزة
هالة : ههههههههههاي والله انتي مضحكة خلاص، المهم حسي هو قاصدك إنتي
جوليا: هالة اطلعي من راسي مالك علي، ماقاصدني أنا ولا شي ومنو القال ليك أنا حسي هيفاء إنتي صهيب ده جننك ولا شنو
هالة : إنتي أكيد ماجادة، مابتشوفي المراية مامتعرفة على شكل جسمك كيف؟ نضفي المراية شكلها وسخانة ومابتنضفيها
جوليا: هالة اختيني بلييز
هالة : ههههههه خلاص خليتك اها إنتي حرة، تعرفي ياجوليا؟ إنتي مختلفة من سهى كتير، سهى كانت حساسة ومابتحب هظاري وبتزعل مني، كنت كتير بحاسب على كلامي عشان ماتتحسس، معاك إنتي بشوت شمال يمين ولا بتهتمي
جوليا : ههههههه سهى دي ملاك فاكراها معولقة زيي أنا؟ اخدي راحتك أنا أحاسيسي دلجة مابهتم
هالة : طيب مالك بتتحسسي من راشد
جوليا : يوووووووه قاشرة طيري شوفي حبيبك بي وين واختيني انتي وود عم صحبتك ده
هالة : والله عااااجبك ماتنكري
جوليا : بنكر يازولة مالك إنتي
هالة : طااايب مامشكلة بس لمن يرسلو يعزموك للعرس ماتبكي بعدين
جوليا : إنتي يابت ماحزرتيني قبل اليوم من الموضوع ده إنو ممكن نميل لي بعض وإنو اخد حزري؟ حسي مالك بتشجعيني
هالة : لو الواحدة لقت زول يحبها ماتفرط فيهو وتقالع فيهو لو في واحدة غيرها في الخط
جوليا : هالة صدقيني راشد حق حنان وعلى وشك يعرسا، أنا شفتا شقتهم وكيف فارشنها ومجهزنها، ولو راشد معجب بي زي مابتقولي فده مضايقو مني أكتر وماحابب الشي ده فما بقدر اشجعو، لو ماالظروف الفقرية جمعتنا في الحلم ماكنت حااشوفو ولا هو كان حايتلفت لي لو جيت ماشة بجمبو، افهميني دي احاسيس خلقتا الظروف ماحاجة دايمة
هالة : يازولة مابشجعك خلاص خليتك
جوليا : مصير القضية ترسى على مرسى وينتهي كل شي ويواصل محل ماوقف
هالة : طيب ماممكن تستغلي الحتة دي وتعيشي كم يوم حلوين في مشاعر حلوة وعلاقة حب ملتهبة؟
جوليا: بعدين الالتهاب ده اروحو كيف
هالة : اخدي كورس أنتي ڤايوتك
ضحكو الاتنين لمن بصرخو من الضحك
جوليا: الله يهديك
هالة : يهدي الجميع، يلا سلام صهيب متصل
جوليا: تمعطيني ولما يجي صهيب تجري جري، خففففففة
هالة : اااااي إنتي حارقك وين
إتوادعو وقفلت جوليا منها وختت تلفونا وهي لسه بتضحك....
              *******************************
راشد رجع الشقة بعد وصل جوليا ودخل ورما حاجاتو بعصبية، حس إنو إتعامل مع الموقف بي تهور، إنفعل وكان حايعمل شوشرة ويلفت نظر الناس، محتار ليه حس بي الغضب لما ماعبرتو طول اليوم وكانت لطيفة مع صهيب؟ ليه بيناتهم بس الجدل والنقاش والصوت العالي؟ إتزكر زلة لسانو لما قال ليها عدم قربها هو المشكلة، كأنو بعترف إنو بكن ليها مشاعر وده أكبر غلط..
مسك تلفونو إتصل على خالو، خالو  طبيب نفسي، حس انو لو فضفض ليهو احتمال يفهمو ويوريهو يتصرف كيف لأنو بقى محتار
راشد: خالي، إزيك ياخي عاش من شافك
الخال واسمو مصعب: اووووه إبن اختي! إزيك ياراجل امورك وصحتك
راشد: الحمدلله بس مضغوطين شديد الفترة دي
مصعب : كان الله في العون ان شاءالله
راشد: انت فاضي؟ عايز الاقيك ضروري
مصعب : انا في العيادة لكن قربتا اخلص عندي مريض واحد بس لسة مادخل، مر علي نطلع سوا ومسافة توصل بكون غالباً انتهيت
راشد: خلاص تمام بوصلك ماف مشكلة...
إتحرك مشى ليهو ووصلو لقاهو خلص وقفل العيادة وطلعو سوا قعدو في مكان هادي
مصعب : كيفك ياجنابو بقينا نشوفك كل فين وفين
راشد : ماعارف ارتاح انا من الشلهتة والله ياخال جري جري كتير
مصعب : اخترتا مهنة صعبة
راشد: انت كيفك وكيف الاولاد وامهم
مصعب : الحمدلله والله، ياهو زخم الحياة والروتين، اخبار البحث عن المجرم القتل بت عمك شنو ما اتوصلتو لي شي؟
راشد: غايتو في تقدم بسيط، الله يسهل بس
مصعب : هااا كنت دايرني في شنووووو
راشد: مشورة كده بخصوص واحد صاحبي
مصعب: خيير
راشد: هو بمر بحالة غريبة كده، في واحدة بعرفا من فترة قريبة، واحدة ابعد ماتكون عن ميولو، فيها الصفات الما بحبها كلها، بكون معصب من يلاقيها
مصعب: طيب
راشد: بس كمان بقى ماقادر يشيلا من بالو ومحتاج يشوفا طول الوقت حتى لو الشي ده بزعجو، عايز يعرف كيف ممكن تتشد لي إنسان بترفضو بي كل المقاييس؟
مصعب إبتسم بي خباثة: الشخص ده صاحبك ولا إنت بنفسك صاحب المشكلة
راشد عاين ليهو مدهوش وقال : لييه بتسألني وأنا وريتك من أول كلامي
مصعب: الحيرة الفي عيونك دي كلها معقول لي صاحبك؟
راشد سكت وعاين بعيد
مصعب : لو عايزني جد اديك رايي لازم تكون معاي صريح، واعتبر في بيناتنا حقوق السرية التامة زي مابعمل مع المرضى العندي، البتتكلم عنو ده إنت؟
راشد إتنهد وغمض مسافة وتاني قال ليهو : ايوة أنا
مصعب: حسيت كده، اها كمل
راشد: صدقني ماعارف مالي وليه بالي مشغول كده، إنت لو تشوفا حاتعرف انو أنا لايمكن اكون عاقل
مصعب : طبيعي شعورك يتغير ده ماشي غريب، مرات الإنسان بميل للحاجات او لي الأشخاص الغلط، مالسبب مهم عادي يعني، إنت ليه متضايق
راشد: لازم اتضايق ياخال، أنا في انسانة في حياتي واخترتها بنفسي ومفروض هي البتشغل تفكيري ماواحدة تانية
مصعب: خطيبتك إنت اخترتها بعقلك حسب إحتياجاتك لزوجة المستقبل وراحة بالك بعدين، لكن قلبك إعترض المرة دي وعايز ياخد دور هو كمان، إنت ماإستخدمت مشاعرك قبل اليوم ياراشد ماظنيت انك حبيت وعملتا علاقة حتى في أيام المراهقة، أبوك وأمك عيشوك في دور الراجل الكبير المسؤول من شبيت فلغيت الجانب العاطفي من شخصيتك واخدت الجانب العملي
راشد: بس كيف؟ ليه قلبي مال للرافضا عقلي وكل مااحاول ابعد مابقدر؟
مصعب: اصلاً مشاعر الحب أو الإعجاب مامنطقية، ممكن تحب شخص بدون سبب حتى لو كان سىء ومعلول، في حب مرضي بتتعلق بي إنسان بطريقة ماطبيعية ويبقى بالنسبة ليك هو الحياة وإلا حاتموت، في ناس بجنو وبفقدو عقلهم عشان فقدو الحبيب او الحبيبة في عرس او موت او اي سبب تاني، و في حب جسدي وده جزوتو بتروح سريع بزوال اللهفة، يعني مشاعرك دي ماغريبة ، واديك اوضح مثال إنو اطراف المغناطيس المتضادة بتتجاذب والمتوافقة بتتنافر ولا كييف؟
راشد سكت مسافة وقال : حتى لو كلامك صاح، في عوامل كتيرة تمنعني استسلم لي مشاعري
مصعب مبتسم وقال : زي شنو؟
راشد: انا ملتزم بكلمة مع خطيبتي حنان وأهلها، تانياً فرق العمر بيني وبين البنت كبير جداً هي عمرها ١٩ سنة او ٢٠ بي الكتير وأنا ٣٦ سنة فرق شاسع بيناتنا في اي شي هي طفلة  بالنسبة لي، وبعدين ظروف معرفتي بيها ماطبيعية وحاسس إنو الأنا فيهو ده فورة حاتنتهي قريب
مصعب: هو في مسألة إنك خاطب وعلى وش زواج دي سبب معقول لي خوفك من احاسيسك تطور وتظلم حنان معاك، اما مسألة العمر ماصعبة، عادي في رجال بعرسو بنات صغار شديد قد توصل الفرقة لي ٢٠سنة واكتر وبعيشو عادي ، نجي لي مسألة التعارف دي، هي اسمها منو بالمناسبة وإتعرفتا بيها وين؟ انا غايتو من خلال سنها ده بقول صاحبة اختك؟
راشد: ياخال مروة عمرها ٢٤ سنة يعني ماصاحبتا ولا بتعرفا، هي إسمها جوليا عرفتها بعد اختفاء سهى طوالي، هي صحبتا كانت وطلعو سوا في اليوم اللي سهى اختفت فيهو ومارجعت تاني ،أول مرة لاقيتا عشان اعرف منها وين فارقت سهى وكيف، من أول لقاء لينا كانت مستفزه جداً ومتحدية وبترد كلمة بكلمة، سبب شوفتي المتكررة ليها بعد كده بسبب انو سهى سابت لينا رسالة عن الحصل ليها شنو وسبب صداقتا بي جوليا ونبهتني انو جوليا في خطر ولازم احميها من انو تقع في نفس مصير سهى، بتزكر حكيت ليك عن الحصل لي سهى كلو لكن ماجبتا سيرة جوليا
مصعب : ايوة كلمتني، شي مؤسف جداً، ربنا يرحما إن شاءالله
راشد: والمشكلة الاساسية كانت غير انو جوليا كانت ضحية محتملة للعصابة اياها فهي كمان الشاهدة الوحيدة الشافت الشخص الاختفت معاهو سهى وحفظت شكلو من غير هي تنتبه ولا هو ينتبه
مصعب: جد موضوع ملخبط
راشد: غصب عني بفكر فيها وغصب عني بنفعل فيها كل مااشوفا كأني بعاقبا على انها حركت مشاعري تجاها، ماعارف اتصرف كيف ياخال دبرني
مصعب فكر مسافة وتاني قال : عايز اشوفها ياراشد ممكن؟
راشد سكت وعاين لي فوق حبة وقال ليهو : اعتقد ممكن، بعد بكرة في إحتفالية بي الأطفال الأيتام منظماها الشركة الشغال فيها صهيب ودعمي نصر وكان عزمني اشارك معاهم وبي الصدفة لقيتو عزم جوليا وواحدة تانية اسمها هالة صاحبة سهى برضو، يشاركو في الفعاليات، ممكن تمشي معاي وتبقى فرصة تشوفا وتتكلم معاها بصورة عادية بدون لفت نظر
مصعب إبتسم وقال : ماتخاف ماحايحسو بشي
بعدها بقو يتونسو في امور عامة وإتكلمو شوية عن قضية سهى والتنظيم...
                ******************************
يوم الإحتفال جا وجوليا مشت مع هالة وصلهم هاشم ولاقو صهيب في الباب
صهيب: شكراً يابنات كلفتكم كتير
هالة : بالعكس نحن اللي بنشكرك عشان شركتنا في برنامج زي ده بحب العمل التطوعي الذي ده
جوليا: me too, بحب الأطفال جداً انا وبحب اتصرف معاهم بي نفس إحساس طفولتهم
صهيب: راشد جايب معاهو ضيف الليلة، هم وصلو قبليكم تعالو يلا نمشي عليهم
مشو دخلو التلاتة على المكان الفيهو راشد والضيف ولمحوهم من بعيد قاعدين، اول ماقربو البنات قالو السلام عليكم وسلمو على راشد اول بعدين سلمو علي الدكتور مصعب
راشد: يابنات اعرفكم بي خالي دكتور مصعب الهادي
هالة : اهليين يادكتور شرفتنا
جوليا : اهليين
مصعب : أهلا بيكم والشرف لي أنا اكيد
راشد: دي هالة يادكتور ودييي  جوليا
مصعب عاد السلام مرة تانية وبعدها قعدو
هالة : انت دكتور في ياتو مجال جايز نجي نتعالج عندك مرة
مصعب إبتسم وقال : بتمنى ده مايحصل، انا استشاري في الطب النفسي والامراض  العصبية
هالة : اوووف، زي ابوها لي جوليا يعني
جوليا :  لأ لأ ، بابا عندو دكتوراة في علم النفس ما الطب النفسي في إختلاف
مصعب: ايوة صاح انا قريت كلية الطب واخترتا التخصص ده، انتي ابوكي دارس علم نفس يعني ياجوليا؟
جوليا: ايوة وللعلم مخلف عاهات، غلبو عديل يفهم نفسيتنا
مصعب : هههههههههه باب النجار مخلع يعني
هالة : جوليا بالذات اضطر ينفيها من بلد لي بلد
وبدو يضحكو البتين وضربو كف بي كف مع بعض
مصعب كان مستمتع بي الحوار مع البنات وصهيب وراشد ساكتين بتفرجو
مصعب : نفي عديييل؟
هالة : جوليا جاتنا طرد من كندا لي هنا
جوليا : نحن مقيمين في كندا، انا اتولدتا هناك وماشفتا السودان خالص قبل كده لحد من سنة كده بابا قرر يجيبني هنا ادرس عشان زهج مني
مصعب: هههههههههه اكيد عملتي مصيبة
جوليا عاينت لي راشد مسافة وقالت : مصايب كتيرة
مصعب : وقاعدة هنا براك ولا مع اهلك؟
جوليا : مع خالة بابا
هالة : وزهجو منها وعايزين يرجعوها برضو ههههههه
جوليا : هههههه بس انا ماراجعة تاني حااعرس اخو هالة  واستقر هنا
هالة : هيييي منو الخطبك ليهو ومتين؟
جوليا : بكلمك بعدين
مصعب : واضعة خطة لي مستقبلك يعني
جوليا : طبعاً
قطعو الكلام لما بدت الفعاليات، جوليا وهالة شاركو في مسرحية معمولة لي الأطفال، كان البرنامج حلووو وإستمتعو كتير
راشد ومصعب كانو قاعدين سوا وصهيب مشى يتابع البرنامج والتجهيزات
مصعب قال لي راشد : لطيفة جوليا جداً
راشد: إنت شايف كده؟
مصعب: انت شايف شي تاني؟
راشد: ماعارف
مصعب : فهمتا بعض الشيء كيف جذبتك ليها
راشد: كيف؟
مصعب : لا بعدين بوريك خليني اقيما اكتر
إنتهت المسرحية أخيراً وهالة كانت مشاركة في فقرة تاني وجوليا في فقرة مختلفة فمشت قعدت لحد ماتخلص هالة من الفقرة
مصعب اشاد بي الطرح الجميل القدموهو
جوليا قالت ليهو  : هالة اختارت لي زي الأرنب ومسكتني جزرة واصرت اني اكلها  كمان، تخيل صوتي طالع في الميكروفون وانا باكل كررررم كرررم زي الهبلة، بوظت برستيجي
مصعب : بس كنتي روعة على المسرح
جوليا :  اوووووه، شكراً ليك، ولسه لما تسمعني بغني مع صهيب الفقرة الجاية
ميلت شوية على الدكتور وقالت براحة : إنت متأكد انو انت خالو لي راشد؟
مصعب إبتسم وقال ليها : ايوة خالو، لييه؟
جوليا: لأنو إنت لطيف جداً
مصعب ضحك وهمس ليها : راشد مالطيف يعني؟
جوليا: توعدني ماتكلمو بي اي شي؟
مصعب : كأني ماسمعتا منك حاجة
جوليا: راشد متوحش وطبعو حامي، دايماً مكشر كده وملامحو مخيفة  ، كتير بصرخ في وشي حتى لو لسبب مامهم ومابعرف اتعامل معاهو نهائي
مصعب : ههههههههه هو راشد كده من صغرو زول دمو حار، وإنتي بتسكتي لما يعلي صوتو في وشك؟
جوليا: مع انو برعبني بس دايما برد عليهو وباخد حقي بس هو بغضب بزيادة، ده في مرة قال لي لو خالفتيني ولو مرة حاضربك رصاصة في راسك
مصعب بضحك شديد ومستمتع وراشد نفسو يعرف بتوشوشو في شنو
مصعب : جوليا إنتي إنسانة رائعة ياخ، دايماً خليك قوية في وشو وماتخافي ابداً
جوليا: عموماً أنا بتحاشاهو قدر المستطاع، عارفة هو بكرهني من يوم اتلاقينا
مصعب : لاااااا بكرهك عديل؟ راشد ماكعب للدرجة دي
جوليا : هو ماكعب انا عارفة، بالعكس عجبني في مواقف كتيرة عملا وكونو عايز يجيب حق سهى وماحكم عليها زي بقية الناس ده خلاني احترمو كتير، هو بكرهني او بي الاصح لايمني في اعماقو اني نجيت من الوقعت فيهو سهى، لأنها افضل مني مليون مرة وكان مفروض انا اكون مكانا وهي تعيش حياتا لأنها مابتستحق يحصل فيها ده كلو..
مصعب حس انها حاتبكي فحاول يشغلا وقال ليها تعالي معاي نتمشي بعيد من هنا شوية، قوما براحة وقال لي راشد لو جا صهيب يسأل عن جوليا فنحن حانتمشى شوية ونجي راجعين، فاتو وراشد زاد فضولو اكتر عايز يعرف بقولو في شنو..
بعد بعدو مصعب قال ليها : ليه بتفكري انو انتي مذنبة وانو راشد متحامل عليكي؟ عايز أسألك طيب، سهى حصل ليها ده كلو بعد ظهرتي انتي ولا وقعت في شر الناس ديل قبل ماتشوفك
جوليا بحزن: قبل ما اعرفها
مصعب: يبقى المجرم والمذنب الحقيقي هو الوقع سهى في المصيبة دي واخر شي قتلا بدون رحمة، وراشد صدقيني مابكرهك عشان كده ولا اظن انو بكرهك أساساً، راشد براكي قلتيها طبعو حامي وصعب بس حقاني، وشي طبيعي تختلفو مع بعض ماضروري اي زول نقابلو في حياتنا معناها ممكن نتفاهم معاهو بغض النظر عن سوء اوصلاح شخصيتو، يعني انتي انسانة كويسة  وهو كمان بس ما حصل توافق فكري فدي مامشكلة عويصة، شوفي جوليا اسمعي نصيحة من زول إختبر الحياة قبلك وقبل راشد كمان، إنتي مامضطرة تعجبي كل الناس ماتحاولي تكسبيهم ولا تحاولي تصلحيهم، إشتغلي على نفسك إنتي دايماً، إصلاح الذات حاجة كويسة بتريح الإنسان في حياتو وبلقى الثواب بعد مماتو
جوليا : صاح كلامك كلو
مصعب: إنتي بت طيبة ومعدنك أصيل ماتهتمي لي راشد ولا لي غيرو وعايزك تفضلي تفوري دمو وتزهجيهو في الطالع والنازل ماتخليهو مرتاح ابدا
جوليا ضحكت أخيراً وقالت ليهو : أعتبر ده تصريح منك بما إنك خالو؟
مصعب: براحتك اصلو ماتخبي موهبتك في إستفزازو وافضلي دايماً ذي ماانتي
جوليا بفرح : اوووكي ههههههههه
طلع مصعب كرت صغير من محفظتو واداهو ليها وقال: الكرت ده فيهو رقمي بتاع العيادة ورقمي الخاص، اعتبريني اخوكي او عمك او خالك كمان زي راشد ولو إحتجتي تفضفضي في اي موضوع ضايقك انا موجود
جوليا بخجل : شكراً كتير ده شي يسعدني، بالجدthanks
بعدها رجعو في وقت مناسب ولقو فقرة هالة خلصت وجا دورها وفاتت تستعد....
إنتهى البرنامج بنجاح وصهيب شكرهم كتير على مشاركتهم ليهو ومساعدتو لإنجاح اليوم
هالة قالت ليهو : حسي جوليا دي ساعدتك بي شنو
جوليا : اكلتا جزرة في نص المسرح قصرتا؟ ده إنجاز لو سمحتي، وبعدين كنتو حاتلقو ليكم ارنوبة احلى مني وين
وبصوت فيهو دلع قالت : موش ياصهيب؟
هالة حدرت ليها تحت تحت وصهيب ومصعب بضحكو وراشد ابتسم كمجاملة لكنو كان زعلان شديد، لي تاني مرة بتتجاهل وجودو تماماً، دي حتى صاحبت خالو وكانت متونسة وسعيدة بس لما تجي عندو مابتعبرو نهائي..
صهيب ساق هالة تاني وقال لي راشد: حفظت الدرب اكيد وصل معاك جوليا
جوليا قرصت صهيب وقالت ليهو براحة : إنت حقار والله بعد ساعدتك ترفض توصلني عشان قاشرة بتاعتك دي اصببببر  بردها ليك
صهيب براحة ضحك وقال ليها: باركيها ياجوجو انا محتاج اخلط هلولتي دي من قبيل مالقيت فرقة
جوليا: طاااايب زيييت سوقا ياشهيد الحب والغرام
هالة جرتا من يدها وقالت لي صهيب ممكن تسيبا لي دقيقة وساقتا بعيد
هالة : مش كلمتك الولد ده قلبو رهيف بتميلي لي قلبو؟
جوليا: so what
هالة: سيبي صهيب في حالو وركزي في زولك
جوليا: هههههه إنتي عايزة تلصقي فيني وخلاص؟ بس عشان خايفة تتشلبي ياكلبة؟ يازولة فوتي على حبيبك وخليني في حالي
رجعو ليهم وإنفصلو كل مجموعة مع بعض
جوليا ركبت مع راشد ومصعب وإتحركو فاتو
وكانو بتونسو مصعب وجوليا، وطبعاً كانت بتضحكو بتعاليقا المضحكة
مصعب : إنتي زولة مرحة بالجد ياجوليا
جوليا: جد؟ في ناس رايا غير كده خالص وقالو انا ماظريفة نهائي
مصعب : لاااااا كيف الكلام ده
راشد خلاص غلبو يسكت وقال : إحتمال عندك ناس وناس، خليك ظريفة مع الكل عشان مافي زول يقول كلام غير كده
جوليا بي ابتسامة عريضة ليهو في المراية: حاضر جنابك
حاول قدر المستطاع يسكت عشان خالو موجود لكنو قال : شكراً لسموك
   وصلوها أخيراً وودعت مصعب بحرارة ولما جا دور راشد قالت ليهو التحية المعهودة : بااي
ودخلت بيتهم، بعد اتحركو فاتو مصعب بقى يضحك بصوت عالي وقال : عسسسسسسل البت دي الله يحفظا، انت ظالما ياراشد دي ظريفة ياخ مامستفزة ولا شي أنا رسمتا ليها صورة غلط طلعت مابتشبها نهائي
راشد بي زعل : ماهي كويسة مع كل الناس إلا أنا
مصعب: لأنو انت بديت معاها بي طبعك الأنا بعرفو كويس واكيد عاملتها بقسوة
راشد: هي قالت ليك كده؟
مصعب: لأ
راشد : كنتو بتقولو في شنو طيب من قبيل انت وهي
مصعب : كلام مابخصك
راشد مدهوش: ياخال؟ معقول اجيبك معاي وهي تستلمك على حسابا وكمان بقت في بينكم أسرار؟
مصعب: المهم انا قيمتها كويس، جوليا بت حساسة ومرتبكة عاطفياً، شكلو مرت بي مواقف كتيرة زعجتا وخلتا ماتشعر بي الأمان وخلتا عايزة تتمرد على الدوام، انت عجبك فيها تمردها ده حتى لو نكرتا، لأول مره تلقى نديد ليك في الحياة ورغم فرق السن الا انها مابتهابك مهما عاملتها بجفوة وقسوة، ده خلاك بدون إدارك تميل ليها، ده شي واضح
راشد : طيب قدرتا تعرف شعورا شنو ناحيتي؟
مصعب : دي مهمتك انت مامهمتي، لو انت عايز تطور الموضوع حاول صلح الخلل البيناتكم ولو ماراغب في الموضوع ومتمسك بي حنان لازم تلجم قلبك وتبعدا من تفكيرك وخليك زول عملي وخلي علاقتك بيها محدودة وفي دائرة القضية وبس ماتحاول وتميل قلبها وبعدين تسيبا
راشد بقى قدام خيارين صعبات ومنتظرو تحدي كبير...
              *******************************
جات بداية الإسبوع وجوليا نزلت جامعتا وحضرت محاضراتا، وهي طالعة من مبني القاعات ندهتا واحدة من بعيد، إتلفتت ليها قامت البت سألتا : إنتي جوليا مش كده؟
جوليا: نعم أنا، عفواً ماااعرفتك منو انتي؟
البت: انا بعرفك وده يكفي، عايزة اقول ليك حاجة واحدة بس، ابعدي عن حبيبي وإلا
جوليا: شنو؟ ده عبط ده ولا شنو؟ حبيبك ده منو ان شاءالله؟ اجري العبي بعيد ياشاطرة مافاضية للهبل ده انا لو سمحتي وروحي حلي مشاكلك العاطفية بعيد عني
البت: يبدو ماحاتفهمي إلا بي طريقة تناية
البت فتحت شنطتا وطلعت حجر كبير وقبل ماجوليا تستوعب شي ضربتا بعنف على راسا بي الحجر لمن وقعت في الأرض من قوة الضربة وراسا اتفتح وفقدت وعيها والدم بدا يطلع دفعات، عاينت ليها بي غل وقالت يارب تموتي وأرتاح منك
في بت وولد جو نازلين من السلم لمحوها شايلة الحجر والتانية واقعة وسايحة في دمها، البت صرخت والولد صرخ فيها : هيييي إنتي
بسرعة رمت الحجر وجرت هربت، الولد نط السلالم لمن قرب يقع وحاول يجري وراها والبت المعاهو تصرخ الحقوناااااا، الحقونا في واحدة بتمووووووت...
                ×××××××××××××××××
يتبع....