سجينة قلبه

البارت 1

مساء الورد الجوري ...
سجينة قلبه ..
البارت 1 ..

حنزل البارت الاول فقط كمشهد او اعلان للقصه ومن ربنا يسهل ابلش بيهه بس احفظوهه يمكم ولاتبخلون عليه بالتصويت والتعليقات الحلوة ...

المكان : الموصل الحدباء ..
الزمان : بدايه الشهر السادس سنه 2014 ..

اسمي ضي .. عمري 24 .. طبيبه اسنان العام تخرجت .. و نزاولت مهنتي صارلي شكم شهر .. عايشين بالموصل ..

اني اخر بالعائله مكونه من 3 اخوان و 3 خوات كولهم متزوجين الولد و البنات و اني مخطوبه لابن عمي ..

اول متخرجت خطبوني لابن عمي غصباً ما عليه .. من صغري و اني محجوزه اله .. توقعت بمرور الوقت راح اتعود عليه .. راح اتعود ع الفكره بس مصار هلشي .. استمريت نافرته و رافضه فكرة زواج الاقارب .. اكره الاقارب ..

امنيتي احب و انحب مو انجبر على واحد ماريده و لا مقتنعه بي بس هذا الي صار ..

احنه عائله اقل شي اكدر اكوله عنهه انو مغلقه و معقده و متزمته ..

الذكور بيهه منفردين بقراراتهم .. و الانثى عدهم للزواج و الانجاب فقط ..

عدا ابويه .. الشي الوحيد الزين بابونه انو يقدس الدراسه فخلانه حتى احنه البنات نكمل كليات يله زوجنه ..

طبعا مننطي خارج نطاق العائله .. يعني اخواني ثلاثتهم متزوجين كرايب ..

اثنين منهم ماخذين بنات عمي خوات و اخوهن هو الخاطبني و اخويه الثالث ماخذ بنت خالي و اخواتي هم ماخذان ابن العم و ابن العمه و اني لاحكه على السره ..

طبعا بيوتنه كبيره و بيت بصف بيت العمام و العمات ماعدنه شي اسمه ولد يعزل او يطلع ييت وحده لا حرام هلشي .. العائله مقدسه ..

تربينه بطريقه صارمه .. صوم و صلاة و حجاب مضبوط من صغرنه ..

خلصت كليه و اني المكياج ما ملامس وجهي و الخيط ما ماشي على ملامحي ..

اني جنت دائما بصدام ويا العنصر الذكوري بعائلتنه ..سواء ابويه او اخواني الكبار تحسين و رائد ..

خالد شويه حنين بس ماله علاقه .. بلاحرى لا حول و لا قوه اله بنصهم ..

ياما اكلت كفخات و ضرب و راشديات و حبس بغرفتي .. دائما جنت اشوف نفسي اسبح ضد التيار ..

تيارهم .. كل معتقداتهم و مفاهيمهم للحياة و اساليبهم بعيش الحياة جنت امقته لا .. اكرهه.. كره العمى ..

اني مو هيج .. اني اجتماعيه و مرحه منفتحه .. مو متعصبه بتفكيري عكسهم تماماً .. امي ايضاً لا حول و لا قوه خاصه هي غريبه ..

ابويه حبهه و اخذهه .. يعني هي جانت استثناء و كسر للقاعده مال زواج الاقارب بس ياريته مصارت ذاك الاستثناء .. ياريت ابويه ما وكعت عيونه على امي .. مرات احسهه هيج لسان حالهه يحجي من ابويه يلغي وجوده على اتفه سبب و هي فعلاً ملغي وجوده ..