"فرط الحب"
الفصل العاشر:
- يخربيت دماغك جننتي الراجل.
أخبرتها وسام في ذهول فابتسمت ريم في رضا مؤكده:
- هو لسه شاف جنان، ده يا ويله مني!
- يلا مش خسارة فيه عشان يتربى ويعرف ان الله حق بعد كده، بس خدي بالك احسن ينفجر في وشك انا عارفة المجانين اللي عندنا.
انهت وسام جملتها محذرة فردت "ريم" في سرعة:
- لا إنتِ فاهمه غلط مفيش بعد كده، انا بربيه بس لحد ما يطلقني.
- شوف إزاي، بتضحكي عليا ولا بتضحكي على نفسك؟
سألت "وسام" في هدوء ماكر، فعضت ريم شفتيها وهي تجيبها في عناد:
- قصدك إيه؟
اجابتها وسام في ثقة وسرعة:
- قصدي انك بتحبي ريان ومش هتقدري تبعدي عنه لا هو ولا عُمر، صح ولا لا؟
- بس هو قدر يا وسام، خلاص حتى لو صح معدش ينفع ابقى معاه.
غامت عيون ريم في حزن ما ان انهت جملتها فتنهدت "وسام" مردفه بشكل صريح:
- اقولك الصراحة متزعليش مني؟
هزت ريم رأسها انها لن تراها وهمست:
- مش هزعل قولي.
- إنتِ اللي غلطانه.
- انا اللي غلطانه؟ بعد الحب اللي حبتهوله ده كله وانا اللي غلطانة يا وسام.
- يا بنتي افهمي .. الرجاله دول كائنات متوحده معندهاش قدرة على الاستيعاب وفكرهم ان الحياة دايمًا عادي وسهل،
وإنتِ كنتي بتحبي ريان بدون اي مقابل وده في حد ذاته غلط لأنك كده بتبوظي الراجل بفرط تدليلك زيه زي العيل الصغير بالضبط مهما كانت طبيعة الراجل اللي معاكي دي ايه.
رمشت ريم عدة مرات واعتدلت في جلستها تحاول استيعاب ما تخبره به وسام:
- تقصدي إيه، اني حبيته بزياده وهو مش بيحبني؟
- لا يا غبية، الفكرة انك اديتي ومستنتيش مقابل، خلاص حُبك بقى شئ مضمون وتلقائي هو متوقعه منك ومش حاسس بتهديد او انه لازم يعافر عشان يحافظ عليه،
لعلمك ريان بيحبك وبيموت فيكي كمان لانه لو مش بيحب مش هيسمح انك تبيعي وتشتري فيه كده.
أنت تقرأ
فرطِ الحب
Romanceرواية رومانسي اجتماعي...مكتملة... مركز أول ...في الروايات الرومانسية والعاطفية .... أنتِ شعلة شوق تؤجج الحنين بين ثنايا قلبي .... بل جنون مثير يضرم النيران بين أضلعي... ولكن نظرة وقحة من عيناكِ ... تنتشلني من أحلامي وتتركني خال الوفاض وهائم بين...
