💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

🌺الحلقة 3 : القســ4ــم 🌺

هذا الرجل .... أبيك💜💙💚
🎆الحلقة الثالثة : القسم 4 🎆
*******"**

سكر باب بيروه وقعد في اقرب كرسي ليه ، مسد لحيتو وعقلو ضايع ...هاك الضحكة وهاك الكاريزما والوقفة الثابتة ...الثقة الكبيرة وايمانها العظيم بذاتها ...فرض روحو عليه...كيف السلطان سلبلو عقلو. ...غمض عينو وهو يحاول يسيطر على روحو ...فيق يا أحمد...معقول ها البنية بدات تعجبو ...بدات تأثر عليه ...بدات تجبدو ليها ...وقف وهو يحدث في روحو "أحمد....تولين ...مجرد عارضة ...يوفى ااكنترا تمشي على روحها... انت مادخلك فيها شي ولا في لا في خدمتها " نفخ بقوة وحرك كرومتو باش ينحي اي توتر وانفعال ويرجع فورمتو ...كاينو تشرجى من جديد ...جبد كرسي بيروه وقعد ، حل الدوسي ايلي لقاه ع الطاولة وحط همو الكل فيه....دقايق من بعد ماكان في راسو الا الخدمة ومافي الملف . نهارات من بعد حاول ما يعتبش باب الصالة متاع العرض ..قاوم باش ماتهزوش ساقيه لغادي ...وين يخطر لبالو يشوفها ...يلزم على روحو يقعد على بلاصتو والا يخرج من الشركة جملة ...ساعات ينجح ومايتذكرهاش ،ساعات تجي قدام عينها بتبسيمتها هاكي ....كانت عينها ع الباب اكثر من مرة ...تمنات ياقف مرة اخرى ويديه في جيوبو ...تمنات ضحكتو و وقفتو و ريحتو و عينو وزينها ...لكن ها الاحساس ناحيتو عمال يكبر كيف الصغير في كرش امو ...الفراغ ايلي خلاه من بعد...كان اكبر ملي تخيلت ...المرات ايلي راتو فيهم يتعدو ع الصوابع ...لكن هي موش قادرة تنحيه من بالها وايلي زاد شجعها انو موش معرس كيف ما تخيلت .
لمت شعرها لتالي و عملتو كعكة ،مسحت وجها ومروحت عليه بيديها ...نسات حتى تعبها ...جات ريما وقصدت تقعد بجنبها ،هزتها وحطتها بتقزز "تمشيش تبتطح في وسط العرض ...امان يعيشك...سمعة ناز ماهيش لعبة "
زمت شفايفها " مدموازال ريما ....زعمة ها النصيحة قلتها لروحك... بون انا تعلمت الدرس...وانت ؟!...تخافش يصير عليك ايلي صار عليا ....خاصة انت العارضة الرئيسية "
قهقت " انا ؟!....ملي انا صغيرة نعفس ع التابي ...تنجم تقول ولات عادة عندي.... اما انت ..."هزتها وحطتها " ها الشي جديد عليك "
غاضتها الفازة ، ورميان المعنى عليها ،وقفت وهي تنطر " تو نشوفو ....العادة والعوايد متاعك ...على قريب "
كزت سنونها وحاولت تبعد من عينيها ، ها السخطة هاذي ...في كل مرة كانت تسمعها كلمة طايشة وتفكرها يا اما بمكانتها الاجتماعية والا على طيحتها وضحك الناس عليها ...قريب تعمللها عقدة بيها ...وايلي زاد على مابيها ...انو ريما كانت مرا مزيانة مضخمة وبدنها تخلق باش يكون مودال ....
******
دق ناظم الباب وطل براسو "بوڨوص العايلة "
هز عينو وخزرلو "ادخل "
دخل وهو يلعب في عينيه بخباثة "يا معلم ....اتلهى شوية بينا ....اخزرلنا حتى بشطر عين "
صحح ورقة وقلب ايلي من بعدها " ناظم هاك ترى فيا ...خدمة للعنكوش...هات من الاخير "
"الليلة الجاية فمة عرض تجريبي ...نتصور يهمك تحضر "
من غير مايهز راسو " ما يهمنيش "
وشوشلو " حتى وتولين فيها "
ضرب الطاولة لين تنطر القلم من يدو " قتلك مايهمنيش"
وساعت عين ناظم من ردة الفعل هاكي وقعد يبحلق فيه ....غمض عينو يحاول يكون طبيعي "ناظم ...انا وتولين ...مابينا شي ...هي مجرد عارضة ...تحاولش تركب حكاية "
تبسم بخباثة " والله ردة فعلك هاذي ...عندها تفسير واحد "
عض شفايفو " فسر ايلي تحب ..."جبد ستيلو جديد ورجع مركز في الاوراق " نتصور عندك ما تعمل ...غدوة خدمة كبيرة تستنى فيك...مانعطلكش"
عوج فمو " اممممم...تطريدة بضخامة "
"بالضبط "
وقف ناظم وهو يخزر لخوه من فوق ،مال ناحيتو "اذا موش على خاطر تولين ...فعلى خاطر ريما"
ضيق عينو وزم شفايفو بغل ،فهم ناظم روحو وتسلهب خارج لو زاد كلمة اخرى كان طيشو من الشباك .

✴نهاية الحلقة الثالثة ✴