مزاچ الشيخ(ابن عمي)

البارت الثالث عشر

ادري ماعندكّ ضمير !
تقنع بغيري يحبك
وانهِ غيركّ ماهُويت 💔✨

حاولت انام بس عيوني ماغفت گل لحظه وثانيه افگر بيه شسوي بگلبي حتى يوگف التفگير بيه ليش بس اني الي راح اموت وهوه يضحگ وهسه يمگن هيچي وقت يحچي وياها بالشوگ والعشگ ويكللها حبيبتي ومشتاقلچ ..لا لا يربي راح اموت .. نزلت دموعي ابچي واشهگ بهستريا  واديه على اذني لا ليش يربي لهدرچه راح تقسى عليه بس شسويت اووف اللهم لا تحملنا ما لا طاقه لنا .. حسيت راسي خدر من البچي باوعت للساعه 5ونص

اووف يگلبي .. اي حبيته .. اني الاگابر تالي اموت الف موته بگل ليله بلياگ هويته اعترف بس اسمع صوته احس يطيني روحي ونظرته تزرع ورد بين اضلوعي الي چانت عبارة عن صحراء قاحلة ..خليت راسي ع المخده واقره ايات اريد بس شويه ارتاح من هذا الهم

... فزيت على دگت الباب فطوم يمگن هاي .. ترگع ترگع گمت فتحته

فطوم_ صباحوو لومساؤؤ لوضهاروو

ضهارو!؟

فطوم _والله من وراچ حتى گمنا نحچي هندي شگو عروس ونايمه ولچ اچه جويسم الساعه 2الضهر صدگ على گوله هشام انتي تنبل مدري شلون اتنجحين وانتي بس تنامين

ضليت صافنه عليها راسي يريد ينفچر وهااي شون فايخه وتلغي

فطوم_ شبيچ ساگته گلو السانچ دروحي غسلي ونزلي راح اروح چويسم بالطريق

... نزلت سديت الباب اباوع على نفسي شعري كوشه عبالگ بزازين معارگتني وعيون عبارة عن نگره سوده  وبشرتي باهته مالي خلگ ابد انزل واضحگ وانطي وجهي المزيف يمهم ..

دخلت سبحت طلعت لبست اتراگ طويل مشطت شعري وضفرته خليت الشال لان ميصير من رچل فطوم خاف اسلم عليه

..نزلت هم امي استلمتني تحچي علية ليش نايمه وليش وليش .. قائمه شگبرها شعرضها بس لان نمت اشويه .. دخلت لغرفه امي لگيت فطوم ولندا ومروه تبدل بنين شكد تحبها ربي يرزقها حبابه ورده مال الله

فطوم_شرفتي الخاتون

اهوو فطوم شبيچ من الصبح وشعچب ممبدلة مو راح ترحين

فطوم_اي حقچ ميعچبچ الحچي لا ماابدل اطلع هيچ

صدگ والله خوش مطورين جويسم يخليچ اطلعين مفاتنچ الجميلة  ... شالت المميه ورگعتها بيه ومروه بس تضحگ

فطوم _ انچبي ادري شتقصدين ولچ قبل لا ازوچ جسمي چان ينحلف بيه ورشاقته

اي خيه وهسه ينحلف بيچ شلون تاگلين اگثر من رچلچ

مروه _ ... تضحگ وكوه تچر النفس.. ولچ يااا ليان خطار هيه لا تزعليها

فطوم_ لا خايبه مروه شنو ازعل من هاي الرعنه هسه تزوچ واتصيرين ما اطلعين الباب