مهره والقدر
#البارت_الاول
مهرة،،كعدت الصبح مثل كل يوم اخذ صفنة بمكاني اتذكر حياتي قبل مااتزوج وهسة اقاررن احن اتمنى ارجع بنية ما متزوجة ماعندي غير نفسي وبس ارجع لعائلتي الحلوة الصغيرة امي واخوية فارس الاصغر مني بسنة وبس ماعندنة كل هم والضحكة تارسة وجوهنة رغم ضعف الحال الي اتدهور بعد وفاة ابوية بس امي بعشر زلم ،،صح هسة عمري 19 بس بهالسنة هواي كبرت وتغيرت حيااتي هواي تغيرات اتلمست بطني ابتسمت و اتعوذت الشيطان من هالتفكير اليتعبني وكمت من وكت صليت ونزلت حتى احضر الريوك للكل لكيت عمتي كاعدة تسبح بالمطبخ ومخدرة الچاي ابتسمتلي رحت بست راسهة وكتلهة صباح الخير عمة
ام ريسان،،صباح النور عمة يلا همي روحج عمة لا يگعد الحجي
مهرة،،اي عمة بلشت احضر بالريوك وطب غسان حماية الصغير شايل الصمون
غسان،،صباح الخير
الكل،،صباح النور
مهرة،،كملت الريوك وطلعت مرت ريسان من الغرفة كوة تتمشة تجر بروحهة جر
ميلاء،،صباح الخير
ام ريسان،،صباح النور عمة شجاج على هالنوم اكعدي يوم گبل هالبنية
ميلاء،،عمة الجهال ميخلوني انام زين هية ما عندهة شي
ام ريسان ،،شوون ما عندهة شي مو هم حامل وتعبانة
مهرة،،ما عندي شي عمة كملت، ،صدك حضرت كلشي وصعدت اكعد بعدنان، ،عدنان يلا گوم يا عيني هسة يگعد عمي ويظل يصيح
عدنان،،كمت اوووه يا ملحتج،، روحي حضريلي الحمام اسبح
مهرة،،ماشي عيني بساع،،حضرت الحمام وطب يسبح نزلت عمي گاعد ،،صباح الخير عمي،،مد ايدة وهاي عادتة اليگعد يبوس ايدة من الصبح شكد اكره هالعادة يعني احبة واحترمة من ذاتي اقدم على هالشي مو اجبار
حجي محمد(ابو ريسان)،،وين رچلج
مهرة،،كعدتة عمي يبدل وينزل
حجي محمد،،اتمنى هالولد يصير گد المسؤلية كلة تسحسل غير كون وراه مرة تهمة، ،،، اكعدن يلا صبن الچاي
مهرة،،كعدنة وعمتي تصب بالچاي وتوزع بالصمون ابتسامتهة ضد عبوس وجه عمي وعگدة حواجبة المتفك حتى وهو نايم، ،نزل عدنان باس ايد عمي وراس عمتي وگعد يتريك ميحاچي ولدة الرزالة لنسوان ولدة ليگول احنة بيدنة عصا سحرية نغير اطباعهم بكيفنة ما صارلي سنة من تزوجت وكل شي غلط يسويه عدنان ينحط بخانتي واني فد وحدة جباااانة اسكت واكول صار،،كملنة هوسة الريوگ بالستة كلمن طلع لشغلة ريسان للمحل وعدنان بالتكسي مالتة غسان لدوامة ويبقى عمي بالبيت يبدة بمرحلة الاستكشاف شنو مو بمكانة شنو ما منضف عدل بكلشي يتدخل جان متحكم بكل مفاصل حياتنة شوكت ننام شوكت نكعد شوكت ناكل شوكت نشرب والكل تطيعة بلا نقاش ريسان الصار شكبرة وجهالة تلاثة وياه بالغرفة ويخاف يطلب غرفة ثانية يبنيهة فوك لجهالة لو يعزل ببيت ثاني رغم ضيك هالبيت الي كل مساحتة 150بس ميتجرأ اهاا غير تقوم القيامة لو حمواتي الي يجن ساعتين بس بالاسبوع لان جهالهن وكحين يخربون حديقة عمي لو احنة الي كل عشر ايام يلا نروح لاهلنة رغم قرب اهلي مني بس ممنوع بكيفنة و نروح الصبح نرجع قبل العشا جان انسان كلش متسلط عكس عمتي فد طيبة وحقانية بس هية وياه وياه تخاف منة كلش،،،كمت اكمل شغلي الجان الطبخ علية بيومهة والمطبخ وميلاء البيت والعشا وثاني يوم ينعكس الجدول والخبز عمتي تخبز ميحبون غير خبزتهة وهي صدك طيبة مرات اوگف وياهة اعاونهة لان تعبانة بس طبعا محد يدري اخبز وياهة شون اكسر حجاية عمي الي هو بايدة قسم الشغل شفت العجب بتحكمة ومن اسولف لامي تگلي ميخالف اتحملي يمة اشكال شفنة من العيال ما دام رجلج زين هاي هية،،،عدنان جان زين شاب بسيط اتقدملي تقليدي امة وخواتة يخيطن يم امي وشافني من اجن وانعجبن بية وصارت الخطوبة جان بالبداية مال الخطوبة احسة عصبي وميتفاهم ومن اسولف لامي تگلي عوديه انتي عليج وغيريه من تزوجت عرفت انه هوة وريسان يحاولن يفرضون شخصياتهم علينة لان ما الهم اي شخصية اصلا ابوهم ماسحهة بتصرفاتة عدا غسان الي هوة اصغرهم بس اشوفة ميقبل ينهان ويسكت ابد ينتفض ويرفض وينطرد ويغلطون عليه يعوف البيت ويروح لبيت عمة رافض سيطرة عمي حجي محمد واااه يا حجي محمد شسوة بينة،،،كملت الطبخ ونضفت المطبخ صارت بالتسعة ونص كعدت عالقنفة بالمطبخ اريح
