💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

💐الحلقة 4 : القســ1ــم 💐

هذا الرجل.... أبيك💚💙💜
🎆الحلقة الرابعة : القسم 1 🎆
**""""""*****

"خاايفة " بعثت المساج لنزهة وصوابعها يرعشو ،لحظات وجاها الرد منها "مافمة شي يخوف ...تفكر هاذي حلمتك "
كتبت من جديد " ياريتك معايا توا "
جاوبتها نزهة "قلبي معاك"
تبسمت راضية على كلامها ،فيقها صوت المسؤولة عليهم "هيا حضرو رواحكم ...فازي ...كل وحدة تاقف وتشد بلاصتها ...مانحبش غلطة الليلة ...راهو عروفاتنا الكل باش يحضرو...بعد ها الليلة باش ندخلو في الصحيح ...امان ...ماتضيعليش خدمة كاملة "
دخلت وحدة من العارضات الجدد وايلي نجحت مع تولين "يا جماااعة ...مدام زينب هوني ..."
عقدت تولين حواجبها ...زينب ؟!...يقصدو في زينب بالرجب المصممة العالمية .. بداو البنات يصيحو فرحانين وكل وحدة جبدت تاليفوننا وحضرو رواحهم للخروج ،لكن المرا ايلي قاصة شعرها كوب ڨرصون وقفتلهم في الباب " وين على خير. ..ناسين عندكم عرض ....تمشاو تصورو معاها وتقابلوها بعد ما تكملو ...هيا ماتجنونيش ...كل وحدة تتحرك تشد بلاصتها "
كانت تولين الوحيدة ايلي ماتحركتش من بلاصتها ..زينب ...اسم المصممة ايلي تشهرت في السنين الاخرانين ...والناس الكل كانت تلبس من عندها خاصة الاسامي الكبيرة والمشاهير ...الشي ايلي خلى شركة ناز تتشهر بدورها و المصممين ايلي فيها زادا ...قرات عليها شوية وقت بعثت تصاورها...شافت تصويرة والا زوز ليها بالصدفة ..تتفمر كانت مرا مزيانة ومضخمة .
قامت ريما بتكبر "هوما ينحمو يستنو ...اما انا ...مستحيل مانخرجش نسلم عليها ...احنا ديجا عايلة وحدة "
سكتت المسؤولة عليهم وسلمت امرها لربي ...مضطرة تسكت لانو ماعندهاش حل اخر ...تعرف شكون ريما بالضبط...وتعرف اذا صارت مشكلة معاها هي والايكيب متاعها يصبحو بطالة...نبهتها "ماذبيك ترجع فيسع ...شوي اخر ونبداو "
نطرت شعرها وراها بلامبالاة ...خلات البنات وراها يفركو ...شمعناها كان هوما يقعدو وهي تمشي وتتصرف على كيفها ؟!
بالفعل كانت زينب بالرجب ...مرا مضخمة باتم معنى الكلمة ...اختارت تلبس كومبينيزون في الباج ومكياج خفيف بانت زينتو في الضو ...مشات بكل انوثة وسط ناظم و جناة ،مع ظهورها تلمو عليها الناس الكل ..بين ايلي يصور معاها وايلي يحكي والا يسلم عليها ...كانت متواضعة وقبلت الموجودين وتصرفت كيف مايلزم تتصرف ...ما تحركت لقدام وين محضرينالها بلاصة الا بالريق الناشح والا ماتدخل المنظمين باش يبعدوهم ...قعدت اخيرا وبجنبها ولدها ،مازالت راسمة تبسيمة على فمها ....لوجت بعينيها على ولدها الثاني وكيف ماراتهوش مالت على ناظم ووشوشتلو " تقليش خوك الصغير وينو "
"تعرفو مايحبش كلمة خوك الصغير ..." خزر وراه لجناة ايلي مركزة في حديثهم اكثر منهم "أحمد قال ماهوش جاي "
زمت شفايفها " ع الاقل يوري وجهو معانا ...ها الطفل باش يهبلني ...ماهوش اجتماعي حتى طرف "
تبدل الضو متاغ القاعة و بدات موزيكة العرض خلت الحاضرين الكل ينتبهو سكتو الكل وركزو عينيهم لقدام وين باش يبداو العارضاات ،دخلت الاولى ومشات بخطوات ثابتين ،خزرت للكاميرا بلا خوف ولا رهبة ...ودخلت لثانية من بعد وكانت تقريبا كيف الاولى والا خير... تبسمت زينب راضية على خدمة جيهان ...مازالت قد الثقة وتنجم تخلق من لاشيء ...حاجة مزيانة وتعجب ...اكيد ضيعت بارشا وقت باش تخلق عارضة بها الثقة ...تلفتتلها وعطاتها اشارة بيدها بمعنى برافو ، رجعتلها ايلي قاصة شعرها ضحكة ...كان حديث بالعينين من غير كلام يكشف قداش هاك الزويز يعتمدو على بعضهم ...بعد الثالثة جاء دور تولين ...اختارولها روب طويلة سيران في البلون مع كتافات يوصلو للقاعة زادتها ضخامة ....مشات قدام العينين المركزة ...نجمت تشوف التأثير الكبير عليهم ...اللون الابيض والضوء الازرق ...كان كوكتال مزيان يعطي فكرة الملايكة ...وقفت براحة وراسها مرفوع خزرت للوجوه فيسع فيسع باش ينجمو الكل يراوها ...مانساتش تهز يديها باش يبانو ااكتافات كيف الجناحات ...احساس غريب غلب الحاضرين .....خزرت بعيد قبل ماتدور راجعة ...وفم نجمت تشوفو في الظلام ...كان واقف في الباب وراء ااناس الكل ...وكانت هي في بقعة ضوء كبيرة ....الملايكة الهابطة من السماء ....زاد وجها الصغير والبريء حلاوة للمشهد .....مانجمش يسمع صوت الموزيكا ...حاجة وحدة وصلت لوذنيه ...هي صوت قلبو ...ياسر يدق بقوة ....عمال تغرق سفينتو ...والموج يعلى اكثر واكثر... قاوم قبل باش يوصل للشط ...لكن الغريق جبدو ....وقاعد يجبد فيه اكثر واكثر وايلي زاد غرقو ...هاك التبسيمة ايلي ماتعطيها كان ليه هو ....دارت فرحانة راجعة ...راضية على روحها المية بالمية ...لغة العينين فهمها معاهم ناظم هاكي علاه وقت شافها تتبسم لين تضيق عينيها عرف انو خوه حضر ....باش يتأكد تلفت وراه ...وقت شافو ضحك خلى امو تستغرب منو ،نبهتو بعينيها باش يكون جدي اكثر ...لف الفاست متاعو وتعوقل قدامها ...لكن عقلو قعد يهني فيه على شكو القوي ....طاح احمد في منداف الحب... وهات اش يخلصو .
تعدت من بعدها عارضات اخرين ورغم انهم كانو ممتازات الا انو تأثير تولين كان كيف الضبابة ماتنحاش ...حتى بعد ما خرجت ريما، العارضة الاصلية ورغم حلاوتها و انوثتها الا انها مانجمتش تنسيهم فيها ، خرجو من بعد العارضات الكل ...وجاو المصممين معاهم ....وقفو الحاضرين يصفقو راضين ع الخدمة ...استدعو زينب باش تطلع معاهم وتعطي كلمة بخصوص الكولكسيون هاكي قبل ما تبدا في العرض الرسمي ...مانجموش العارضات يمنعو رواحهم عليهم ...حلتلهم يديها وعنقتهم بحنية كبيرة ...خذات الميكرو وخزرت للحاضرين " الناس ايلي جات ليوم ...وايلي اختارو ياقف بجنبنا في العرض التجريبي هوما بيدهم الناس ايلي ناثقو فيهم وياثقو فينا ....نحب نقول للموجودين مرسي ...ومرسي زادا للايكيب الكل متاع العرض ..من مصممين و مجملين ومصورين وتكنسيانات وكل حد ساهم حتى بدبوزة ماء ....ونحب نشكر زادا نوارات العرض ...بنات شركة ناز المزيانات ...زادو زينة التصاميم بوجوهم الحلوة وستيلهم المزيان ..."
كان الوقت ايلي لازم العارضات يشدو يدين بعضهم ،كل وحدة شدت فب اختها ومن الصدف كانت تولين بجنب ريما ...مدتلها يدها كتكملة للمشهد ...لكن المغرورة ماقبلتش تمد يدها ...وخلات صوابعها في الفراغ ...الشي مافاتش زينب ولا فات حد كان قريب من فم ،هاكي علاه وقت سألوها شكون تختار الوجه الاكثر اناقة ماترددت وشاورت لتولين ،حمارو خدودها ومانجمتش تصدق الا ماعنقتها وحدة من البنات ، تبسمتلها زينب وخذات بيدها في رد على انانية ريما ومن غير ماتسكر الميكرو سألتها "تنجم تكون العارضة الرئيسية لتصاميم زينب بالرجب "
حلت فمها ماردتو ...خزرتلها مصدومة ،وقف ناظم موش مصدق ايلي سمعو ...تسمع تصفيق من بعد وتصفير ...بارشا عجبتهم الفكرة حسب رايهم تستحق لانو كانت روعة في عرضها وعطات الروبة حقها .