انتقامي منك (باللهجة الليبية)

اول لقاء

ما عندي نية بس الفكرة خطرت عليا مع ان عقلي فاضي تماماً..

////////////////////////////////

في داري مقعمزة شادة التلفون وحاطة السماعات في وداني نسمع في أغاني لإيمي هيتاري شوية ويخش علي ابو هبلة وهوا يصيح"نجح الاقتحام يا شباب!"
نحيت السماعة من وزني وقلت بلا مبالاة"انا متأكدة ان فيه حاجة في عقولكم انت وخوتك"

قعمز جنبي وقال"جير الحلو زعلان؟!"
خشوا خوتي التانين وبدوا يغنولي"الحلوة زعلانة!"
صيحت"خلاص تقول اني الولد وانتوا البنات"
خوي الكبير"ممكن لو هكي صاح حياتنا تكون جحيمية"
اني"لا حميمية خير..قداش ما تحبوا تحرقوا للواحد دمه سبحان الله وبحمده"

خلوني نعرفكم نفسي"اني حياة عمري 19 وعندي ستة خوت ولا اخت وحدة لا عندي خوتي اربعة فوقي ودر توأم تحتي واك قريب نموت منهم مع انهم لما نبدا رايقة يهبلوا لكن لما نكون حمقانة مستحيل فيه حاجة تسكتهم نين يحرقولي دمي"
خلوا نعرفكم"خوي الكبير احمد مواليد 91
بعده نيزار ومروان 95
يوسف 99
بعدين اني مواليد 2001
بعدين خوتي التوأم سراج وريان 2003"

"ريان مرات نحس فيه مش ولد من كثر ما يتمالح يهتم بجماله اكثر مني اني واني البنت"

ريان"الحلوة معاش بنشوفوها سبوعين بيرفعها بابا لحوش عمامي على خاطر عرس والدهم"
طبعاً الكلمة ترددت في ودني وصيحت"شني؟!"

ريان بخوف"شن جاك شن وكلك التبستي واني مندريش؟!"
مروان"بنشتاحشوك يا باردة!"
اني"واني يا سخونين"
نيزار"البارد طول عمره بارد"
اني"والله ما نتخلى عليها برادتي وكان يوقف في وجهي معمر القدافي!"

احمد"عارفينك مريضة حتى احنا"
سراج ببرود😒"جبنالك هدية"
اني بشك😑"كان ما تطلع جرانة(ضفدع)"
مروان😏"بلا برادة هيا امتا درناها حني!؟"
اني"اشحبي البراءة اللي نزلت عليهم من السمي! تنوض انت وياه السبوع اللي فات جبتولي دودة"

نيزار😂"وجهك كان تحفة"
ريان😒"باهي بلا برادة جابولك تليفون راه"
اني"😑جابولي؟!..وانت خيرك؟!"

ريان"ماهو اني سادك اني بنودعك هادي بس هدية"
اني"تي برا يا سامط..بنشتاحشكم هلبا اني😭"
بعدها جي بابا وقال انه بنمشوا قريب لازم انوتي روحي وخراب أعطوني التليفون يا جماعة اول مرة يجي منهم خير في حاجة وراه الهاتف هادا

مشينا لحوش عمامي اني نسيت نقلكم ان امي متوفية فخوتي وبوي يحاولوا ما ينقصوا عليا شي مع اني حاسة ان ريان وسراج هما اللي لازم يتعوضوا عن حنان الام فهيا ماتت بعد ما ولا عمرهم سنتين بس

وصلت لحوش عمامي وكلهم استقبلوني بالاحضان والعياط والفرح واو غريبين مرة طبعاً بوي روح وخلاني لانه ما يقدر يحضر بسبب الخدمة وخوتي السامطين ما يقدروا يجوا ومفهمتش ليش

العيلة كلهم جالسين في الصالة بصغارهم وبكبارهم وولادهم وبناتهم وقف عمي الكبير وقال"بنعرفك على العيلة يا بنت لانها اول مرة ليك هني.."
واحد من الاولاد"خير محدش قال ان عندنا بنت عم؟!"

عمي"مقعدش غير انتو السامطين نقولولكم!"
اني عرفت من خوتي ورتوا السماطة صار من عمامي ولا زعما خوالي ليهم يد فيما حتى هما؟!

المهم عمي عرفني على الكل وانا دماغي مش معاه حتى دماغي كان يفكر بس في القرودة اللي خليتهم في الحوش براحهم ممكن يتحول الحوش لغابة استوائية

المهم هادا كان لقائي بيهم وهادا اللقاء اللي حنندم عليه طول عمري

///////////////////////////////

مهما كانت حياتك بائسة ومغلقة في وجهك الباب قف في وجهها وقل لست بحاجة للباب فأنا لا ادخل من الباب

///////////////////////////////

رأيكم؟!

شو رايك قتلك بنكتب قصة تكوني انت البطلة؟!

سأهرب قبل ان اموت!😏