#ماضي_لا_ينتهي
#بوسى_مصطفى
____الحلقة الرابعة_____
تاني يوم الصبح في شركة مازن
مدير مكتب مازن يخبط
مازن : ادخل
مدير المكتب : في واحد بره طالب يقابل حضرتك اسمه
الأستاذ سعيد... (وباقي الاسم)
مازن يقف : اه خليه يتفضل
يدخل سعيد ببتسامة : ازيك يابشمهندس
الأستاذ دا مكانش مصدقني لما قولتله إن انا والبشمهندس نسايب
هههههههههههههههههه
يمد ايده ويسلم
مازن : ازيك ياعمي
سعيد : تمام... الحمد لله
مازن : اطلبلنا اتنين قهوة مظبوط
مدير المكتب : حاضر يافندم
ويخرج من المكتب
مازن : اتفضل حضرتك استريح
سعيد عينه بتدور في المكان : لا فخم وذوقه حلو
مازن : متشكر
سعيد : ندي والولاد عاملين
مازن : تمام... الحمد لله
سعيد : هو باباك مش هنا ولا ايه؟؟
مازن : حضرتك كنت عايز بابا؟؟
سعيد : اه اسلم عليه ل يزعل ولا حاجه اني جيت ومسلمتش عليه
معلش بقى انا مجتش هنا قبل كده فمعرفش مكتبه
مازن : لا بابا مسافر
سعيد : يتفسح يعني وكده
وماله ماهو بردو الواحد لازم يفك عن نفسه شوية
عارف انت كمان محتاج تسافر وتاخد الولاد وندي معاك
السفر كده هيخلي نفسك تتفتح للشغل
مازن : طنط فوقيه أخبارها ايه
سعيد :"كويسه... بص بقى انا جيلك في فكرة مشروع لو اتنفذ هيبقى مصلحه ليك وليه
مازن بدهشه : مشروع!
سعيد : شوف بقى انا راجل صنايعي وبشتغل في النجاره دي من وانا عيل صغير
فكرت اعمل ورشة كبيرة هنصنع وتعمل موبيليا ونصدر بقى بره
اه اصل الناس اللي بره بيحبوا الشغل المصري
بيقولوا المصريين دول ايدهم تتلف في حرير
مكذبوش احنا صحيح السوق نايم اليومين دول بس مينفعش نكسل لازم نشتغل
انت بقى هتمول المشروع وانا عليه التنفيذ ومتقلقش هخرجلك مكسب كويس
اصل دي شطاره بقى ازاي تعمل موبيليا نضيفه من غير م تخسر
مازن : بس انا
يقاطعها سعيد : انت بس هتدفع عربون نبدأ بيه الشغل ولو مشي الحال هنكمل ممشيش فلوسك في الحفظ والصون هتاخدهم على داير مليم
انا مش هاكل جوز بنتي
مازن : الموضوع مش كده بس
يقاطعها مرة تانية خبط ع الباب مازن : ادخل
الساعي : القهوة يابشمهندس
مازن : حطها هنا ياعم حسن
يضع حسن القهوة ويخرج
مازن : اتفضل ياعمي اشرب قهوتك
سعيد :"قولت ايه في الكلام اللي قولتهولك
انا هاخد بس عربون بسيط كده تلتوميت الف وهكتبلك بيهم وصل أمانه متقلقش
_________________
في مكان ما وقصاد احد الكافيهات
معتز : قولتلي إنك عايزني
ايمن كان بيقفل باب العربية : مالك مستعجل ع ايه
ما احنا هندخل دلوقت وهقولك ع كل حاجه
معتز : مش عارف ليه قلقان ومش مطمن
ايمن : متبقاش قلوق كده يااخي... تعالي بس ندخل نشرب حاجه علشان نعرف نتكلم
دخل ايمن ومعتز الكافيه وكل واحد طلب اللي هو عايزة
ايمن : طالما مستعجل كده فأنا هدخل في الموضوع ع طول
معتز : ياريت علشان دماغي متفضلش تدوي وتجيب في حاجات تانية
ايمن ببتسامة : حاجات تانية زي ايه
معتز : طب تتكلم وبعدين اقولك
ايمن : معتز انا كنت محتاج فلوس سلف
نظر ليه معتز ومردش
ايمن : انا قولت سلف يعني هسددهوملك
معتز : ليه
ايمن : عايز اعمل بيهم مصلحه كده
معتز : عايز كام
ايمن : يعني لو معاك مية ألف يبقى كويس
معتز : دا دين عندك لحد ولا ايه؟؟
ايمن : ليه مصمم تعرف السبب؟
معاك قولي معايا معكش خلاص
انا مش هعلقلك المشنقه يعني
معتز : متعصب ليه
ايمن : اصلك عمال تقولي عايزهم ليه ومعرفش ايه
ايه لازمة السؤال ده
معتز : المبلغ اللي انت عايزة دا يساوي ميه وعشرة جرام دهب ولا مش هتجيبه كامل
ايمن : مش فاهم.
معتز : لا انت فاهم انا اقصد ايه كويس
ايمن : عيب لما تستنصح على اخوك
معتز : انا بردو
ايمن :"كده الموضوع دخل في سكة تانية خالص
معتز : لأ دي نفس السكة بالظبط بس انت اللي مكونتش متوقع اني هوصل بيك للمحطة دي
ايمن : بلاش شغل الألغاز دا يامعتز
معتز : من اول م جاتني حياة وقالتلي ع الفلوس اللي هي عايزاها علشان تشتري الدهب بتاعها اللي باعته ومرضيتش تقولي السبب بالمناسبة
اول واحد شكيت فيه هو انت
وانت دلوقت جاي تثبتلي اللي فكرت فيه
ايمن : لا ناصح اوي
وبعدين يهمك في ايه انهم بتوع حياة ولا حتى بتوع الجن الأزرق انت مالك
ومش عايز منك حاجه.. بعد اذنك
مسك معتز ايده... نظر ليه ايمن بغضب
ايمن : سيب ايدي يامعتز بلاش الأسلوب ده
معتز : اقعد علشان الناس بتتفرج علينا
ايمن : وانا ياعم هسيبلهم المكان كله
الويتر جاي وبيضع كوبين من العصير... وراح يكمل شغله
معتز : اشرب العصير وروق كده وخلينا نتكلم بالعقل شويه
ايمن : طيب ياعاقل اتفضل اتكلم انا سامعك
معتز : ليه تحط حياة في موقف زي دا
ايمن : انا مقولتلهاش تبيع الدهب بتاعها هي عملت كده من نفسها
وبعدين هي مش اول واحده تبيع الدهب بتاعها يعني
معتز : انت شايف إن الأمر بسيط وميستاهلش صح؟!
مش عارف اقولك ايه بصراحه
ايمن : يعني انت لا هتحللي المشكلة ولا كمان عايز تسكت
معتز : واجيبلك منين المبلغ ده
ايمن : هات اي حاجه معاك
معتز : معييش واتصرف انت
ايمن : انا عارف إنك معاك
معتز : شوف انت عملت ايه بالفلوس دي وبيعها ولا اتصرف وسدد اختك
ايمن : ماشي يا معتز... حاضر هتصرف... سلام
معتز : مع السلامة
____________
أنت تقرأ
ماضي لا ينتهي
ChickLit_______المقدمة ________ سرعان ما تمر الأيام وتمضي السنين. القصة تتحدث عن خمس أبطال لقصص قديمة دمجتهم مع بعض نبذة مختصرة عن ماضي كل قصة معانا :_ 💓ندى ومازن ندى من أسرة بسيطه احبها شقيق مازن الدكتور يوسف ولكن بعد معرفته بحب أخيه البشمهندس مازن ب...
