هذا الرجل.... أبوك💚💜💙
🎆الحلقة الخامسة : القسم 2. 🎆
*************
قعد ناظم مقابل مسؤول ع الاعلانات وظاهر انهم يحكاو سريو بارشا بحكم العرض كان قريب ، تحل الباب بقوة من غير لا دقان لا شي وغير هذا تسطع في الحيط عمل صوت كبير ، صفر ناظم وقت شاف وجه ريما مقلوب "اووو ..عاصفة جاية يا سي شاكر ...البس مليح ومتن على روحك "
خزر الراجل مفجوع من الهدة قعد يخزر من بعد لعرفو موش فاهم اش يتصرف وقت شاورلو براسو ،لم دوسياتو وتعدى بجنبها خارج ،صرفڨت الباب وراه وقدمت ناحيتو وشعرها يتهز وراء اكتافها ، حطت يديها ع البيرو وخزرتلو بغل ،مالت ناحيتو " نااااظم ...بارشا حاجات لازم نحكاو فيها "
اتكى بظهرو ع الكرسي " نحكاااو ...مالا لا...اما قبل كل شي ...اتنفس مليح ...خوذ هواء وخرجو " بدا يتنفس بطريقة يعلم فيها كمل نرفزها
صاحت وهي تضرب لبيرو "ناااااظم....ديجا اعصابي ع الاخير "
"بما انك على اعصابك وهايجة هكا كي البحر ...اكيد احمد عمل عملة "
قعدت " شفتو واقف ...مع هاك الڨعر تولين...تخيل ...بعمرو ماحط ساقو في الاستوديو ..توا ولى ماشي جاي ...من الاول قلت عليا انا ...ياخا ظهر ...على خاطر هاك السخطة ...ناظم انت قتلي باش تعمل المستحيل وتقربنا ..ياخا اش عملت جبتلو هاك ايلي ماتتسماش وحطيتها قدام عينو ...رد بالك تكذب عليا ...هو ماهوش يحبها موش هكا "
"وانا منين نعرف ...الطفلة عادية موش باش....."
قصت عليه " لازمك تعرف ...شوف ...انت تعرف انو نورس بكلمة مني تنجم ترميك على طول يدها وماتتلفتلكش ...لذا خلي اتفاقنا ماشي كيف ماهو ماتحاولش تلعب معايا والا والله مانخليك تتمنى في نورس وما توصللهاش"
نفخ " يا ريما ....توا انت عبارة من العايلة وبوك اصحاب مع بابا وشريكو ...ونعرفوك من الصغرى ...تتوقع انت احمد بوهالي ومايعرفش شنوة يستنى فيه اذا خمم في وحدة غيرك...بون ممكن هي مضروبة فيه وطبيعي تتضرب فيه ...خويا ماهوش شوية و انت تعرف الف مرا تتمناه وتتمنى خزرة من عينيه ...وهي مازالت عارضة صغيرة اذا تكسبو تكسب نجاحها ....يعني هوني انت ايلي لازم تتصرف وتخليها تبعد عليه ...يا ريما ايلي يحب حاجة يسعالها مايستناهش تجيه "
رمشت بعينها علامة ايلي تأثرت بكلامو ، مسدت شعرها وبدات حدتها تقل " اما انت زادا لازم تعاوني ...بعدو عليها ...وحطلو في راسو انو هاك الڨعر موش متاعو ...موش يصيم يصيم ويفطر على جرانة "
"يع جرانة ...مافهمتش وحدة قننو وفينو كيفك منين تجيب في الجران والالفاظ هاذي "
وقفت "ناظم....رد بالك تلعب معايا ..واضح "
هز يديه مستسلم " واضح...الا نونو ...رد بالك تبعدها عليا "
هزتو وحطتو وخرجت خلاتو يتبع فيها بعينيه وكيف صرفڨت الباب مرة اخرى عاود اتكى ع الكرسي "اخ...احمد...اش باش يصير فيها اذا تعرف انك طحت من السلوم مع هاك الجرانة "
******
قعدت تخزرلو وهو يثبت فيها ، كلاتو يديه يبدا هو الحكاية ...طز في كل شي ..حتى لو شافوهم طز ...المهم ياخو اللحظة هاكي من الزمان ويسرق بدنها للحظات ويعنقو عندو ...محمحت وقت لقاتو متمسر ماتحركش "لازم نرجع ..."
مسد لحيتو وقت فاق على روحو "باهي ...نحكاو "
"نحكاو " تبسمت ومشات من بحذاه. ..ضغطت ع الماصو موش مصدقة ...جات قدام عينها باريس ...وضوها ...شوارعها ...توريفال ...اكيد هي في الجنة توا ...قعد من بعدها لحظات في بلاصتو قبل ما يدور ويرجع لبيروه ...تصادف مع ريما في ثنيتو ...من الاول ضيقت عينها وتمنات تعاركو وتقلو انت واحد خاين ...لكن اختارت تضحكلو وتتصرف كيف العادة ..وايلي في القلب في القلب ...لازم تمشي بنصيحة ناظم "ايلي يحب حاجة يسعالها "
قدمت ناحيتو "احمد " كان صوتها رقيق مليان انوثة لكن ما أثرش فيه
"ريما ..موش نرمالمون عندك تصوير توا "
ضحكت " عندي ...اما قلت نطل عليك...وكيف مالقيتكش ...تحيرت عليك ...اما طلعت انت هوني ...تلوج عليا "
صححلها " كانت عندي قضية صغيرة ...ماعندها حتى صيلة بيك "
تقلب وجها وحستها نبزة " وها القضية ...تولين "
عقد حواجبو " ابون...وكيفاش عرفت "
صاحت " يعني ...بالرسمي جيت على خاطرها "
نفخ بقلة صبر " ريما ...برا كمل خدمتك...خنمشي على روحي "
وقفت قدامو باش تمنعو " هاني باش نقولهالك ...احمد ...المرا ايلي باش تخزرلها باعجاب ...مازالت ماتخلقتش ...واذا تجرأت وحدة وعملتلك طرف قلوب على شوافرها نحرقها ونحرق ناز معاها ..."وشوشتلو " تعرفني مجنونة ونعملها "
خزرت لشفايفو برغبة قبل ما تتعدى من جنبو وهي تطقطق في الكلوار .
كانت كل وحدة من العارضاات لاهية في حاجة ،اما تجرب في لبسة والا ماكياج واما لاهية تحكي والا تصور في روحها وقت دخلت جيهان ،دقت ع الباب بصوابعها باش تجلب انتباهم "لبناااات " في يدها ماصوات بيض خلاتهم على نار باش يعرفو سبتهم ،حات قدامهم ووقفت بكل ثقة "الناس الكل تعرفو انو ناز عندها ديفيلاي في باريس ....قبل ما نقول ع الاسامي ايلي اختارها ايكيب الخدمة وايلي باش يمثلونا ويمثلو تصاميمنا ...نحب نقول ليلي مااخترناهمش ،راه موش معناها انتونا خايبين ...ممكن المرة هاذي ماهيش فرصتكم ،لذا اخدمو على رواحكم للمرة الجاية لعل تكون هي الشونس متاعكم " تبسمت بتشجيع ومن بعد خزرت للماصوات " هاذي بيياي الطيارة ...من ناز ....ماذبينا تعطونا باسبوراتكم نكملو الاجراءات ...وايلي ماعندهااش تقلنا ...باش نريڨلولها اومورها " بدات تقرا في الاسامي " صفاء....أسماء....حذامي....نسرين...مروى....هادية...ريما ...رانيا .." خزرت للاسم الاخراني ايلي عليه علامة وايلي ديجا خذات البيياي متاعها وخيرت ما تذكروش ،تبسمت ريما بخباثة وقت ماسمعتش اسم تولين ...الحمد الله ارتاحت منها وفرصة ليها باش تثبت روحها وتنسيهم فيها .
*******
دخلت تولين وفي يدها بارشا باكوات وساشيات ، وساعت عينين امها من الحاجات ايلي بنتها شاريتهم ،ضحكت على حالة نزهة وبدات تحط فيهم لوطة "شبيك مفجوعة ...."
"يابنيتي شنوة هذا الكل ،ياخا راحلة "
"لا....اما مسافرة "
"شنوة ...شنوة ..مسافرة ...وشنوة السبة ...لوين ...ووقتاش"
"تابعة ناز ....لوين ...لفرانسا ...ووقتاش ...جمعتين اخرين "
دق قلب نزهة بخوف ...تسافر !؟هاذي اول مرة بنتها باش تبعد عليها، رات تولين قداش وجها تبدل ودخن ،هاكي علاه عوجت فمها " بالطبيعة باش تقلي لا ...اما يا امي " تنهدت " نعلمك انو كل يد شدت اختها ....كل شي حاضر ...قعدو كان دبشات جدد...وهاني شريتهم...وماتخافش ...هاذم من فلوسي. ...ناز حنينة بارشا على عارضاتها ..."
بدلت الحديث " نمشي نتفقد الطنجرة ع النار "
طيشت تولين باكو فرتت ايلي فيه " تي علاه ديما عاملة هكا...مرة في حياتك افرحلي "
تنهدت نزهة وهي تهز الغطاء وتتفقد فطورها...مانيش منجمة نفرح...الله غالب يا بنيتي ...قلبي يغم عليا وقت نتفكر انو كل ماانت تنجح في حلمتك...كل ما حقيقتك باش تظهر .
فبرا تاليفونها لقاتو نومرو ماتعرفهوش ، مضطرة تهز لعل حاجة مربوطة بالخدمة " الو عسلامة "
جاها صوت مرا " تولين معايا "
"وي تفضل انا هي "
سكتت لحظات من بعد تكلمت " اسمعني ...مدام زينب وصتك تقابلها في قهوة ***** ،تعرفها ماهو وين ...تو نبعثلك الكوردوناي متاعها تو تلقاها بسهولة....قتلك لازم تقابلني فم وضروري "
تبسمت تولين " ايه ايه باهي .. قلي ع الوقت وانا تو نجيها "
"حكاية ساعة اخرى"
باهي بارشا تنجم تريڨل روحها في عقلها وتخرج ، نسات اصلا حالة امها وعركتهم الزوز. ...بالنسبة ليها حلمتها والباقي يجيبو ربي .
★****★
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Cerita Pendek★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
