جبته الكم قبل مينشر بالواتباد
#اول_الغيث_مهرة
فيد عبدالله
#بارت٢٧
مساء الورد بارت لعيونكم الحلوة مشتاقتلكم صدگوا بس مو بايدي مااكدر اكتب والله لخاطر لهفتكم اضغط على نفسي واكتب وهم اعتذر جدا اذا دااقصر،،،متابعة طيبة
البارت السابع والعشرون
فيّد عبدالله
مهرة،،بعد الاحداث الصارت احس قوتي انهارت الصلابة الجنت مغلفة نفسي بيهة انهدت وطلعت بداخلهة مهرة القديمة الضعيفة الي اتأذت هواي وانظلمت هواي وسعادتهة دائما جانت لحظات وتنتهي يمكن جنت استمد قوتي من شعوري انه انظلمت ولازم اثبت للكل غلطهم بحقي مجرد ما ظهر الحق وعرف الكل شكد اذاني انهارت اعصابي ومااتحملت مااتأذيت هيج بساعة الصارت الشغلة بس من حسيت خلص كلشي انتهة وظهرت برائتي بعد هالخراب كلة كلش اتدمرت ،، اعتكفت بالبيت حتى للدوام ما رحت طلبت اجازة لان احس انتهيت مثل كل مرة من انقهر مااتحمل واوگع واني ماشاء الله يومية قاهرتني الدنيا شكل، ،شكلت عندي صخونة موتتني گوة اشيل راسي والجهال كوة اوكف اسويلهم اكل او اكمل شغلاتهم حمودي اعلمة بدروسة واني نايمة اخذ علاج وميفيد شوية وارجع اصخن تخابرني غصون واكللهة تحسنت وارجع بس يروح مفعول العلاج اصخن واتعب احس حتى عضامي كامت تأذيني مااكدر اوگف رابع يوم وخابرتني غصون گوة رديت عليهة
غصون،،شچاج ياعيوني دروحي للطبيب
مهرة،،مااگدر اسيطر عالجهال واروح
غصون،،دخابري غيث
مهرة،،لو اموت هنا بفراشي مااخابرة
غصون،،اوف ياعنادج،،اني اخابرة
مهرة،،ابد ازاعلج مو عناد بس مقهورة منة كلللش مذبوحة وجع عالسواه بينة لو واثق بية شوية جان عالاقل انطيتة عذر واتحملت شما بدر منة بس هو رخصني كلش وباعني باول زلة وهدم كلشي حلو جان يجمعنة اكثر واحد اذاني هو يمكن لان هو اكثر واحد حبيتة بحياتي فهالشكل اتأذيت منة ،،لذلك مااريدلة اي وجود بحياتي
غصون،،كافي هسة انتي بيا حال وتاكلين بروحج هيج
مهرة،،موبيدي والله قبل جنت اتحمل وجودة واگول معذور صدگ الشافتة عينة ولو مو عذر هذا بس اقنع نفسي هسة بعد ما عرف هو شكد ظلمني وجرحني بيا عين نتواجه خليه بعيد عني افضل لان كلمااشوفة احقد عليه اكثر
غصون،،بس حرگتي روحج وانتي منا مريضة هسة لوما دوام مو اجيج والله
مهرة،،مابية شي لايظل بالج ياما لطمتني الدنيا بقت على هاي لايظل بالج هسة اكل واخذ علاج ،،سديتة من غصون وكمت سويت اكل الي وللجهال جبرت روحي اكل گوة عالمود العلاج بس احس الاكل سم ونزل معدتي بقيت نفسي تلعب واخر شي مااتحملت ركضت للحمام اتقيأ اتخربطت كلش حتى مابية اطلع من الحمام كعدت بالگاع ونفسي گوة اسحبة وحمودي ياعيوني انخبص بية والله ساعتهة كلت راح اموت هنا وكمت اتخيل اموت ومحد يدري وجهالي يضلون يبچون الفكرة رعبتني،،حاچيت حمودي،،روح ماما جيبلي موبايلي اخابر عمو مهدي كلت اخابر مهدي هذا الوحيد الي احس ما غدر مثل البقية،،اسمع حمودي يحجي بالموبايل كلت هو خابرة لان يعرف يقرة ويخابر،،سمعت الباب وصاح حمودي عموو وركض يفتحة ،ماما ابدل واجي گلة ينتظرني بالباب،كمت غسلت هستوني بباب الحمام طلعت گوة امشي لازمة الباب لان الدوخة سطرتني ومااحس الا غيث بوجهي
