ماضي لا ينتهي

الحلقة ٨

#ماضي_لا_ينتهي
#بوسى_مصطفى

     ____الحلقة الثامنة_____

في التليفون📞
أميرة : يابنتي اهدي هتموتي نفسك بالشكل دا
ماجده : جوايا نار يااميرة... نار في قلبي مش عايزة تتطفي
اخوكي باعني وبسهولة كده هونت عليه
أميرة : فادي مبعكيش ياماجده
بدليل انك لسه مراته
ماجده : مصدقه اللي بتقوليه دا
م يطلقني بقى ويخلص سايبني على ذمته ليه
أميرة : انا لحد علمي إنك كنتي موافقه
ماجده : أوافق ع ايه يااميرة
تفتكري في واحده هتوافق على حاجه زي دي
اكيد غصب عني يعني
أميرة : طب اهدي وروحي اعمليلك حاجه سخنه كده اشربيها وارتاحي شويه على السرير
انا لو في الزقازيق كنت جيتلك
ماجده : أميرة انا مليش حد
لا اب ولا أم ولا اخ
كنت بقول انتوا اهلي وهتعوضوني على الحرمان والوحده اللي انا عيشتهم
مامتك هي اللي اقنعت اخوكي بالفكرة دي وهو وافق كإنه مصدق
وخيلانك مرحبين اوي طبعاً ماهي بنت اخوهم
انا حاسه اني لوحدي معييش حد
أميرة : ربنا معانا كلنا
ياماجده مينفعش تقولي كده وبعدين احنا معاكي وخيلاني ملهمش علاقة بالموضوع
وماما ليها وجهة نظر ومش قصدها خالص انها توجعك ولا تجرحك وفادي فاهم إن الوضع كده أفضل ليه علشان بنته
بس اللي انا وانتي حاسينه غير كده
اصبري لما نشوف الايام الجايه هيحصل فيها ايه
ولحد م نشوف بقى انتي اوعي تتغيري من ناحيته
اكيد فاهماني متديش فرصه ابدا لحد يدخل بينكم خليكي هاديه وعاقله
معلش انا عارفه الموقف صعب بالنسبالك وانا كل اما احط نفسي مكانك ابقى هتجنن
ماجده : متشكره يااميرة إنك بتاخدي بخاطري بكلامك الحلو ده
بس انا بجد مش قادرة اعمل اللي بتقولي عليه ده
أميرة : لأ هتقدري اوعي ابدا تستسلمي لازم تدافعي عن بيتك
وبنينك الصافيه دي اكيد هتشوفي الخير اللي هتبقى فيه بس اصبري شوية معلش
ماجده : ربنا يفرح قلبك
انا هديت شويه اهو
أميرة : طب كويس اعملي اللي قولتلك عليه بقى
ماجده : حاضر... معلش وجعت دماغك
أميرة : لا ابدا ياحبيبتي
مفيش اي حاجه هكلمك الصبح
ماجده : اوكيه... سلام
أميرة : مع السلامة
كان منصور بينادي ع أميرة وهي واقفه في المطبخ قفلت التليفون وراحت تشوف حماها
كان سيف داخل البيت في اللحظه دي
منصور : يااميرااااااا... بتعملي ايه عندك
تجري أميرة تشوف حماها
سيف :"في ايه يابابا
منصور : بنادي على مراتك تشيل الاكل ده
سيف : حاضر انا هشيله
أميرة خارجه من المطبخ : حاضر يابابا
سيبه ياسيف انا هشيله
سيف : لا اقعدي استريحي
واخد سيف صنية الاكل ودخل بيها المطبخ
منصور : معلش يابنتي هاتي الدوا اللي جنب التليفزيون ده
أميرة : اتفضل ياعمي
سيف يعطي لباباه كوباية مياة
سيف : عمر وليان ناموا يااميرة
أميرة : اه ناموا
منصور : بعد م وجعوا دماغي
سيف : سلامتك يابابا
منصور : ياابني انا صحتي مبقتش مستحمله
سيف : حقك عليه.. خلاص يااميرة ابقى سيبي الولاد يلعبوا فوق مينزلش تحت
منصور : قولت كده قالتلي مينفعش اسيبهم لوحدهم
بقولها تفضل معاهم فوق مش عايزة
سيف : وهنسيبك لوحدك يابابا
منصور : هيحصلي ايه يعني العفريت هياكلني
هاتي لجوزك ياكل علشان يطلع ينام
سيف : لا هاكل فوق علشان نسيب حضرتك تستريح
منصور : طيب تصبحوا على خير
_____________