قصة #فصلية_لشيوخ (فصلية الزمن)
البارت 1 و 2
مرحبا اسمي حور عمري 12 سنة...... مواصفاتي بشرتي بيضة وعيوني كبار ولونهم اصفر ما اعرف عسلي وملامحي الباقية ناعمة شعري لونة خشبي طولة وسط يجي نازل من خصري .... اني يتيمة الابوين امي مكان عندها اقارب بس ابوها واختها وامها توفت وجدو مكان قابل بزواج امي وابوية بس ماما كانت تحب بابا هواية فعاندة ابوها وتزوجوا جدو قطع علاقتة بماما نهائياً وماما حاولت ترجع علاقتها بجدو هواية بس هوة ميقبل ومينطيها فرصة ماما استسلمت وگالت خلص اتركة براحتة بس بقت غصة بداخلها مهما يكون ابوها المهم ادور بحوالي 6 شهور سمعنا خالتي تزوجت ماما رادت تروح وبابا ممنعها وراحت هي وبابا بس جدو مقابل وطاردهم ادور بحوالي شي سنة او اقل سمعنا جدو توفة وماما راحت للفاتحة وخالتي طردها ومقبلت تواجدها بالفاتحة وماما رجعت للبيت وباقية تبچي وتلطم وبابا يواسيها.... اما بابا فكان هو الولد الوحيد وعندي عمة وحدة حنينة وتحبني هواية وهي الي ربتني بعد ما توفوا ماما وبابا بس زوجها ابد مو خوش رجال يشرب وعينة زايغة ابد مو راحة وكان دائما يجي بنصف الليل ويبقى يضرب بعمتي ويصيح على اولادة كانت عمتي دائماً تخليني البس ملابس فاطمة وفاطمة سمينة وخشنة واني ناعمة فملابسها تكون كبار علي ومن اسألها ليش عمة هيچ تخليني البس تگولي ما الچ دخل البسي واسكتي ودائماً تخليني البس حچاب ما انزعة ابد بالرغم من انو فاطمة وزهراء الي بنفسهن يلبسنة ويسونه ومتكلمهن وكانت متخليني اگعد يم اولادها نهائياً ....عمتي عندها 3 ولد و2 بنات.... الچبير احمد عمرة 20 سنة بس طبعة بشكل طبع ابو همات يشرب وعينة زايغة ويزحف على البنات يعني ممبقي شي بأبو مماخذة... ادور فاطمة عمرها 18 تكرهني تمووت مني ما اعرف شنو السبب بالرغم كلشي ممسويتلها بس تكرهني شأسويلها المهم ... ادور حمزة عمرة 16 احسن من احمد بي بعض من الصفات الحلوة يعني ميشرب وكذا بس يدور بنات ويشرب جگاير.... ادور زهراء بعمري مرات تصير وياية زينة ومرات اختها تحاچيها ما اعرف شتگوللها بس تجي تبقى تصيح علي اتركها ما احاچيها تبقى تحچي لحد متمل وتسكت.... ادور عباس عمرة 8 سنوات بعدة صغير بس اكيد من يكبر يكون بشكل اخوانة.... باچر عندي دوام هااا نسيت اگوللكم اني ادرس وهذي السنة اول متوسط طبعا اني متفوقة بدراستي وذكية كولش بحيث الي اسمعا احفظة بصم واذا اشوف الشي واركز بي اكثر من مرة احفظة يمكن قسم منكم ميصدگ وميثق وبس والله اني هيچ....
گعدت الصبح للدوام رحت غسلت وسويت روتيني اليومي ولبست ملابس المدرسة رحت گعدت فاطمة وزهراء يحظرن نفسهم صار ڤوگ 10 مرات اگعدهن ويرجعن ينامن صارت الساعة 7:30 وهنة بعدهن مجاهزات اني گتلهن حروح قبلچن گالن روحي عمتي انطتني مصرفي الي هوة 500 دينار بس اني ما اشتري بي اضمة واسوي هيچ اني من توفوا امي وابوية لمن كان عمري 8 سنوات وبقت عمتي تربيني وسمعتها مرة تگول البناتها اذا انطيچن مصرف للمدرسة جمعنة يفيدتچن من تحتاجن شي.... وهنة گللها اي ومهتمن للموضوع بس اني اخذت بكلامها وبقيت اصمدة عندي مو بس مصرف المدرسة مرات عمتي تنطيني ربع بين 3 او 4 ايام همات اصمدة بقيت على هذي الحالة 4 سنوات وهذي السنة ال5 والحمدالله صارن عندي كومة فلوس بس طبعاً محد يعرف بيهن مخليتهن بعلاگة سودة وية ملابسي اني صح طفلة بس البيئة الي عايشة بيها اني علمتني وانطتني عبر اكثر واكبر من عمري المهم داومت عادي نفس الروتين ادور صارت الحلة طلعنا للبيت وصلنا واشوف كومة ناس يم باب البيت ونسوان تصيح واصوات عالية مال زلم احنة بقينة وحدة تصفن بوجه اللخ ادور ركضنا 3 للبيت بس فاطمة سمينة متگدر تركض وزهراء وياها واني بقيت وياهن اخاف ادخل وحدي المهم وصلنا وشفنا عمتي تبچي وتدگ ولطم .....
