💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

⏳الحلقة 6 : القسـ1ــم⏳

هذا الرجل.... أبوك💚💙
🎆الحلقة السادسة : القسم 1 🎆
***************
حلت فاليزتها وركحت دبشها ،هذات بيتها في الاوتيل وكانت معاها عارضة اخرى تشاركها فيها وايلي هي صفاء ،وقت جبدت شوميزة زرقاء فاتحة عريانة من اكتافها شهقت بينومتها باعجاب "ياااي تقتل ...امان منين شريتها !؟ والا جاتك كادو ...شنية الماركة بربي "
ضحكت " من الاسواق ...وماهيش ماركة ..." خزرتلها " انا مازلت مابديتش نلبس في الماركة "
نڨزت صفاء وخذاتها عندها " بربي تتفكرش منين من الاسواق والله شرهت عليها ...امان دلني خناخو وحدها كيفها "غمزتها ' انا كيفك مازلت مابديتش نلبس في الماركة "
ضحكو الزوز "باهي اول مانرجعو لتونس نمشاو مع بعضنا وندلك علي يبيعو فيها "
"تعرف تولين. ...نحسك موش كي البقية ...تعجبني تبانلي طيوبة وقلبك باهية وماكش بغضية "
تبسمت " خسارة ...راي البقية موش هكا "
"بالعكس ...كل مرة نحكي مع البنات وتكون انت في الموضوع يشكروك...ماعدا ريما ...اي ...مااطول لسانها "
"هاكي اكثر وحدة تكرهني "
لمعت عينين صفاء" تولين ...نسألك! ؟ ...انا سمعت تراطش كلام وماذبيا نتأكد منك "
عقدت حواجبها " ان شاء الله خير !؟ "
"ريما تكرهك ...على خاطر ولد مدام زينب ...فمة حديث يدور يقول انو ...انت وهو ...تحبو بعضكم ....صحيح ...امان انت وهاك البوڨوص ايلي عينيه خضر "
وساعت عينها وحست بشياح في ڨراجمها ...شنوة باش تجاوبها ...مالقاتش ماتقول و من زهرها جاها ميساج ، تلفت صفاء وخذات تاليفونها تشوف شنوة لقاتو من عندو " نستناك ....اذا تحب تشوف باري " تبسمت وخزرت لصفاء نجمت تبدل الموضوع بسهولة " قتلي الشوميزة مزيانة ....نلبسها يعني !؟ "
مشات معاها " ايه ..فتوق والله "
اختارت شورط في البلون و معاه بسكات بيضاء ، شدت شعرها لفوق وخلات رقبتها البيضاء باينة هابطة عليها كان سبلات من شعرها ، اختارت لون الرمان باش تحطو في شفايفها وخيرت حاجة سامبل في المكياج ،وهي تحط في شقاشقها في الصاك ا دو الصغير ،سألتها صفاء" صحة ليك خارجة ؟؟...وين ماشية توا ليل ؟!"
تبسمتلها وهي تهز تاليفونها " العصفور وقت يتحلو القفص ، يجنح من غير مت يخمم لا في الليل ولا في النهار "
غمزتها وخرجت ،هبطت من الاسونسور ومشات خطوات باش تخرج من الاوتيل ،لكن مالقاتش احمد ...وينو ...وين مشى ،على اساس يستناها لوطة ..خزرت للطريق لعل تراه ،لكن ماشافت شي ، حست بصوابعو يضربو كتفها ،دارت لقاتو وراها زهو يتبسم ، حست بكورون يضرب بدنها ، اول مرة تراه لابس كاجويل ...دجين ازرق غامق وتريكو في البلون ، شعرو كان منظم ومرتب كيف عادتو ، تبسمت بحب خلاتو هو زادا يتبسم " حاضرة !؟ "
شاورت براسها ايه ، في حركة ماتوقعتهاش ،خذى يدها عندو " مالا سلم روحك للڨيد "
قبل ماتفيق من صدمتها ،جبدها معاه ومشى ، لقات روحها اتبع فيه مستسلمة " باش نتمشو شوية ، الشوارع هوني نظيفة ومزيانة وفي ها الوقت بالذات تبدى حافلة ...وتنجم تشوف بعينك مدينة الانوار ايلي يحكاو عليها "
تدلى شعرها وراها وهي تخزرلو " يقولو انو في باري يتلمو العشاق الكل ،يعني باش نراو بارشا كوبلوات "
ضحك " ايه وي ....بااارشا ومن الالوان الكل ...فمة شكون يجي سبسيالمون باش يعترف بحبو هوني "
تنهدت بصوت مسموع وهي تخزر للعباد.الماشية والجاية ...بالحق الالوان الكل ...من الاسمر للاشقر للاحمر للقمحي ...وكاينو هاك البلاصة نقطة العالم الوحيدة ،كبس على صوابعها باش يفيقها من سرحتها ،خزرتلو وهي تحط يدها الثانية على ذراعو "أحمد....تعرف شنوة احساسي توا "
هز راسو " ايه وي ...احساس اول مرة تسافر وتحط ساقك في بلاد اخرى ...مايتوصفش "
"نحب نغني ونحب نشطح ،نحب نجري ونحب نصيح ،نحب نحل يديا على طولهم تعرف يا احمد....كايني في سابع سماء ...مرسي على كل شي "
"وعلاش المرسي "
وقفو ع المشي ، وتقابلت عينيهم وسط ضوء احمر خافت " لانو ....انت اول واخد آمن بيا...وانت اول واحد حلي باب النجاح ...انت ايلي عطيتني فرصة حياتي "
مسد اكتافها " لا....موش انا ...اصرارك وعزيمتك...وحبك للنجاح ...وصبرك هوما ايلي خلوك ليوم في باري "
هوني تعدى ڨروب متاع سياح وراه خلوه يلزلها باش يتعدو ، رمشت بتوتر وقت حست بسخانة بدنو قريب منها ، قعد يثبت فيها وفي عينيها ، قلبو يغلي غليان وموش منجم يتحكم فيه ، عارفة انها في ورطة ...هاكي علاه اول مارات ميني سوبرات ،بعدت من قدامو وشاورتلها " عطشاانة موت ...خليني ناخو دبوزة ماء"
ضحك لين طاح راسو لتالي ،عارفها تتهرب منو ومن اي قرب بيناتهم وهذا يعني انها تعاني ايلي يعاني منو ، تتحرق من القرب كيفو "خليك انت ...تو ناخولك دبوزة ماء انا ...اعتبرها هدية "
ضيقت عينها " مجحاح ...وريث ناز بكلو ياخولي هدية دبوزة ماء"
طلع لسانو ببلادة ودار ناحية الميني سوبرماركت ، تبعتو لين دخل ومن بعد تلفتت للطريق ، حست بالبرد ياريتها مالبست ها الشورط والشوميزة ايلي اكتافها عريانة ، قابلها من الجيهة الاخرى ع الطريق ڨروب من الشباب قاعدين ويغنو بلغة مافهمتهاش شنية دايرين بيهم عباد وكل مرة واحد يزيد وتكبر الحضبة ، حبت تقرب منهم وتسمعهم منها ليهم ،في الوقت هاكي كان احمد يخرج وفي يدو صاك من الكارتون مرسومة فيه السيڨل متاع السوبرات ، تعدت كرهبة اودي زرقاء تجري عكس ايلي لازم يكون وضربت وحدة من ايلي قصو الطريق وقتها ،صوت الضربة خلاه يهز راسو ويخزر ، كانت الممدودة بنية شعرها مفرت ع الطريق والدم غلف الشوميزة الزرقاء متاعها ، اما بقية بدنها ماكانش ظاهر بحكم العباد ايلي تلمت ، طاح الصاك من يدو و من غير مايشعر مشى يجري ناحية الحضبة ،دخل بيناتهم وهو يدز بيدو وساقيه لين ولى في الخطوط الاولى ونجم يشوف الطفلة ايلي ضربتها الكرهبة .