Gun N Roses

part 16

Sekumbang ka udah begulai enggau Browen ati Lyana bisi nyamai mimit mina iya enda  dikemendarka pansut ari rumah nya kediri .Rumah besai ka alai iya diau mina begulai enggau ama nya aja.Rumah besai nya cukup manah tang sunyi enti iya pansut iya mina ba tengah laman dia aja laban ba gate luar rumah meruan bisi urang nyaga belama .
"Ingat Lyana anang nguji pansut ari rumah tu .Aku ulih meri nuan nama aja utai dipinta nuan asal nuan anang pansut ari rumah tu ."pia ko pekat Browen sebedau iya nya nurun gawa .Lyana enda nemu pengawa laki nya tang tiap kali nya pulai ka rumah nadai kala lama kadang kadang enti maya tinduk pen laki nya selalu nerima call ti ngasuh laki nya pansut ari rumah datai enda datau dua tiga ari kadang seminggu .

Pengidup Lyana nitih ka semaya Browen .Lyana mina nampung sekula iya ba rumah aja laban bisi pengajar ti udah diupah Browen ngajar Lyana ba rumah .Enti nadai pengawa Lyana rindu berandau enggau ama iya Ibuk Esah tang enda lama aja laban ibuk nya mina datai meresi rumah nya sekali enggau nyumai ka iya lauk aja.
"Ibuk"ko Lyana gaga ka ibuk Esah nya enti ama iya datai .
"Nama endu ?"pia ko Ibuk Esah nanya iya .
"Nama pengawa Browen nya kebendar iya.Nadai kala meda iya terenah diau ba rumah"ko Lyana nanya .Mua Ibuk Esah lalu mali enda chiru baka tadi .

"Eerr aku pen enda nemu pengawa iya endu.Aku ka nembu ka pengawa kau dulu legi tua berandau baru endu "ko Ibuk Esah nyaut baka ka bisi utai dilalai ari iya .
"Anang guai .Kati aku enda patut nemu nama utai nyadi ba iya ."pia ko Lyana agi ngansak ibuk nya .Ibuk Esah merening mua Lyana enggau ribu reti ti enda ulih disagam .Kelalu mayuh rahsia disimpan iya sepengelama iya nyadi ama ba rumah .
"Nama nuan amat deka nemu?"pia ko Ibuk Esah nanya enggau jaku ti begetar sereta ati ti becampur kesal .Lyana nagun ka pala tanda iya sedia ninga jerita ibuk nya .

"Mayuh utai nyadi tang anang nuan irau Browen nya siku lelaki ti cukup iya badas tajapen nuan biak ari iya aku ngarap ka nuan mereti sereta bejanji ngibun iya."ko Ibuk Esah megai jari Lyana .
"Uji nuan nusi siti siti ibuk awak ku mereti "ko pinta Lyana laban ati iya keran ka ngelala laki ti benama Browen nya .
"Browen bisi siku sapit ,sapit iya udah nadai maya ba penusah jalai alun .Browen enda begulai enggau apai seduai indai iya ari mit laban indai iya ngasi ka Hud ari iya .Seduai menyadi iya diserara ka indai iya empu ti ngujung ka Browen besai enggau kurang kasih sayau ti ngujung ka ati iya kering .Maya umur iya 17 taun aki seduai inik iya parai tuai  iya dianjung apai enggau indai iya sekula ba menua jauh selama lama ngidup ka diri ba menua urang din ."Ibuk Esah matak seput ngenang nasib Browen ti ngenyinu ka ati iya .

"Iya pulai semadi sapit iya parai tiga taun ka udah .Indai iya semadi nerima iya laban gamal seduai iya Hud sebaka .Hud nelap nitih jaku apai seduai indai iya tang Browen sigi kasar jaku sereta teguh penemu nya ti selalu mai iya enda kala sebulu enggau indai iya .Apai iya manah apai iya meh selalu ngabas iya maya iya sekula ba menua luar .Diatu apai iya ba sepital laban strok lumpuh seumur idup .Indai iya nadai kala nyenguk apai iya laban indai iya ingin ka reta pengeraja."ko Ibuk Esah nusi ngagai Lyana .

" Diatu iya nunduk ka Browen ngambi bisi ngatur kompeni iya enggau bisnis sida iya .Utang indai iya makin mayuh sekumbang apai iya ti udah sakit nya alai diatu Browen ngurus ka semua nya siang malam.Browen mega mayuh munsuh ti tau munuh iya dalam terang .Nya kebuah Browen enda ngasuh nuan pansut ari rumah tu ."pia ko ibuk Esah ngabis ka jerita iya.
"Nuan mina duduk diau ba rumah  enggau selamat enti indai iya nemu enggai ka pengidup nuan tusah ila .Indai iya sanggup ngupah sapa aja dikena ngemedis ka nuan enti iya nemu bisi ditu ."Lyana nyau nelan liur ninga jerita Ibuk Esah indah pansut ari mulut rimau tama ga ngagai nyawa baya .