كاتبك معانا ( كل كتاب ليبيا )

حلقة 7🔥 زهور جمال الدين ❤️

برنامج #كاتبك_معانا
إعداد و تقديم : ريان
حلقة : 7

.
مسأكم خير يا حلوين و صح فطوركم يارب ، طبعا ما شاء الله البرنامج عاجب هلبا ناس و التفاعل عليه قوي ،
اليوم حلقة من اقوي حلقات البرنامج لان ضيفتي تعتبر رائدة في عالم الروايات مش بس كاتبة ، كاتبة من الطراز الرفيع ، رواياتها نالت اعجاب كبير لانها تحكي الواقع و المجتمع الليبي ، تعتبر من انجح الكاتبات في ليبيا ، اسلوب سردها راقي لدرجة لا توصف ،
ضيفتي في حلقة اليوم ،، الراقية ‎#زهور_جمال_الدين ،
قبل ما نبدا الحلقة نعطيكم معلومات محبين زهور يعرفوها بس فيه ناس ما يعرفوهاش
.
الاسم : زهور جمال الدين ( ليس اسمها الحقيقي )
السن : 41 عام / مواليد : 1979 / عزباء
( معلمة رياضيات )
بداياتها : 2018 / اول رواية : قلبي شاريك
متلها الاعلي في مجال الكتابة : الكاتب الليبي عبدالرحمن حقيق
اكتر عمل قريب لقلبها : حكاية فاطمة
لا تحب الحيوانات الاليفة اطلاقآ
حاصلة علي جائزة افضل كاتبة ليبية لعام 2019 في استفتاء MBC LIBYA
نبدا الحلقة
.
ريان : جاهزة
زهور : جاهزة
.
ريان : السوال الاول : شن يلي جعل زهور من استاذة رياضيات الي كاتبة روايات ؟
زهور : الكتابه موهبة والرياضيات دراسة
.
ريان : زهور امراة عملية او ربة منزل ؟ و ماذا تفضل ؟
زهور : الاثنين .. بس نفضل زهور العملية اكثر
.
ريان : زهور امراة متزوجة او لا ؟ و هل لديها اطفال ؟
زهور : عزباء وليس لديا اطفال
.
ريان : تأمن زهور جمال الدين ؟ بلصداقة الحقيقة او لا ؟
زهور : طبعا اؤمن بها.. والصداقة الحقيقيه لا تقتصر عالنساء فقط
.
ريان : لو امكن ؟ اسم اغلي صديقة لزهور ؟
زهور : عندى صديقات معينات غاليات وروح وحدة منقدرش ننحرج ندكر وحدة لانهم نفس المستوى فى قلبي
.
ريان : زهور من النوع يلي تبكي هلبا ؟ او دمعتها عزيزة ؟
زهور : دمعتى عزيزة هلبا الحق... نادرا مايوصل موضوع عندى للبكاء
.
ريان : مبدرة او بخيلة ؟
زهور : مبدرة
.
ريان : هل حلم من احلام زهور الاسرة ؟ او لا ؟ و لماذا لا ؟
زهور : اهم حلم من احلامى ، وياااربي يتحقق
.
ريان : تأمني بلصدف ؟ او كذبة اخترعها المغفلين ؟
زهور : اؤمن .... جدا
.
ريان : نسبة جمال زهور جمال الدين ؟
زهور : اسألى صاحباتى 😊
.
ريان : شن الحاجة يلي تحبيها في الراجل و المراة في اول لقاء ؟
زهور : نحب البساطة والعفوية وعدم التصنع
.
ريان : شن الشي يلي ما تحبيشي في زهور ؟
زهور : التسرع فى الحكم على الناس بطيبتى الزايدة فى بعض الاحيان .... لان فى زمنا توة اللى تحسابها موسى يطلعلك فرعون
.
ريان : تعرضت زهور للخيانة ؟ مش بشرط تكون من حبيب ؟
زهور : لا
.
ريان : فيه حد في عيلتك ما يعرفش انك كاتبة ؟
زهور : فى هلبا مايعرفوش
ريان : متل من ؟
زهور : ابي و امي ، باعتبار ان اصلا ماعندهمش فيس ، لكبر سنهم ، هما يعرفو انى نكتب ، بس مايقروليش
.
ريان : بما انك رائدة الروايات الرومانسية ؟ شن القصة يلي كتبتيها و حسيتيها و كانك عايشة فيها ؟
زهور : رواية حكاية فاطمه
.
ريان : ليش حكاية فاطمة ؟
زهور : لان فيها كم من الفتاوى الدينيه .. ولان كثير من متابعاتى قالولى ان احوالهم تغيرت مع ازواجهم ..لانهم قلدو فاطمه بطلة القصة كيف خلت زوجها يهتدى ويبدا يصلى وفى نهايه القصه نشوفو انه اصبح داعية اسلامى
.
ريان : لو تختاري بطل من ابطالك ؟ يطلع في حياتك ؟ من يكون ؟
زهور : بالتاكيد اكحيلة 😊
.
ريان : لو طلبت منك قناة تلفزيونية انك تطلعي بشكلك في احد اللقاءات؟ هل توافقي ؟
زهور : لا ...طلبو منى ورفضت . بس درت لقاء عن طريق المكالمة علي قناة سلام
.
ريان : ليش اختارت زهور ملف شخصي فقط و مش قروب خاص بيها ؟
زهور : نحب نتواصل مع جمهورى بي مناشير غير حلقات الروايات .. ولدلك اكتفيت ببروفايل بالرغم بداياتى كانت فقروبات نسائية
.
ريان : زهور تحب اللمة او الوحدة ؟
زهور : الوحدة باعتبار ان عندى حلقة يوميا كتابه..و تبى وقت تفرغ
.
ريان : من الكاتب او الكاتبة يلي لفت نضر زهور في الاونة الاخيرة ؟
زهور : بيش يلفت نضرى لازم نكون نقراله وانا الحقيقه مانقرا لى حد .. ولكن اكثرهم اصدقائي ...والبركة فيهم قايمين بواجبهم تجاه قرائهم تحياتى الحارة ليهم كلهم بلا استثناء
.
ريان : الحياة من غير حب كيف تشوف فيها ؟زهور ؟
زهور : ماشى حالها 😊
.
ريان : حنسالك بعض اسئلة كتبها الجمهور ؟
زهور : تمام
.
سوال من الجمهور : نبي انقوللها تبعدي علي السياسه صح هي من حقها اتعبر علي رأيها بس هكي ممكن تخصر جمهورها ومعجبينها وربي ايوفقها ونبي انقوللها من روايتها تعرفت علي عادات وتقاليد طرابلس وحببتنا فيها ؟
زهور : بارك الله فيها اللى كاتبه التعليق ..على راسى😊
.
سوال من الجمهور : عندها قصة جديدة في رمضان😍 ؟
زهور : ممكن نكتبها 15 حلقة بس
.
سوال من الجمهور : من وين تجيبي في الافكار المتسلسة للروايات وهل عندك ملهم للشخصيات بصراحة ولا اروع؟
زهور : اولا بارك الله فيك عالاطراء
مفيش حد معين ملهم ..بس مواقف تصير قدامنا تخلينا ننسجو منها قصص ونألفو
.
سوال من الجمهور : لماذا روايتها لا تعرض مسلسلات أو فيلم قصير ؟ و هل عرض عليك ؟
زهور : انطلبت كدا مرة .. بس مشكلة انتاج مفيش
.
ريان : انتهت اسئلة الجمهور
زهور : مشكورييييييييين جدا جدا
.
ريان : و عندنا اسئلة خفيفة قبل نهاية الحلقة ؟
زهور : تفضلي
.
ريان : شن طقوس زهور في ايام رمضان ؟
زهور : اول شى وانا صايمه مانحبش نتكلم نهائي لعند المغرب 😁..يعنى مفيش هدرزة مجرد ردود بس

ثانيا قراءة قران ..اقل شى 3 ختمات ولله الحمد .. صلاة وقيام ودعاء ومسامحه الجميع لتقبل دعواتى لله ...

طبعا طبخ ونفخ ولااااازم من حاجه حلوة يوميا 😊
.
ريان : اكتر اكلة محترفة فيها زهور ؟ و اكلة لازم في سفرة رمضان ؟
زهور : كل الاكلات الرمضانيه محترفه فيها😊😊.. بس لازم مبطن وبوريك يوميا من ضمن السفرة عشان بوى وامى
.
ريان : و كلمة شكر ال MBC LIBYA 🇱🇾 و رايك فيها كا صفحة ؟
زهور : نحب نحيي صفحة mbc Libya لانها مختلفة عن كل الصفحات فى عرضها لى رواياتها وتفاعلها مع الكتاب ومع الجمهور ..... استمرو مجهودكم واضح
.
بهذا نكونوا وصلنا لنهاية الحلقة ، استمتعت جدا جدا بلقاء اولا لان ردودها راقية و سلسة جدا الحق و متقفة ، نتمني ليها نجاح اكبر و اكبر و توصل لكل شي خاطرها فيه ، لانها تستحق بجد ❤️
.
نتلاقوا غدا ان شاء الله و حلقة جديدة و كاتب جديد و رح يكون الكاتب الراقي جدا #أحمد_عبدالله
.
باي باي