♤حنين♤

بسم الله الرحمن الرحيم

رواية .. ♤ حنين ♤

بقلم .. كيمو 🍟

♤1♤

◇معظمنا داخلين في علاقات و معظمنا كمان م داخلين في علاقات .. اي زول فينا داخل في علاقة جادة مع زول بحبو بكون مجرب حاجة اسمها اهتمام .. و الاهتمام لما يكون من زول بحبك و انت بتحبو بكون حلو شديد بس الاهتمام دا لو م كان بالطريقة الصح ح يتحول لي تحكم و العلاقة بتبدا تتهدم بمجرد انه في طرف بتحكم في الطرف التاني بطريقة غلط .. و دا السبب البخلي كثير مننا او من اصحابنا م مرتبط عشان بقول ليك انه م عايز زول يتحكم فيهو و في حياتو و عايز يعمل اي شي عايزو لانها حياتو براهو و هو حر ..\\ بالجد م بنقدر نلومهم لانه تفكيرهم دا م بتغير بسهولة .. و الصعب بالجد انك تلقى الزول الصح ترتبط بيهو .. اصلا م ساهل كدة تلقى زول يحبك زي م انت بتحبو لازم تتعب و تتكسر او تتكسري كثير لانه الحاجة السمحه او الكنز الغالي م بتصل ليهو الا بعد معاناة◇

🖊 ح نبدا الرواية .. في البداية ح احكي ليكم عن ((حنين)) بطلة الرواية ..
حاليااا حنين عندها 9 سنه يعني في سنه ثالث اساس ..حنين عايشة مع امها ((سماح)) و ابوها ((جمال)) و اخوها ((محمد)) .. محمد اكبر منها بي ثلاثة سنة ..حنين من و هي صغيرة كانت طفلة مبتسمة ..يعني نوع البنات ال مما تشوفهم انت تبتسم طوالي و يكون نفسك تسلم عليها و تحضنها ..دا غير لما تتكلم ..يعني صوتها رقيق و واضح و سمح ..م عارف ح تفهمو حنك الصوت دا ولا لا ..المهم دا غير شكلها ..بمناسبه شكلها عشان اوصلو ليكم بطريقه اسرع ..امها كل يوم قبل م تطلعها للترحيل بتحصنها و لافة ليها كمون في رقبتها ..لانو باختصار كدة هي سمحه لدرجه انها بتجذب عيون اي زول ليها .. و امها اكيد بتخاف عليها من العين ..لانو زي م عارفين { العين فلقت الحجر} م عارف انتو بتصدقو الكلام دا ولا لا ..المهم م علينا م موضوعنا ..🖊

🖊موضوعنا انه حنين كانت معروفه في المدرسة كلها ..حاليا هي في ثالث اساس يعني صغيرة ..بس سمعتا كانت كبيرة في المدرسة نظرا لشكلها و شخصيتها و ذكائها الكانو سابقين عمرها ..🖊

🖊جيران ناس حنين طوالي بالحيطة كانو اسرة صغيرة و بسيطة .. ((احمد)) و امه و ابوهو .. احمد مع حنين و محمد في نفس المدرسة و هو في نفس عمر محمد اخو حنين و كان صاحبهم شديد من و هم صغار و دايما بلعب معاهم و حتى في المدرسة و كمان مع بعض في نفس الترحيل ..🖊

*🖊استنو احكي ليكم موقف حصل في يوم كدة بعد المغرب..ام حنين و ابوها و كمان ام احمد و ابوهو يعني العائلتين كان عندهم مشوار مع بعض و ح يضطرو يخلو الاولاد في البيت ..المهم احمد مشى قعد مع حنين و محمد في بيتهم و اهلهم طلعو و حذروهم م يطلعو من البيت لحدي م يرجعو .. و فعلا م طلعو من البيت و كانو بلعبو عادي ..و كانو بلعبو لعبه {بومبا} او {استغماية} عرفتوها صح ..المهم الدور كان على محمد يغمض عيونو و يعد لحدي 10 و حنين و احمد دخلو عشان يتخبو منه .. فعلا محمد بدا يعد 1 و 2 و 3 .. و حنين و احمد سريع دخلو الصاله لي جوة و بعديها دخلو الغرفه و اي واحد فيهم اختبأ في مكان..حنين قفلت الباب بالمفتاح و قالت لي احمد اسكت عشان نفوز ..احمد طوالي سكت ..محمد لمن وصل لي 10 الكهربا فجاءة قطعت لانه برة في غبار شديد ..نوع الغبار الزي العاصفه داك و البيت بقى مظلم شديييييد و الغرفه الفيها حنين و احمد مظلمة اكتر .. حنين طلعت من تحت السرير و قالت ي احمد انت وين و كانت خايفه و م شايفه اي شي ..احمد طلع من جوة الدولاب و قال ليها انتي الوين م شايفك ..حنين قالت ليهو تعال جمب السرير هنا انا واقفة ..احمد قال ليها يعني انا لو شايف السرير اكيد ح اشوفك ي حنين م تبقي غبية ..حنين بدت تبكي و قالت ليهو ياخ اسمع صوتي و تعال علي ..🖊طبعا ي جماعه الغرفه كبيرة و مظلمة شديد و ديل اطفال يعني عشان كدة 🖊
المهم احمد قرب من صوتها و فعلا مسكها من يدها و طوالي حنين مسكتو شديد ..وبدت تبكي و قالت ليهو خايفه انا ..احمد قال ليها< انا معاك م تخافي ..> ..الجمله دي دخلت في راس حنين طوالي مع انها كانت خايفه شديد و م فاهمة حاجه بس الجمله دي دخلت راسها طوالي و بقت ماسكة في يد احمد ..5 دقايق و بعديها الكهربا رجعت ..حنين طوالي فكت يدها من احمد و طوالي طلعت برة ..🖊

🖊ممكن تقولو لي انا حكيت الموقف دا .. بس صدقوني الموقف دا مهم شديد بالنسبة لي حنين لانه اول مرة تخاف و تلقى زول جمبها طوالي و يقول ليها انا معاك ..ممكن تقولو انهم شفع و كدة بس برضو حنين حست ب احساس حلو و هي ماسكة يد احمد ..لانه اول مرة تمسك يد ولد كدة ..اما احمد كان فرحان و كان نفسه يقرب من حنين و يحبها ..مع انه م عارف يعني شنو اصلا يحبها بس كان شايف اي ولد بحب بت و كدة ف كان عايز يجرب كدة مع حنين 🖊

🖊بعد 5 سنه ..حنين كبرت شوية و بقت جميلة اكتر و شكلها الكبير بدا يوضح .. طبعا اخوها محمد امتحن السنه الفاتت و داخل الثانوي السنه دي و معاهو احمد برضو ..بس احمد ابوهو لقى شغل برة السودان ولازم يسافر هو و امه معاهو و يكمل قرايتو برة ..المهم في ال 5 سنه الفاتو احمد كان بقرب من حنين اكتر و حصلت مواقف كتير ..احمد دايما كان بقيف مع حنين و بجيب ليها شوكلاته و شيبس و مدلعها و هي طبعا م مصدقه زول يجيب ليها شوكلاته ..لانها بتحبها شديد ..المهم حاليا احمد مسافر و م ح يرجع تاني ..حنين كانت زعلانه شديد في اليوم دا و خايفه لانه اقرب زول ليها ح يمشي و م راجع تاني ..🖊

🖊بكرة الصباح احمد و امه و ابوهو ح يسافرو و جهزو نفسهم .. جمال ابو حنين عزمهم على العشاء ..و فعلا بليل كدة قعدو يتشعو مع بعض ..حنين م كان عندها نفس تاكل و قاعدة ساي و سرحانه و واضح عليها الزعل و احمد بعاين ليها و بي عيونو بحاول يطمنها(شايفين حب الشفع دا سمح كيف) ..المهم ابوها لاحظ ليها و سالها ..🖊

جمال { حنين حبيبتي مالك انتي م بتاكلي

حنين { م نفسي ي بابا

جمال { طيب قومي ادخلي غرفتك و نومي لانه بكرة عندك مدرسة بدري

حنين { حاضر ..

🖊فعلا حنين قامت سلمت على احمد و ابوه و امه و قالت ليهم تصلو بالسلامة و دخلت الغرفة ..احمد عندو كلام عايز يقولو لي حنين بس م عارف كيف يقولو بعد م حنين دخلت غرفتها 🖊

♡♡