برنامج #كاتبك_معانا
إعداد و تقديم : ريان
حلقة : 15
.
مساكم عسل يا حلوين و صحة فطوركم طبعا ، رمضان اصبح في النص التاني و قريب يتم و للان ما حسيناش بطعمه بس عادي المهم الصحة و العافية و كل شي يتعوض ،
اليوم ضيفتي كاتبة شابة مش جديدة عندها سلسلة من الروايات ما شاء الله زي " انت منقدي " " بنيتي " " همس القلوب " " الشهيد " و غيرها من الروايات ، ضيفتي قدرت تتبت نفسها من غير اي شو و الحاجات يلي تلجي ليها الكاتبات الجداد عشان ينشهروا
ضيفتي الكاتبة #رورو_عاشور ، قبل ما نبدا حلقتنا خليني نعرفكم علي حاجات علي رورو
.
الاسم : رحاب عاشور " رورو عاشور "
العمر : 2001
بداياتها : 2018
اشهر رواياتها ، " الشهيد " " انت منقدي "
..........
نبدا حلقتنا
ريان : نبدا رورو
رورو : تمام
.
ريان : بدايات رورو عاشور ؟
رورو : بدايتي كانت من صغيره كنت نكتب في قصص ونقرا فيهم لخوتي ولما كبرت جربت نكتب اول رواية 2017 ونشرتها شهر 2 سنة 2018
.
ريان : اول رواية ليك ؟
رورو : همس القلوب ♥️
.
ريان : افضل رواية كتبتها رورو كانت ؟
رورو : الـشـهـيد ، ذكـريـات لا تـمـوت ، انت منقذي
أحب تلاته روايات لقلبي ♥️
.
ريان : افضل كاتبة بنسبة لرورو ؟
رورو : الحق اني مانقراش في روايات لكن لما يشكرولي رواية نقرا منها شوية بس تعتبر افضل كاتبة عندي كاتبة رواية غاليتي ♥️
ريان : قصدك شهرزاد ؟
رورو : ايه
.
ريان : تعتبري نفسك كاتبة موهوبة ؟ او مبتدئة ؟
رورو : من ناحية السرد موهوبة ومزال نتعلم اكثر واكثر ان شاء الله ♥️
.
ريان : تتقبلي النقد ؟
رورو : نحب من ينتقدني لكن بـ. اسلوب ♥️، والحمدلله ماواجهتش هلبا نقد ديما يشجعو فياا ♥️
.
ريان : رورو عاشور مشهورة او مضلومة ؟
رورو : سؤال محرج 😂💔 لكن جوابي ان ماعمري فكرت في هكي ! ، لان اني نكتب مش بش ننشهر لا ! ، نكتب لان ربي اعطاني الموهبة هادي ونحاول نفيد بيها غيري ؏ قد مانقدر بس ♥️ءء
.
ريان ؛ تخصص رورو عاشور ؟
رورو : لغات ان شاء الله ♥️
.
ريان : حلم رورو عاشور في المستقبل او الاهداف ؟
رورو : حاليا والفتره هادي حلمي مايضرر حد من عيلتي في الحرب ونشوف بلادي ولو يوم واحد حالها كويس ومتصالحين شرق وغرب ويد وحده بس ♥️♥️
.
ريان : رورو تفضل ان تكون امراة عملية او ربة منزل ؟
رورو : ؏ حسب لو اضطريت نخدم عادي بس نفضل نكون ربة بيت احسن ♥️
.
ريان : رح تكملي في مجال الكتابة او فترة و خلاص ؟
رورو : الكتابة مش محور حياتي الكتابة هواية ولو اضطريت نوقف උ نوقف ولو مافيش سبب يمنعني උ نكمل ♥️
.
ريان : من القصة يلي كتبتيها ؟ و عشتي فيها و انتي تكتبي فيها ؟
رورو : ذكريات لا تموت عشت فيها جميع احداتها لان اخدت مني 4 شهور تقريباا 76 بارتت ♥️
.
ريان : لو حتختاري بطل من ابطال روايتك ؟ يطلع في الحقيقة من يكون ؟ و من اي رواية ؟
رورو : شهيد في رواية الشهيد ♥️
.
ريان : كيف توصفي شخصيتك ؟
رورو : من ناحية شن
ريان : ابعاد شخصيتك
رورو : شخصيتي عاديه يمكن غامضه شوي ولكن حبوبه ومش مغروره والفانز اللي يتابعو في رواياتي ويهدرزو معاي يعرفوا ان مش مغروره نحب نكسب الناس والناس تكسبني وبس ♥️
.
ريان : تحبي اللمة او الهدوء ؟
رورو : ؏ حسب المزاج لان اني انسانه مزاجيه مرات نواصل ونحب اللمة ومرات نكون متوحده 😂💔
.
ريان : هل في حد من عيلتك ما يعرفش انك كاتبة ؟
رورو : لا الحق اغلبهم يعرفوا ويقرولي ♥️
.
ريان : هل تأتر المستوي التعليمي بسبب الكتابة !
رورو : لا الحمدلله ♥️
.
ريان : بلد تتمني تسافريه ؟
رورو : السويد ♥️
.
ريان : طقوسك في رمضان ؟
رورو : روتين رمضان انوض انصلي ونقعمز نختم ونساعد خواتي وماما في المطبخ بحكم ان اني الصغيره فـ مش ديما انطيب وبعد المغرب نضم المطبخ ونلتموا العيلة كلنا نهدرزو ونفس الشيء في السحور انضم ونقعمز نختم شوي وبعدين نبدا نلعب pubg لين نرقد بس ♥️
.
ريان : و افضل اكلة بلنسبة ليك ؟
رورو : افضل أكلة ليبية شعبية منقدرش نقاومها هي الكسكسي والعصبان مانقدرش نقاوم نهائي 💔😂😂
.
ريان : كلمة ل MBC LIBYA 🇱🇾 ؟
رورو : Mbc libya احلا صفحة واكتر صفحة ناجحهه ♥️ ومزال مع الوقت ح تتجح اكثر واكثر ، ربي يعاونكم ويوفقكم في مسيرتكم ♥️
.
ريان : شكرا ليك حبيبة قلبي
رورو : العفو ولو
.
بهذا نكونوا وصلنا لنهاية حلقتنا اليوم نتمني لرورو النجاح و الاستمرارية و نتلاقوا حبايب قلبي غدا و حلقة جديدة و كاتب جديد و رح يكون الكاتبة #عقورية ، باي باي
أنت تقرأ
كاتبك معانا ( كل كتاب ليبيا )
RomanceMBC LIBYA 🇱🇾 تقدم برنامج #كاتبك_معانا .. مع الادمن #ريان برنامج حواري كل يوم سيكون معنا كاتب او كاتبة و سنساله اسئلة لم تخطر علي البال ، لنتعرف اكتر عليه و علي شخصيته ، و سيتم طرح الحلقات كل ليلة في رمضان . يتكون البرنامج من 20 حلقة ، 20 كاتب...
