♤حنين♤

حنين 12

رواية .. ♤ حنين ♤

بقلم .. كيمو 🍟

♤12♤

*ثاني يوم الصباح كان يوم السبت  .. حنين صحت من النوم زهجانه لانه الكهرباء قاطعه .. شربت الشاي كدة و البيت مسخن م قدرت تقعد .. عندهم سطوح فوق طلعت طوالي و في ظل كدة جابت الكرسي و قعدت و مسكت تلفونها .. فجاءة سمعت زول بصفر صفارة المشاغلة ديك .. قبلت يمين شمال كدة شافت مصعب في سطوح بيتهم برضو .. عملت منه رايحه .. شاغلها تاني عاينت ليهو قالت ليهو اها ..طبعا المسافه قريبة شديد بين السطوحين لانه البيتين بس فرقهم حيطة .. مصعب رد ليها .. كهربتكم قاطعه .. قالت ليهو اي قاطعه ..قال ليها زهج صح .. قالت ليهو اي .. قال ليها اها و الحل؟ قالت ليهو في البل و قعدت تضحك .. مصعب بس بقى يعاين ليها و سرحان فيها و مبتسم ..حنين بعد كملت الضحكه عاينت لقتو بعاين ليها قالت ليهو هوي خلاص شنو .. قال ليها احلى ضحكه اشوفها في حياتي .. حنين فصلت كدة و قالت ليهو شكرا .. قال ليها طبعا م عندي جامعه الليله .. قالت ليهو اها كويس والله .. قال ليها شايفك امبارح جيتي متاخر البيت انتي و اخوك تقريبا مش اخوك دا .. قالت ليهو اي اخوي كنا في مكان الاسكريم مع صحباتي .  قال ليها ايوااا ..حنين اتزكرت انها لازم تسالو من حاجات كدة عشان تقدر تساعد ريان و تنتهي من الموضوع دا لانها زهجت.. قالت ليهو صحي انت بتقرا وين وشنو ؟ قال ليها بقرا طب في قاردن سيتي.. قالت ليهو اهاا مكان البنات السمحات . مصعب بصوت واطي كدة  قال ليها .. هو في اسمح منك .. حنين م سمعتو و قالت ليهو طبعا اكيد مربط .. يعني مستحيل كدة جامعه كلها مزز م تكون مربط صح؟.. مصعب بي جوة داير يطير من الفرحه تقريبا دا احلى سؤال يتسألو في حياتي .. طبعا عمل فيها تقيل كدة و قال ليها .. والله صحي ياخ البنات سمحات شديد شديد شديد و سرح فيها كدة سمحين س... طوالي قاطعتو خلاص خلاص عرفنا سمحين .. يعني مرتبط صح من الاخر كدة .. قال ليها لاااااا والله لا مرتبط لا شي .. قالت ليهو خلاص خلاص طيب .. حنين سمعت امها بتناديها و طوالي نزلت ليها .. مصعب فرح شديد و حس انه خلاص حنين قربت منه و امورو ح توضح ..*

*حنين نزلت لي امها تحت ..*

حنين { اي ي امي

سماح { اها مش مفروض تقدمي بعد كدة

حنين { اي .. بس لسه م اتفقنا على جامعه ..

سماح { شنو م اتفقتو عايني دي قراية م عندها علاقه بالاصحاب .. لازم تقري جامعه النيلين و الموضوع انتهى ..

حنين طوالي انفعلت ..{ امي امي نيلين شنو ي امي انتي جادة ؟؟ انا اقرا في النيلين؟ حوش البقر ي امي ؟ ترضي اكون بقرة ي امي ؟ ترضي امشي الحوش ؟ ولا اكل بكلمبه ..

سماح { اسمي باكمبا ي بت

حنين { ياخ المهم ي امي .. م بخش والله النيلين

سماح { ي بت والله جامعه كويسه و من احسن الجامعات في السودان و مقيمة برة السودان و شهادتها والله اقوى شهادة

🖊كلام سماح صح على فكرة .. النيلين جامعه مقيمة شديد وانا بقرا فيها و الحوش بتقولو عنه حوش البقر دا بجيهو ناس من كل الجامعات والله عشان يقعدو يتنوسو فيهو و البكلمبة دي قصدي البكامبا دي لو جربتها من هناك م بتخليها تاني .. 😹😹 المهم م موضوعنا ..🖊

حنين ردت لي امها { اي عارفه ي امي انه النيلين جامعه كويسة و شهادتها قويه .. بس ي امي يرضيك الجمال دا كلو يمشي العربي ؟ يرضيك ي امي اكل تبش بالشطة؟ ولا اشرب عرديب يي جنيه ؟ امي والله لو امشي اجاهد في اليمن م امشي النيلين ..

سماح { غايتو جنس دلع .. خلاص عندك خيارين تاني .. الخرطوم او امدرمان الاسلامية

حنين عاينت لي امها كدة و عايزة تبكي { امدرمان الاسلامية ؟ .. امي رايك شنو ترجعيني بطنك ؟

سماح قعدت تضحك و قالت ليها خلاص الخرطوم ..

حنين { بفكر في الخرطوم طيب

سماح { اي بس ..

//

*نخلي حنين و امها و نمشي لي ريان .. ريان طبعا سافهة احمد  و م بترد عليهو من امبارح .. و احمد بتصل ليها كثير و هي م بترد ..شوية كدة زي الساعه 2 ريان اتصلت ليها قالت ليها جاياك ضروي .. حنين قالت ليها طيب ...*

*ريان وصلت و دخلت لي حنين  و كان واضح انها زهجانه ..*

حنين { مالك زهجانه كدة ..

ريان { م عارفة ياخ  .

حنين { في مشكله مع احمد صح؟

ريان { بقينا نتكلم عادي و انا زهجتا منه و اتغير م زي الاول ولا حاجه ..

حنين سكتت شويه كدة .. قعدت جمب ريان و قالت ليها ..{ الكلام دا تقولي لي زول تاني ي ريان اما انا عارفه انك معجبه بي ولد تاني .. وانا متاكدة مليون في الميه احمد م غلطان معاك في شي بس دي حركات منك عشان انتي في بالك زول تاني .. احمد بحبك شديد ي ريان و زول عايزك لي قدام .. اما مصعب دا م عشان حلو و عجبك خلاص تخلي احمد عشانو ..

ريان  بي زهج كدة{ م عارفة م عارفه

حنين { م تقولي لي م عارفه

ريان { انا قررتا خلاص ..

حنين { قررتي شنو؟

ريان { م عايزة اكمل مع احمد و عايزة مصعب بس