♤حنين♤

حنين 16

رواية .. حنين ♤ حنين ♤

بقلم .. كيمو 🍟

♤16♤

*◇عارفين !! لما نتضايق من موقف حصل او مشكلة صعبه واجهتنا. بالزات في مواضيع شخصيه بينا و بين ناس قريبين مننا في لحظة بس بنحس انه الدنيا كلها فوق راسنا و الواحد فينا بكون متضايق لدرجه بعيدة و نفسه الايام تعدي سريع عشان خلاص التفكير غلبو و م قادر يتصرف و لا يحل المشكلة او الموقف الحاصل معاهو ..في الحاله دي لازم نفهم انه كل ثانيه و دقيقه بتمر في حياتنا محسوبه علينا و م عارفين متين تنتهي .. عشان كدة لازم م نضيع ولا ثانيه في التفكير و الندم و الحسرة ..و  لازم نفهم انه اي شي بعدي و الحياة م بتقيف عشان موقف او مشكلة او سوء تفاهم بينك و بين اي زول ..ممكن تقولو طبيعي و اصلا لازم يحصل كدة .. بس اي لحظة تضيعها ف انك تنفسن او تكون ندمان ح ترجع بعدها عادي بعد يوم اسبوع شهر في اي لحظة ترجع فيها عادي ح تلقى نفسك م استفدتا شي غير انك ضيعتا زمنك ..المهم دا اذا انت كنتا صح .. و في الوضع دا مستحيل تكون غلط .. لانك لو كنتا غلط م كنتا ح تندم اصلا◇*

*حنين كانت عارفه الكلام دا كله عشان كدة اصلا م نفسنت ولا كانت زهجانة بس كانت بتبكي بعد كلام ريان لانه بالجد ببكي ..و عارفه انه ريان فاهمه غلط و في حاجه كمان غلط في الموضوع هي م فاهماها .. يعني م كانت فاهمة لي مصعب كان مع ريان و ليه ريان قالت انه مصعب بحبها و ليه مصعب مسك يد ريان .. حنين محتاجه تفهم بس هي قررت انها م عايزة تفهم اي شي و لا عايزة تقابل مصعب تاني ولا تتكلم معاهو ولا كلمه و لاحتى تشوف ريان تاني ..*

*بعد المغرب كدة .. شهد وصلت البيت و اول م دخلت مصعب طوالي اتكلم معاها بي زهج ..*

مصعب { انتي عارفة انك دخلتينا في موقف صعب شديد

شهد عاينت ليهو باستغراب و قالت ليهو { موقف شنو ؟

مصعب { دخلتيني انا شخصيا في حتة ضيقة شديد..

شهد { اهدى و اتكلم براحه .. في شنو

*مصعب حكى لي شهد الحصل في الكافيه قبيل كلو ..*

شهد قعدت في الكرسي و واضح عليها الصدمة ..

مصعب { يعني ي شهد انتي الوقت دا كلو كنتي فاهمة اني عايز البت الاسمها ريان دي ؟

شهد { دا الكان واضح قدامي ي مصعب

مصعب بدا يعلي صوته و يتكلم بي زهج { ياخ واضح شنو ي شهد .. انا قصدي حنين م ريان  ..حنييييييييين ي شهد حنين

شهد طبعا عصبيه شديد .. علت صوتها اعلى من مصعب { ياخ انت غبي ولا شنو .. انت اي شي كنتا بتقولو لي كان بدل على انها ريان .. اول شي قلتا لي جيرانا في البيت دا .. و انا كل م اكون طالعه بشوفها البت الاسمها ريان دي داخله فيهو و كمان قلتا ليك انها بتقرا في تالته و انت قلتا لي اي صح  و لما اتكلمت معاها عرفت انها قابلتك مرة وحده زي م انت قلتا لي .. يعني اي شي انت قلتو لي حرفيا بتقصد ريان .. الا بعد كدة لو انت كنت بتلاقي حنين دي و بتتكلم معاها و م بتكلمني