Amiss Prayer (Zawgyi&Unicode) [Completed]

Part-5(ဘယ်သူ့အတွက်)

For Unicode
ဘယ်သူ့အတွက်

မနက်ကတည်းကပင် ခြံထဲကိုပင်ကြည့်နေမိသည်။ သို့သော် မနေ့ညမှတွေ့ခဲ့သောသူအား အရိပ်အယောင်လေးပင် မတွေ့ရပေ။ အဘအိမ်သို့ သွားသောအခါတွင်လည်း မတွေ့ခဲ့ပေ။

မနက်အစောကြီးအလုပ်သွားတာများလား...

ခဏ.. ငါကအခု သူ့ကိုမျှော်နေတာလား။ မြတ်သူ မင်းဘာဖြစ်နေတာလဲ...။ မနေ့ညကမှတွေ့တဲ့သူအကြောင်းကို ဘာလို့အဲဒီလောက်စိတ်ဝင်စားနေတာလဲ..။ ရူးနေပြီပဲ..။ အိမ်မှာအချိန်တိုင်းနေနေရပြီး အလုပ်မလုပ်ရလို့ သွေးလေချောက်ချားနေတာလား..။

စရောက်ကတည်းကပင် အလုပ်ရှာသော်လည်း ယခုချိန်ထိမိမိဝါသနာပါ၍ နှစ်သက်သော အလုပ်ကိုရှာမတွေ့သေးပေ။ စိတ်ညစ်မိပါသည်။ တစ်နေ့တာလုံးတွင် ပျင်းရိနေသောကြောင့် မိမိစုဆောင်းထား သမျှစာအုပ်များကို ထိုင်ဖတ်နေမိသည်။ စာအုပ်ဖတ်နေရင်းပင် ညရှစ်နာရီထိုးသောအခါ အညောင်းပြေလမ်းလျှောက်ရန် ခြံထဲသို့ဆင်းလိုက်သည်။ မေမေနဲ့ဘွားဘွားသည်က တီဗီကြည့်နေကြသည်။ တီဗီကြည့်ရင်း ရယ်မောနေသောမေမေနှင့်ဘွားဘွားကို ကြည့်ကာစိတ်ချမ်းသာမိပါသည်။ သူတို့က မိမိ၏ဘ၀များပင်။

ညရှစ်နာရီထိုးနေပြီမို့လို့ အဘလည်းမရှိ။ မိမိတစ်ယောက်တည်းသာ လမ်းလျှောက်နေစဥ် ခြေသံကြားလိုက်မိသည်။ လှည့်ကြည့်မည်အပြုတွင် မိမိ၏အနောက်မှလူတစ်ယောက်သည် မိမိလည်ပင်းအား ချွန်ထက်သောအရာတစ်ခုနှင့် ထောက်ထားသည်..။

" မလှုပ်နဲ့နော်.. လှုပ်ရင်ငါ့ဓားသွားမှာ မင်းအသက်ပါသွားမယ် "

အသံသည်က ယောက်ျားလေးအသံပင်။ ယောက်ျားချင်းမို့ တိုက်ခိုက်ချင်သော်လည်း သူသည် မိမိထက်တစ်ဗန်းသာနေသည်။ သူသည်လက်နက်နှင့်။ မိမိသည်က လက်ဗလာနှင့်။

" ခင်ဗျား.. ခင်ဗျားဘာလိုချင်လို့လဲ.. "

" မင်းအိမ်ထဲကပစ္စည်းတွေ။ အော်မယ်မကြံနဲ့ အသေသတ်ပစ်လိုက်မယ်..။ သွား.. အခုမင်းအိမ်ထဲကို.."

ထိုသူက တဖြည်းဖြည်းသွားနေသည်မို့ မိမိကပါလိုက်သွားရသည်..။ မိမိလည်ပင်းတွင်ထောက်ထားသောဓားသည် အလွန်ထက်ပုံရသည်။ မိမိအသားထဲသို့ တဖြည်းဖြည်းနစ်ဝင်ကာ သွေးစများပင်ထွက်လာသည်။ထို့နောက် အမှောင်ထဲမှလူတစ်ယောက်သည် မိမိတို့၏ အရှေ့သို့ရောက်လာသည်။

ဟင်.. မနေ့ညက.. တွေ့ခဲ့တဲ့သူမဟုတ်လား

" ကျွန်တော့်ကို.. ကယ်.. ကယ်ပါဦး.. အ... "

မိမိ၏ စကားသံကို ထိုဓားပြက ကြားသောအခါ ဓားကိုပို၍ တင်းတင်းကျပ်ကျပ်ကိုင်ထားသည်။ ထိုဓားကလည်း မိမိလည်ပင်း အသားထဲသို့ ပိုပို၍နစ်ဝင်လာသည်မို့ ပို၍နာနေသည်..။

" ဟမ်.. မင်း.. မင်းဘယ်သူ့ကိုပြောနေတာလဲ။ ဒီမှာဘယ်သူရှိသေးလို့လဲဟမ်.. "

ထို့နောက် မိမိအရှေ့မှသူသည် မိမိနားသို့တိုးလာပြီး သူ၏လက်နှင့် မိမိမျက်လုံးကိုပိတ်လိုက်သည်။

" မျက်လုံးမှိတ်ထားကောင်လေး.."

သူ့၏ အောရှရှအသံအဆုံး၌ သူစေခိုင်းသည့် အတိုင်းပင် မိမိလည်းဆောင်ရွက်မိသည်။ အမိန့်တစ်ခုအား ငြင်းဆန်၍မရသည့်နှယ်။

မျက်လုံးမှိတ်ပြီးသိပ်မကြာမိီတွင် မိမိကိုဓားဖြင့်ထောက်ထားသည့် ဓားပြရဲ့လက်များသည် အားလျော့လာသည်ဟု ခံစားနေမိသည်။ မျက်လုံးဖွင့်ကြည့်လိုက်သောအခါ ထိုသူသည် ဓားပြ၏ လည်ပင်းကိုညှစ်ထားကာ လေပေါ်သို့မြှောက်ထားသည်။ ဓားပြမှာအသက်ပင်မရှူနိုင်ဘဲ မျက်လုံးများပင်ပြူးလာသည်။

မဖြစ်ဘူး.. သူ့အပြစ်ကို ကိုယ့်အပြစ်လို့မဖြစ်ဘူး။ တော်ကြာအဲဒီဓားပြသေသွားရင် သူအမှုပတ်တော့မှာ။

" ခင်ဗျား.. ခင်ဗျားလွှတ်လိုက်ပါတော့.. ဟိုမှာသေတော့မယ် လွှတ်လိုက်ပါတော့လို့ "

မိမိစကားကြောင့် ထိုသူသည်ဓားပြကို လွှတ်ပေးလိုက်သည်။ ဓားပြမှာလည်း မြေပေါ်တွင်လဲကျကာ အသက်ကိုမနည်းလုရှူနေရသည်...။ ထို့နောက် အဘသည် ဓာတ်မီးနှင့်ထွက်လာသည်။

" သခင်လေး.. ဟမ်.. ဟိုကောင်လေးကလည်း သခင်လေးဘေးမှာ.. ဘာတွေဖြစ်နေတာလဲ.."

မြတ်သူတို့၏အနားသို့ အဘလှထွန်းရောက်‌လာသောအခါ ထိုဓားပြထွက်ပြေးသွားသည်။

" ကောင်လေး.. ဘာဖြစ်တာတုံး.. "

" ဓားပြပါအဘ.. ကျွန်တော့်ကိုဓားထောက်ပြီး ဓားပြတိုက်လို့.. ဒီလူက ကူညီ.. အယ်..."

မြတ်သူက ဘေးသို့လှည့်ကြည့်မိသောအခါ ထိုသူမရှိတော့ပြီ။

" ဟမ်.. ဘယ်ရောက်သွားလဲ... စောစောကဒီနားမှာပါ.."

ထို့နောက် ခြံထဲသို့မေမေနဲ့ဘွားဘွားဆင်းလာသည်။

" သား ဘာဖြစ်လို့လဲ..."

" ကောင်လေးက.. ဟို..."

အဘက မေမေတို့အားပြောပြမည်အပြု ကျွန်တော်က အရိပ်အကဲပြကာ မပြောရန်ထားမြစ်လိုက်သည်။

" ဟို.. ဘာမှမဖြစ်ပါဘူးမေမေ.. သားချော်လဲလို့.. အဘကလာထူပေးတာပါ.."

မေမေနှင့်ဘွားဘွားသိရင် အဆင်ပြေမည်မဟုတ်ပေ။ စိုးရိမ်လွန်းလိမ့်မည်။ မိမိသည်ကလည်း မည်သည်မျှကြီးကြီးကျယ်ကျယ်မထိခိုက်သည်မို့ မပြောပြခဲ့ပေ။

" သား လည်ပင်းမှာသွေးထွက်နေပါလား.. "

" အဲဒါက.. ဟို..ဟိုဟာ.. သစ်ကိုင်းခြောက်နဲ့ခြစ်မိသွားလို့ပါ "

" ရရဲ့လားသားရယ်.. "

" ဟုတ်ရပါတယ်.. သားဆေးထည့်လိုက်မယ်။ လာမေမေနဲ့ဘွားဘွား.. အပြင်မှာအေးတယ် အထဲဝင်ရအောင်.. "

မိမိအခန်းထဲသို့ ရောက်သောအခါထိုသူ၏အကြောင်းကို စဉ်းစားမိသည်။

သူဘယ်ကိုရောက်သွားတာလဲ။ ဘာပဲပြောပြော သူ့ကိုကျေးဇူးတင်ပါတယ်..။ သူကယ်ပေးလို့သာပေါ့။ မဟုတ်ရင် ဘာဆက်ဖြစ်မလဲ.. မတွေးရဲဘူး...။

မြတ်သူသည် အမည်မသိသောထိုသူ၏ အကြောင်းကိုတွေးနေသကဲ့သို့ သူထိုကလည်းမြတ်သူ၏အကြောင်းကို တွေးနေသည်။

" အဲဓားပြကိုအသေသတ်ပစ်ချင်တာ။ ဘာလို့လဲ.. သိလား။ ကိုယ့်ကောင်လေးကိုနာကျင်စေခဲ့လို့.. သွေးထွက်စေခဲ့လို့။ ကောင်လေးကို ဆံချဉ်မျှင်လေးကအစ အထိခိုက်မခံနိုင်ဘူး။ သူအဆင်ပြေရဲ့လား..အရမ်းများလန့်နေမလား... စိုးရိမ်တယ်ကောင်လေးရယ် "

ထိုနေ့ညက အခန်းငယ်လေးထဲတွင် နှစ်နှစ်ခြိုက်ခြိုက်အိပ်ပျော်နေသောကောင်လေးကို 'သူ.. အဆင်ပြေပါ့မလား' ဟူသောစိုးရိမ်စိတ်နှင့် အခန်း၏ထောင့်လေးမှ ရပ်၍ စောင့်ကြည့်နေသောသူတစ်ဦးလည်း ရှိနေခဲ့သည်။

ထိုအဖြစ်အပျက်ကြောင့်ပင် နောက်တစ်နေ့ညတွင်လည်း အိမ်အပြင်မထွက်ချင်သေးပေ။ သို့သော် တစ်နေကုန်အိမ်ထဲတွင်သာ နေရသောကြောင့် အတော်ကိုပင် ညောင်းနေမိသည်။ အညောင်းပြေသဘောဖြင့်သာ ခြံထဲတွင် ခေတ္တမျှညလမ်းလျှောက်ချင်သေးသည်...။

ညောင်းလို့ လမ်းလျှောက်ချင်တာထက် သူ့ကိုတွေ့ချင်တာဆိုရင် ပိုမှန်နေမလား..။

သူနှင့်တွေ့ဆုံခြင်းသည် နှစ်ခါရှိနေပြီ။ သို့သော် သူ၏နာမည်ကိုမသိရသေးပေ။ သူသည်မည်သူနည်း ကိုလည်းမသိရသေး..။

စိတ်ထဲတွင် အပြင်ထွက်ခြင်း မထွက်ခြင်းနှင့်ပတ်သက်ကာ မဲခွဲပွဲကြီးကျင်းပနေသည်။ မထွက်ချင်ရသည့် အကြောင်းအရင်းသည် မနေ့ညကကဲ့သို့ ထက်၍ဖြစ်မည်ကိုစိုးရိမ်သောကြောင့်ပင်။ ထွက်ချင်ရသည့် အကြောင်းအရင်းသည် ညောင်းနေ၍ဖြစ်သည်။ ဤသည်ထက် သူ့ကိုတွေ့ချင်သောကြောင့်ဟုဆိုလျှင် ပို၍မှန်နိုင်သည်။ ထို့ကြောင့်နှစ်မဲနှင့်တစ်မဲဖြစ်ကာ နှစ်မဲကအနိုင်ရရှိသောကြောင့် ခြံထဲသို့ထွက်လာခဲ့မိသည်။

ဒီနေ့တော့.. ဘာမှမဖြစ်လောက်ပါဘူးနော်။ ထွက်သာထွက်လာတယ်..စိတ်ထဲမှာ တထိတ်ထိတ်နဲ့။

ဤအိမ်သည် မြတ်သူအတွက်အကျိုးမပေးပါ။အစစအရာရာကံကောင်းလာခဲ့သောမြတ်သူသည် ဤအိမ်သို့ရောက်‌သောအခါ ပြဿနာတို့သည် တစ်နေ့တစ်မျိုးမရိုးနိုင်အောင်ကိုပင် ဖြစ်နေပါသည်။

ယခုတွင်လည်း မြတ်သူလမ်းလျှောက်နေစဥ် အုန်းပင်အောက်သို့ရောက်သောအခါ မြတ်သူအပေါ်သို့ အုန်းလက်ကြွေကျလာသည်။ အုန်းလက်ကြွေကျလာသည်ကို မြတ်သူမသိပေ။ မှောင်လည်းမှောင်နေသည်မို့ အပေါ်ကိုမမြင်ရ..။

အဆိုးထဲကအကောင်းဟု ဆို၍ရမည်ပင်...။ မြတ်သူသည် ဤအိမ်သို့ ရောက်သောအခါ မည်မျှပင်ကံဆိုးပါစေ ကာကွယ်ပေးမည့် သူသည်အဆင်သင့်ရှိနေသည်..။

အုန်းလက် ကြွေကျလာချိန်တွင် လူတစ်ဦးသည် မြတ်သူအား အနောက်မှဖက်ကာ ကာထားလိုက်သည်။ မြတ်သူမှာမူ ရုတ်တရက်ထိုသူဖက်လိုက်သည့်ရှိန်ကြောင့် လဲကျသွားသည်။ ထိုသူကတော့မြတ်သူအပေါ်တွင် မှောက်လျက်နေအထားရှိနေသည်။ ထို့ကြောင့် အုန်းလက်သည် မြတ်သူအပေါ်သို့မကျဘဲ ထိုသူအပေါ်ကိုသာကျခဲ့သည်...။ ထို့နောက် ထိုသူသည် မြတ်သူအပေါ်မှဖယ်ပေးလိုက်ကာ မြတ်သူအား စိုးရိမ်စိတ်ဖြင့် ကြည့်နေသည်။

" အဆင်ပြေရဲ့လား.. ဘယ်နားထိသွားသေးလဲဟင်.. "

ခဏ.. အခုအုန်းလက်‌ကြွေကျထားတာသူအပေါ်ကိုလေ။ ဘာလို့ကျွန်တော့်ကို စိုးရိမ်နေတာလဲ

" ဟိုလေ.. ခင်ဗျားရော.. အဆင်ပြေရဲ့လား အုန်းလက်ကြီးက ခင်ဗျားအပေါ်ကိုကြွေကျထားတာလေ.. "

" ကိုယ်ကရပါတယ်.."

" မဖြစ်နိုင်တာ.. အဲဒါကြီးကခင်ဗျားအပေါ်ပြုတ်ကျထားတာ ခင်ဗျားခါးနာနေမှာပေါ့.."

" ကိုယ် တကယ်.. အဆင်ပြေပါတယ်.. "

" ဟုတ်ရဲ့လားဗျာ... ကျွန်တော်ဆေးသွားယူလိုက်ဦးမယ်။ ခဏစောင့်နေ.."

ဆေးသွားယူရန်ထလိုက်သည့် မြတ်သူအား ထိုသူသည် လက်မှလှမ်းဆွဲထားလိုက်သည်။

" တကယ်.. ကိုယ်အဆင်ပြေပါတယ်.. သွားမယူပါနဲ့ "

သူလက်တွေကအေးစက်နေပါလား။ သူတကယ်ရောအဆင်ပြေရဲ့လား..

" ခင်ဗျားလက်တွေက အေးစက်နေတာပဲ။ ဘာဖြစ်လို့လဲ.. လန့်နေတာလား"

မြတ်သူ၏စကားကြားပြီးနောက် ထိုသူသည် မြတ်သူအား ကိုင်ထားသော သူ၏လက်များကို အလျင်အမြန် ရုတ်သိမ်းလိုက်သည်..။

" ကိုယ်တကယ်အဆင်ပြေပါတယ်..ဘာမှမဖြစ်ပါဘူး.. အဲဒါကြောင့် ဆေးမယူပါနဲ့.."

" မဖြစ်သေးပါဘူး.. ခဏစောင့်နေ.. "

ဒီကောင်လေးက အခုထိခေါင်းမာတုန်းပါလား။ ကိုယ်အဆင်ပြေတယ်ပြောတာကို သူကဆေးကယူချင်သေးတုန်း။

ထိုင်နေရာမှထကာ ထိုသူအတွက်စိုးရိမ်နေသောမြတ်သူသည် ဆေးသွားယူမည်အပြု 'အ..'ဟူသောအသံဖြင့် ထိုသူ၏ရင်ခွင်ထဲကို လှစ်ခနဲလဲကျသွားသည်။

အဆင်ပြေနေမှုကြီးမှာ လဲကျသောသူက လဲကျသကဲ့သို့ ဖမ်းထားသောသူကလည်း အဆင်သင့်..။

" ဘာဖြစ်တာလဲ "

" ခြေထောက်.. နာနေတယ်.."

မြတ်သူ၏ခြေထောက်ကို ထိုသူကကြည့်လိုက်မိသည်။ သွေးထွက်ခြင်းမျိုးမရှိ..။

" ခြေထောက်ခေါက်သွားတာထင်တယ်။ ခဏပြန်ထိုင်လိုက်ဦး.. "

ထို့နောက် မြတ်သူ၏ခြေထောက်ကို နှိပ်ပေးခဲ့သည်။ ခြေထောက်၏နာကျင်မှုကြောင့် မြတ်သူသည် ထိုသူ၏ပခုံးကို ဆုပ်ကိုင်ထားသည်။

" အမေ့.. အ.. ဖြည်းဖြည်း... "

" အရမ်းနာနေလား.. "

" နည်းနည်းပါ "

နည်းနည်းဟု သာပြောသော်လည်း မျက်နှာမှာမူ အတော်ကိုပင် မဲ့နေသည်..။ မျက်ရည်ကြည်လေးများကလည်း ဥနေသည်။

" အိမ်ထဲရောက်ရင်ဆေးလိမ်းလိုက်ဦး မြတ်သူ.. "

" ဟုတ်... "

ခဏ.. သူကငါ့နာမည်ခေါ်လိုက်တာလား။ သူဘယ်လိုလုပ်သိနေတာလဲ။ ငါ့နာမည်ကိုသူသိပြီး သူ့နာမည်ကိုငါမသိတာမဖြစ်သင့်ဘူး။

" ခင်ဗျား.. ကျွန်တော့်နာမည်ကိုဘယ်လိုသိတာလဲ.. "

" ဒီလိုပဲသိတာ.. "

" အဘ ပြောပြတာလား "

" အင်း "

" ဒါနဲ့.. ခင်ဗျားနာမည်ကရော.. "

" တကယ်ပဲ ကိုယ့်နာမည်ကို မမှတ်မိဘူးလား "

" ဗျာ..."

ဘာကိုမမှတ်မိတာလဲ..။ သူမေးတာကြီးက နည်းနည်း မထူးဆန်းဘူးလား။

" ကိုယ့်နာမည်က.. စိုင်းထွဋ်ခေါင် ပါ.. "

" ဪ.. ဟုတ်ကဲ့... ကျွန်တော့်ကိုကူညီပေးလို့ ကျေးဇူးတင်ပါတယ်.. "

" ရပါတယ်... မြတ်သူအထဲဝင်တော့လေ.. အပြင်မှာကအေးတယ်..."

" ဟုတ်.. ကျွန်တော်သွားတော့မယ်နော်.."

ခြေထောက်ထော့နဲ့ထော့နဲ့နှင့် အိမ်ထဲသို့ဝင်သွားသောသူကိုကြည့်၍ သူမကြားမိအောင်ပြောလိုက်သည့်စကားသည် ..

" အခုမင်းကို ကိုယ်ကယ်တင်ခဲ့တာ‌တွေက.. အရင်က မင်းအပေါ်ကျူးလွန်ခဲ့တဲ့ ကိုယ့်ရဲ့အပြစ်တွေနဲ့ ယှဉ်ရင် မပြောပလောက်သေးပါဘူး..."

မနေ့ညကနည်းတူ ယနေ့ညတွင်လည်း နှစ်နှစ်ခြိုက်ခြိုက်အိပ်ပျော်နေသော ကောင်လေးတစ်ယောက်ရှိနေသကဲ့သို့ ထိုကောင်လေးကို 'သူ့ခြေထောက်များနာနေမလား၊ အဆင်ပြေပါ့မလား'ဟူသော စိုးရိမ်စိတ်တို့နှင့် အခန်းထောင့်လေးတွင် ရပ်ကြည့်နေသော သူတစ်ဦးလည်းရှိခဲ့သည်။