المتاهة | The Maze

Sound Of Death

" الخوف اللي جوا كل واحد فينا بيخليه يبقى حيوان..
لما بتتحط في اختبار حقيقي لكل المبادئ اللي فضلت عايش عليها سنين حياتك.. وبتتخير بينها وبين البقاء.. ساعتها بس هتعرف قد إيه إنت حيوان، وهتظهر همجيتك بعد ما تلغي آخرة ذرة تعقُّل في دماغك عشان تفضل عايش..
عارف دي إيه؟ دي غريزة البقاء..
من حقك تعرف إنت هنا ليه، على الأقل قبل ما تختار..
ششش.. اهدى خالص يا صديقي، كله هيبقى تمام..
كل حاجة هتبقى تمام. "
------
من وأنا صغير كنت بحب المزيكا، اللغة اللي الكل بيفهمها بس مش الكل بيتكلمها.. وكان الناس اللي بيعملوا المزيكا بمثابة آلهة بالنسبة لي..
حياتي كانت صغيرة، من البيت للمدرسة ومن المدرسة للبيت.. برغم إن المدرسة قريبة إلا إني كنت بروح بـ أتوبيس.. وحتى في الفصل مكنتش من الطلبة المتميزين..
في يوم اتخانقت أنا و واحد من الفصل، ولإني مش من هواة الخناق فأنا فاكر كل كلمة في الخناقة دي..
فاكر إنه قالي إنه هيقتلني، ويومها منمتش من الخوف..
تاني يوم لما جه المدرسة ومعمليش حاجة أنا اتضايقت.. وفكرت هو ليه مقتلنيش زي ما قال؟
الموت شيء مُبهَم، ومُخيف.. رغم إننا كلنا عارفين إنه جاي بس بنتفاجئ بيه كل مرة زي أول مرة.. بنتفاجئ بالكتلة الحية اللي كانت بتسعى وتعيث في الأرض فسادًا وهي بتقع وبتختفي..
عشان كده لما عرفت إن اللي اتخانقت معاه مات بعدها بأسبوع، حاولت أفهم ليه بنموت؟..
تمر السنين، وحبي للمزيكا يكبر.. ولما قررت أدرس المزيكا والأصوات، استغربت من إن كل اللي بنسمعه ده مش هو كل الأصوات في الكون.. وإن الأذن البشرية قاصرة عن إنها تسمع كل الأصوات..
وهنا بدأت أفكر.. إيه اللي يحصل لو سمعنا أصوات من المدى الأكبر من قدرتنا؟ إيه اللي يحصل لو حاولنا نكتشف المجهول ده؟..
كبرت الفكرة، وعملت جهاز بسيط يقدر يطلع الترددات اللي مبنسمعهاش ويترجمها لأصوات نقدر نسمعها..
مكنتش عارف اللي ممكن الجهاز ده يعمله في المجتمع العلمي وإنه اكتشاف ضخم ممكن يفتح مجالات كتير للدراسة، فمأعلنتش عنه..
وعشان مخاطرش جربت الجهاز لأول مرة على القط بتاعي، حطيته مع الجهاز في أوضة عازلة للصوت كنت جهزتها عشان أشتغل فيها وشغلت الجهاز بالريموت من بعيد..
بعد عشر دقايق قفلت الجهاز دخلت الأوضة وملقيتش القط ولا أي أثر ليه.. الأوضة مفيهاش غير الجهاز..
-----
الموضوع مقفلش لحد هنا، أنا جربته على قطط كتير، وكل مرة القط بيختفي من غير أي أثر.. لجد ما جربته على نفسي...
أيوة، أنا لحد دلوقتي مش مستوعب المكان اللي كنت فيه.. كل حاجة كانت بيضا كإن الدنيا بقت كيس قطن.. كل حاجة هادية.. الهدوء كان صوته عالي لو إنت فاهم قصدي..
بس أنا رجعت..
رجعت وأنا فاهم..
مش هشرحلك اللي هيحصلك، أنا بس هقولك إني مبقتش بسمع.. وإن كل اللي إنت سامعه ده هو صوت في دماغك..
يا إما تدخل الأوضة، وتشوف اللي بيحصل جوا.. يا إما الجهاز هيشتغل وساعتها أنا مش ضامن إنت هترجع تاني ولا لأ..
معاك 30 ثانية.. أشوفك بعدين.
-----
وُجِدَت في غرفة مريض عقلي مُنتحِرًا بآلة حادة موضوعة بعمقٍ في الأذن.

#Sound_Of_Death