👑DAYIVA 👑

Retou

- " Pa janm bese tèt ou devan pèsòn,ni gran,ni piti. Diyite w ak lonè w,se de de bagay pou ou pa negosye...goumen pou yo! Se yo ki pral fè w' moun,se yo ki pral fè ou vin yon fanm vanyan,yon fanm tout moun admire...ou tande sa mwen di w' la?

Kamyonèt la t'ap avanse dousman nan mitan de gwo nyaj pousyè ak lafimen nwa,sa gen anviwon kenz minit depi lap kouri sou wout la. Majorite pasaje yo te distrè,yo pat rive kache chagren ak fatig sou vizaj malgre solèy te apèn klere. Yon lòt jounnen anmè kou fyèl tap tann yo. Kèk nan yo,sa k'ap eseye pa panse ak mizè a kap tann yo kou yo met pye atè, tap bay lodyans. De twa medam tap ri byen fò,sa ki te anpeche yon vye granmoun gason kontinye kabicha. Bò kote li,yon jèn tifi te chita,yon rad ble pòtre ak vye tòchon ki fin wè tout jou li, mawonnen sou li.Figi li te mèg,de gwo zye ki te prèske sot tonbe nan tou yo tap fiske moun arebò li yo ak lendiferans.Anba bra li,yon sak zòrye tap jwe wòl malèt,li pat gen lòt zefè apre sa ,apre yon bokit ki te ka blan,si li te nan laswenyay, demwazèl la te enstale nan mitan de fant janm mèg li yo. Li tap fè sa li kapab pou evite atire atansyon moun yo sou li. De ran dlo,swè ki te mouye kò li tranp te kache, tap koule depi nan vizaj li pou rive sou ti wòb chifonnen an.Granmoun nan voye je l sou li,atò li konprann ti demwazèl sa ki pre li a tankou yon moun ki dezanpare,tout ti kò li te kòmanse sekwe,petèt afòs li t'ap kenbe dlo li yo pou lòt moun pa rann yo kont ke li ap kriye. Li pwoche pi pre l pou lonje yon mouchwa ki te nan pòch chemiz gri ki te sou li a ba li.

-Mesyedam,nou rive wi...

Chofè a te vin kanpe dèyè machin nan pou reklame kòb kous la,demwazèl la pèdi nan mitan foul pasaje yo. Granmoun nan t'ap gade plas li a,ban an te mouye...mouchwa te rete pandye nan men li.

"Anyen paka separe w ak kote ou soti a...kò w' ak lespri ou ka pran yon lòt chimen apre,pase fòs tan yo vle nan dekouvri lòt lorizon,men KÈ w... Kè w' toujou rete konekte ak li...s'on bagay ou paka chanje,lyen an twò pisan pou w' detwi.
Kote lonbrik ou antere,se la kè w ye..."

Dondon...vil lanmou,vil solèy! Dondon ak tout souvni dantan ,lago kache anba pye mango apre tas kafe fò nan maten,dlo rivyè k'ap paweze sou po w' anba yon gwo solèy cho...kont ak blag le swa anba lalin ak zetwal.Tim Tim bwa chèch. Jinèt te santi li yon lòt moun. Yon fòs tap antre nan li ak chak pa ke li fè...kounya li pare,kounya li ka afwonte tout pale anpil retou li ka kreye...de tout fason li pa gen lòt chwa.Detanzantan yon pasan oubyen yon machann tap bouskile li ,sa pat anpeche li souri,gwo bri ki te gen nan mache a pat kontrarye l nonplis. Li tap vanse tankou yon zonbi,fatig t'ap kraze zo li men anndan l' te chaje enèji. Motivasyon pou li rive lakay kout ke kout te pote sou doulè talon pye li tap sibi nan kontak ak labou cho a,ti sandal nwa pat ka pwoteje l ase,moso dèyè a te deja degrade. Bouskilad sou bouskilad,Jinét te kontinye fikse devan jiskaske yon laye zonyon ak pési sot tonbe dwat devan li an,kèk grenn magi chavire nan yon ma dlo sal ki pat twò lwen pye li.

-Atò madanm,pou w'ap mache epi w' pa kontwole kibò w'ap prale? Pèsekisyon vin tout jan wi mesye😒 Yèswa mwen wè m' yon malfini ap pouswiv mwen nan dòmi,alòs mwen pako rive nan mache a,gade a kisa mwen kwaze !! Men madanm nan jete laye a nan men m! Bon! Se voye yo voye w? Antouka,m pa bezwen konn kisa w'ap fè,w'ap kale m' kòb jounnen an wi !!

Machann nan t'ap pale pandan l'ap ranmase sa ki rete nan laye a. Bouch li monte disèt wotè sou Jinèt. Kèk kirye te kòmanse pwoche pi pre pou gade kisa ki pral pase,Jinèt pran tranble,li te sèlman pati ak kòb kous machin nan...se te tout sa li posede,apre bokit blan ki kwoke anba bra l' lan kote li te mete sak zòrye ki te gen de twa moso rad li yo. Machann nan te kontinye di li betiz san li pa sispann sove ti grenn zonyon labou a pat gentan pran yo.

-Dis lo zonyon pou katreven dola,kat ti ponyen pèsi...mwen te ka fè menm yon desan dola pandan jounnen an. Kounya pongongon an vini,li vide yo atè. Ou ki konn kisa mwen pral bay timoun yo manje. De tout fason,wap kale m' kòb mwen e map kite sa w jete yo la pou ou!

-Si ou gen lide kite yo,m ' pa wè poukisa wap tranpe men w' nan labou a pou w' ranmase yo la non. De twa grenn magi sèlman ki rete nan labou a,ou gentan ap fè tout pale anpil sa yo! Epi ki kòb mwen pral remèt ou a machè. Gade madanm,m'ap mache ak tout pwoblèm mwen nan kò m',degaje w' wete kò w nan wout la banm pase tande. Mwen pa gen tan pou m' pèdi.

Madanm nan sote,li leve tèt li atò pou li fè fas ak Jinèt.Men tout plan chanje lè je li tonbe sou li. Etonman ak sipriz pran plas kòlè ki te sou figi li. Moun sa l'ap joure depi talè a sanble pa yon enkoni pou li menm si li pako ka rive met yon non sou vizaj la.
Jinèt rekile,vwa de timoun kap chante devan yon gwo kivèt dlo bò yon rivyè monte nan tèt li...Li rekonèt dam sa ki tap manke li dega depi dat sa. Yo te grandi ansanm...yo te konn jwe ansanm. Dam sa te fè pati fanmi li anplis.

-Tann mwen,sa se pa Jinèt???!!!!
-Kouzin Filomèn!!!

Solèy la t'ap tenyen zèl li anba kèk ti nyaj,do kretyen vivan ak fèy bwa t'ap kankannen anba boukan dife li. Kòk te kòmanse chante depi byen lontan deja,bri machann yo ki tap prese pran direksyon mache bouk la  ak tout boulin dèyè de twa bourik byen chaje. Premye kout pikwa te gentan bay,kout chan travayè nan jaden frè Sovè a te anonse konbit la. Lanvi rive rapid pou jwenn bon lavant pat anpeche machann yo bliye règ koutwazi ki te genyen nan komin Dondon,plizyè nan yo te fè plizyè ti kanpe nan wout pou pran nouvèl vwazinaj yo.
-Kouman ou ye Sò Àn?
-E lannwit la konpè Sanon?

De a twa minit te sifi