شهد: يا بابا تعيش كيفاش نتزوج بواحد جامي شفتو ولا عرفتو
الاب: مانضالوش نكثرو فالهدرة بعد سمانة العرس وصاي
شهد: لذي الدرجة تكرهني؟ لدرجة تزوجني بوليد صاحبك غير باش ماتخسرش صاحبك ولا خلي نقول خدمتك
هنا ضربني بابا بكف بويسك وجعاتو هدرتي رحت نجري لشمبرتي بكيت حتى شبعت علاجال باش مايخسرش خدمتو ولا يرمي فيا انا
..
نعرفكم بروحي..
انا شهد عندي 23 سنة مكملة قرايتي مي مانخدمش، نسكن فالعاصمة ماما متوفية من كان فعمري 8 سنين نشفالها غير شوية مي ديما نحس روحي ناقصة حنان وحب وخصوصا انو بابا عاود الزواج ومرتو مكرهتلي حياتي ديما تحرضو عليا مي معليش ربي يخلص
علاقتي ب بابا عادية مي ضك راه حاب يزوجني بوليد صاحبو غير باش مايخسرش صاحبو وخدمتو بويسك صاحبو هذا بابا يخدم عندو
انا جاية متوسطة فالطول شعري نواغ كوربو وجاي طويل بزاف عينيا لونهم أزرق غامق وبشرتي بيضا
انا ماعنديش صحبات بويسك لي نديرها صحبتي تغير وتبعد عليا
نسكنو في فيلا ومن كنت صغيرة وانا عايشة في الغناء مي لضرك ماوالفتش ونحب نعيش حياة بسيطة
المهم غدوة الخطبة تاعي واخيرا حا نشوف بشكون راح نتزوج
..
اليوم نضت الصباح بكري درت ميكب خفيف ولبست روب صواري حمرا مع طالون احمر وشعري طلقتو وبقيت في شمبرتي مبلعة الباب ونستنى في الهم
حتى دقدق الباب فتحت لقيتها مرت بابا
سعاد: سقمتي روحك ااه وقدام باباك ديري فروحك مش حابة تتزوجي
شهد: كي تجيك الموت لازم تسلم روحك وتسكت وانا ثاني نفس الشي
سعاد: تشبهي ليماك بزاف وانا كل مانشوفك نتفكرها ونزيد نكرهك كثر وكثر
شهد(بالعياط): شووووفي بلاااكي تزيدي تجيبي سيرة يما على فمك
سعاد: حوجي تقول عود ايا انا نروح وانتي اقعدي نوحي
خرجت وخلاتني نغلي هدرتها ماحبتش تخرج من راسي بويسك بانتلي تعرف يما حسب واش قالت
..
شوي هكا سمعت الخدامة دخل في الخطابة رحت نطل غير بشوي باش نشوف بشكون حا نتزوج لقيتو طول وعرض وسمورية ولحية وعندو زين تاع اتراك ورافد بوكي ورد في يدو ومعاه مرأة كبيرة اكيد يماه..
زدت شوي جات عيطتلي الخدامة قاتلي حابين يشوفوك..
