ماضي لا ينتهي

الحلقة ٤٠

#ماضي_لا_ينتهي
#بوسي_مصطفى
_______________

الحلقة ٤٠

فادي : اقعدي يا يسرا واهدي كده
يسرا : انت متكلمنيش خالص حسابي معاك بعدين.
راوية : شوفي البت بتقول ايه يا مديحه؟؟
يسرا : لو سمحتي يا عمتي انا مش بت
راوية : امال انتي ايه يا بنت اخويا
وبعدين هو في بنت متربية ترد على جوزها
بالأسلوب دا؟؟
يسرا : دا اسلوبي بقى يا عمتي
وابنك قابل بكده
وبعدين سيبكوا بقى من اسلوبي
دلوقت.
هي الهانم دي هنا بتعمل ايه؟؟!
راوية : وانتي مالك هي كانت جايه بيتك؟؟!
ماجدة وولاد ابني يجوا في أي وقت وإن مشلتهمش
الأرض اشيلهم فوق دماغي.
ماجدة : متشكره يا ماما بس انا همشي بعد اذنكوا
راوية مسكت ايدها : تمشي تروحي فين اقعدي
اللي مش عاجبه بقى الباب يفوت جمل.
يسرا : سامع يا فادي
ولا حضرتك مش سامع اهانتي من مامتك؟؟
فادي : انتي اللي بدأتي يا يسرا
دا بيت ماما وخيلاني واللي عايز يجي يا مرحب
بيه.
ونظر ل ماجده كنوع من استرضائها لكن ماجدة
كانت بتحاول تتجاهل.
فادي : هتقعدي ولا هتروحي؟؟
يسرا : لا هروح.. ألف سلامة عليكي يا عمتي
فادي قالي انك تعبانه بس واضح ان حضرتك بقيتي
كويسه اهو.
راوية : لما شوفتك يا بنت اخويا
يسرا : متشكرة بعد اذنك
وخرجت يسرا يلحقها فادي على السلم
يسرا : ايه اللي نزلك ما كنت تقعد فوق علشان تتأمل
في ملامحها كويس.
فادي : انتي بتقولي ايه
يسرا : بقول ايه
ليه هو انتي فاكرني مش واخده بالي من نظراتك
ليها
على العموم اهي عندك اشبع بيها
فادي : ما بلاش اسلوبك المستفز دا بقى يا يسرا
وبعدين تعالي هنا قوليلي هو انا مش قولتلك تروحي
تطمني على ماما قولتي تعبانه ومعرفش ايه
ايه بقى اللى جابك دلوقت
يسرا : قلبي كان حاسس انكوا هتتقابلوا هنا
فجيت في الوقت المناسب علشان اقفشك يا فادي
فادي : تقفشيني ايه
هو انتي لسه برضو مصدقه
اني كنت اعرف إن ماجده هنا؟؟!
وحتى لو كنت اعرف ايه اللي فيها انا مش فاهم.
هو مش من حقي اشوف ولادي ولا ايه.
ولا اروحلها الشقة اشوفهم بقى؟؟
يسرا : هو انتي بتهددني
لا يا حبيبي عايز ترجعها اهي عندك اهي اتفضل روحلها.
يشدها ويركبها العربية
فادي : هترجعي البيت
يسرا : لا هروح عند ماما
فادي : طيب براحتك
يسرا نظرت ليه بغضب
فادي : ايه مالك مضايقه علشان ماجدة راحت
تشوف ماما قبلك؟؟
طب تصدقي إنها طلعت عقلها كبير
ومصغرتش مخها وطنشت
وجات تجري علشان تطمن على أمي.
يسرا : انت عايز تفرسني
فادي : مش دا اللي حصل
يسرا : اه ومين يشهد للعروسة بقى
ما هي حبيبة القلب لازم تمدح فيها طبعاً
فادي : على فكرة هي كانت ساكته وما انفعلتش زيك
كده
رغم إنك اللي بدأتي بالغلط.
يسرا : نعم !!
فادي : لاقتيها ادخلي سلمي عليها ولا كأن في أي حاجه
خدي الأمور بشكل طبيعي
انا اه طلقتها بس اللي بيربطني بيها ولادي وهتفضل تروح وتيجي لماما ولازم تتعودي على كده
يسرا : لا بقى دا انت مصمم تضايقني
فادي : لا اضايقك ولا تضايقيني انا هوصلك عند مامتك
وارجع البيت استريح
يسرا : هترجع البيت برضو
فادي : ايوه هرجع البيت
ولو هروح لماما هقولك عادي مبخافش على فكرة
وريحي نفسك هي اصلا زمانها نزلت مش هتقعد
بعد الكلام اللي قولتيه ليها
يسرا : يا حنين !!
________