#خيبه_قاتلة 1 ( المقدمة )
الرواية هادي فيها اكثر من قصة وأكثر من بطلة وبطل لكن في روايتنا هادي مفيش اي قصة ليها علاقة بي الثانية ... 4 شخصيات وقصص مختلفة ممكن من بينها تلاقي قصتك او شخصيتك او حجات تشبهك مثلاً !!
ـــــــــــــــــــــــــــــــــ
سارة :- سروال جينز، سورية سوداء، سبيدرو أسود، وشاح بنفس اللون وشنطة ضهر :-
هادا كل شئ خديته معاي ...لبستهم وطلعت بدون تفكير ... سكرت باب الحوش جزء مني يقولي استني اقعدي ممكن كل شئ يتصلح ... وجزء مني يقولي هيا سارة رح تتأخري لو فيه شئ ممكن يتصلح راهو ليه سنين متصلح ... نزلت يدي من علي مقبض الباب شفت أخر مرة للحوش وعطيته بضهر وطلعت نمشي في الشارع بروحي بدون مانتلفت بدون خوف شفت الساعة كم كانت 4:00 الفجر ... هواء باااارد ضرب وجهي تمنيت لو خش داخل قلبي وبرده شوية.
كملت طريقي والدنيا ضلام لين وصلت نهاية الشارع أخيراً طلعت علي الرئيسي فيه أكثر من حافلة مدرسة إخترت أول وحده وركبت ... قعمزت في الكرسي وماسكة الورق يلي في يدي بقوة كنت متوقعة في اي لحضة نشوف واحد منهم عند باب الحافلة
بدي قلبي يدق والخوف بدي محاوطني لين سمعت صوت خلاني نرتاح شويه.
السائق:- بسم الله توكلنا علي الله
سارة :- إتكيت علي الكرسي وقلبي مرتاح وزاد راحته علي سمعت أذان الفجر .
🔥رِوايـَــــاتْ بـــــَــــنـــو تــة الشــِـــيـــــــخْ🔥
حنين :- طلعت من الدوش ومريت من جنب المرايا مقدرتش نفوت بدون مانشوف لي وجهي قربت علي المرايا نتأمل في الآثار يلي علي وجهي
تمنيت لو كانت الآثار هادي من بابا لان مجبتش تقدير كويس في قرايتي او من خوي لأني لابسة ضيق او من ماما لانها مسكتني نحكي مع شاب مثلاً !!
تمنيت اي شئ الي انها تكون من راجلي 💔راجلي يلي درنا المستحيل عشان نكونو لبعض علاقة 6 سنين خداني غصب علي اهله وخديته غصب علي اهلي شنو يلي تغير ؟
منعرفش 💔
ــــــــــــــــــــــــ
مروة :- فتحت عيوني علي الريحة من 4 سنين نفس ريحة المطهرات نفس لون المستشفي الأبيض مفيش شئ متغير !!
قاطع الروتين هادا وجه ❤️اكثر وجه حبيته في حياتي اكثر وجه عطاني الأمل في دينتي كلها بس المرة هادي كان وجها غريب مفيشي اي ضحكة مفيشي حتي هذيكه الابتسامة يلي اطمني 🥺
لحظات وفهمت 💔عنده الحق في كل شئ ليه الحق يمل مني عنده الحق صبره ينفد ويكرهني بعد خامس عملية زرع وفي النهاية البيبي يطيح 💔 عطاني بضهره وطلع
مش زي كل مره يهدي فيا ويعطيني أمل يقولي نحبك بس زي ماقلت .... عنده حق.
ـــــــــــــــــــــــ
لجين :- رغم اني تاعبة من الشغل الاضافي امس في مصنع الخياطة لكن نضت بكري اليوم لازم نكمل خدمتي عشان يكمل عندي المبلغ ... نحب اللحضة يلي نستلم فيها راتبي بتعبي ناخد نصه والنصف الثاني لي خطيبي عشان يكمل قرايته ويشتغل في شركه محترمة زي ماكان يحلم طول عمره .... كل أصحابي هازيين عليا ويقولو كيف تصرفي عليه هوا الراجل مش انتي ... لكن مستحيل نتأثر بكلامهم لان ان شاء الله كله يرجعلي خير وراحة بعد زواجنا .
ــــــــــــــــــــــــــــ
ساره :- أخيراً وصلت أخيراً الشئ يلي نخطتله سنين اليوم رح نكمله
قدمت وانا نشوف المكان الضخم هاذا نشوفله بدون تعابير وجه رغم اني كنت فرحانة لكن منتريحش لين نكمل ... يتبع /;!
